Bids Farewell to MiG-21: ୬୨ ବର୍ଷ ହେଲା ସେବା ଦେଉଥିଲା, ଆଜି ନେବ ବିଦାୟ

ଆଜି ବାୟୁସେନାରୁ ବିଦାୟ ନେବ ମିଗ୍-୨୧ । ଭାରତୀୟ ବାୟୁସେନାର ସବୁଠାରୁ ଦୀର୍ଘ ସେବା ପ୍ରଦାନକାରୀ ଲଢ଼ୁଆ ବିମାନ MiG-21 ଆନୁଷ୍ଠାନିକ ଭାବରେ ଅବସର ଗ୍ରହଣ କରିବ।

୬୨ ବର୍ଷର ଗୌରବମୟ ସେବା ପରେ, ଏହି ବିମାନ ଆଜି ଚଣ୍ଡିଗଡ଼ରେ ଶେଷ ଉଡ଼ାଣ ଭରିବ । ମିଗ୍-୨୧ର ବିଦାୟର ଏହି ଐତିହାସିକ ମୁହୂର୍ତ୍ତକୁ ସ୍ୱତନ୍ତ୍ର କରିବା ପାଇଁ ବାୟୁସେନା ଏକ ସ୍ୱତନ୍ତ୍ର କାର୍ଯ୍ୟକ୍ରମ ପ୍ରସ୍ତୁତ କରିଛି । ଯେଉଁଥିରେ ଦେଶର ପ୍ରତିରକ୍ଷା ମନ୍ତ୍ରୀ ଏବଂ ବାୟୁସେନା ମୁଖ୍ୟ ମଧ୍ୟ ଉପସ୍ଥିତ ରହିବେ। 

ଏହି ଅବସରରେ ଏକ ସ୍ୱତନ୍ତ୍ର ଯୁଦ୍ଧ ଅଭ୍ୟାସ ଆୟୋଜନ କରାଯାଇଛି। ଯେଉଁଥିରେ ପ୍ରଦର୍ଶିତ ହେବ ମିଗ୍-୨୧ର ଯୁଦ୍ଧ କ୍ଷମତା। ସୀମିତ ବୈଷୟିକ କୌଶଳ ସତ୍ତ୍ବେ କିଭଳି ମିଗ-୨୧ ଶତ୍ରୁର ଆଧୁନିକ ବିମାନକୁ ପରାସ୍ତ କରିଥିଲା ତାହାର ମଧ୍ୟ ଝଲକ ଦେଖିବାକୁ ମିଳିବ।

ଇତିହାସର ପାଲଟିଯିବ

ଅଭ୍ୟାସ ବେଳେ ୧୯୬୫ ଏବଂ ୧୯୭୧ ଯୁଦ୍ଧର ବି ପୁନରାବୃତ୍ତି ହେବ। ପରେ ପରେ ଇତିହାସର ଅଂଶ ପାଲଟିଯିବ ଏହି ବିମାନଗୁଡ଼ିକ। ମିଗ୍-୨୧ ଭାରତୀୟ ବାୟୁସେନାର ପ୍ରଥମ ସୁପରସୋନିକ୍ ଲଢୁଆ ବିମାନ।

ଏହା ୧୯୬୫,୧୯୭୧, ୧୯୯୯ ଯୁଦ୍ଧରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ୨୦୧୯ ବାଲାକୋଟ୍ ଏୟାରଷ୍ଟ୍ରାଇକ ସମୟରେ ବି ପରାକ୍ରମ ଦେଖାଇଥିଲା । ଏହି ବିମାନ ପାକିସ୍ତାନର ଅନେକ ଆକ୍ରମଣକୁ ବିଫଳ କରିଥିଲା​​ଏବଂ ଭାରତୀୟ ସାମରିକ ଶକ୍ତିର ପ୍ରତୀକ ପାଲଟିଥିଲା।