Delhi Blast Probe Intensifies: ଦିଲ୍ଲୀ ବିସ୍ଫୋରଣ ମାମଲାର ତଦନ୍ତ: ମହିଳା ଡାକ୍ତର ଅଟକ

ଦିଲ୍ଲୀ ବିସ୍ଫୋରଣ ମାମଲାର ତଦନ୍ତ କରିବା ସମୟରେ "ହ୍ୱାଇଟ୍ କୋଲାର" ଆତଙ୍କବାଦୀ ମଡ୍ୟୁଲ୍ ସାମନାକୁ ଆସିବା ପରେ ତଦନ୍ତକୁ ବ୍ୟାପକ କରାଯାଉଛି। ଆଜି ପୁଣି ଆଉ ଜଣଙ୍କୁ ଅଟକ ରଖାଯାଇଛି। ଦକ୍ଷିଣ କାଶ୍ମୀରର ଏକ ସରକାରୀ ମେଡିକାଲ କଲେଜରେ ନିଯୁକ୍ତ ଜଣେ ମହିଳା ଡାକ୍ତରଙ୍କୁ ପଚରାଉଚରା ପାଇଁ ଅଟକ ରଖାଯାଇଛି। ଜମ୍ମୁ-କାଶ୍ମୀରରୁ ନୂଆଦିଲ୍ଲୀ ପର୍ଯ୍ୟନ୍ତ ଲିଙ୍କ୍ ଥିବା ଏକ "ହ୍ୱାଇଟ୍ କୋଲାର" ଆତଙ୍କବାଦୀ ମଡ୍ୟୁଲ୍ ର ଚେର ଲମ୍ବିଥିବା ଜଣାପଡିଛି।

ଜମ୍ମୁ ଏବଂ କାଶ୍ମୀର ପୋଲିସର କାଉଣ୍ଟର-ଇଣ୍ଟେଲିଜେନ୍ସ ଦଳ ଅନନ୍ତନାଗର ମଲକନାଗ ଅଞ୍ଚଳରେ ଏକ ଭଡା ଘରେ ଚଢାଉ କରି ହରିୟାଣାର ରୋହତକର ବାସିନ୍ଦା ଡାକ୍ତର ପ୍ରିୟଙ୍କା ଶର୍ମାଙ୍କୁ ଅଟକ ରଖିଛନ୍ତି। ଅକ୍ଟୋବର ୨୦୨୩ରୁ ସରକାରୀ ମେଡିକାଲ କଲେଜ ଅନନ୍ତନାଗରେ ଜେନେରାଲ ମେଡିସିନ୍ ବିଭାଗରେ କାର୍ଯ୍ୟରତ ଅଛନ୍ତି। ତାଙ୍କ ଘରୁ ଉଦ୍ଧାର ହୋଇଥିବା ଏକ ମୋବାଇଲ୍ ଫୋନ୍ ଏବଂ ସିମ୍ କାର୍ଡକୁ ମଧ୍ୟ ଯାଞ୍ଚ କରାଯାଉଛି।

ସୂତ୍ର ଅନୁଯାୟୀ, ଜିଏମସି ଅନନ୍ତନାଗର ପୂର୍ବତନ କର୍ମଚାରୀ ଆଦିଲକୁ ଗିରଫ କରିବା ପରେ ପ୍ରିୟଙ୍କାଙ୍କ ନାମ ସାମ୍ନାକୁ ଆସିଥିଲା। ଅଧିକ ଯାଞ୍ଚ ପାଇଁ ହରିୟାଣାରୁ ଏକ ଦଳ ଅନନ୍ତନାଗରେ ପହଞ୍ଚିବେ।

ମିଳିଥିବା ସୂଚନା ମୁତାବକ, ପ୍ରାୟ ୨୦୦ କାଶ୍ମୀର ଡାକ୍ତରୀ ଛାତ୍ର ଏବଂ ଡାକ୍ତର ଏବେ ରାଡାରରେ ଅଛନ୍ତି। ଆତଙ୍କବାଦ ବିରୋଧୀ ସ୍କ୍ୱାଡ୍ କାଶ୍ମୀର ଛାତ୍ରମାନେ ପଢୁଥିବା କଲେଜ ଏବଂ ବିଶ୍ୱବିଦ୍ୟାଳୟ ସହିତ ଯୋଗାଯୋଗ କରିଛି। କାନପୁର, ଲକ୍ଷ୍ନୌ, ମିରଟ, ସାହାରନପୁର ଏବଂ ଅନ୍ୟାନ୍ୟ ସହରଗୁଡ଼ିକରେ ପ୍ରତିଷ୍ଠାନଗୁଡ଼ିକ ଯାଞ୍ଚ କରାଯାଉଛି।

ଶୁକ୍ରବାର ରାତିରେ ଧୌଜ, ନୁହ ଏବଂ ବିଭିନ୍ନ ଅଞ୍ଚଳରେ ଚଢାଉ ସମୟରେ ହରିୟାଣାର ଆଲ-ଫଲାହ ବିଶ୍ୱବିଦ୍ୟାଳୟର ଦୁଇ ଡାକ୍ତରଙ୍କ ସମେତ ତିନି ଜଣଙ୍କୁ ଦିଲ୍ଲୀ ପୋଲିସ ଗିରଫ କରିଛି। ଅଟକ ଦୁଇ ଡାକ୍ତର ମହମ୍ମଦ ଏବଂ ମୁସ୍ତାକିମ୍, ଲାଲକିଲ୍ଲା ନିକଟରେ ବିସ୍ଫୋରଣ ହୋଇଥିବା ହୁଣ୍ଡାଇ i20 ର ଡ୍ରାଇଭର ଉମର ନବି ସହ ପରିଚିତ ଥିଲେ। ଉଭୟେ "ହ୍ୱାଇଟ୍-କୋଲାର" ମଡ୍ୟୁଲ୍ ତଦନ୍ତରେ ପୂର୍ବରୁ ଗିରଫ ହୋଇଥିବା ଡାକ୍ତର ମୁଜାମ୍ମିଲ୍ ଗନାଇ ସହ ମଧ୍ୟ ଯୋଗାଯୋଗରେ ଥିବା ଅଭିଯୋଗ ହୋଇଛି। 

ଦିନେଶ ଓରଫ ଡବ୍ବୁ ନାମକ ଆଉ ଜଣେ ବ୍ୟକ୍ତିଙ୍କୁ ହରିୟାଣାରେ ବେଆଇନ ଭାବରେ ସାର ବିକ୍ରୟ କରିବା ଅଭିଯୋଗରେ ଅଟକ ରଖାଯାଇଛି। ସେ ଆତଙ୍କୀ ମୋଡ୍ୟୁଲ ସଦସ୍ୟମାନଙ୍କୁ ସାର ବିକ୍ରି କରିଥିବା ସନ୍ଦେହ କରାଯାଉଛି। ଯାହାର ପୋଲିସ ଯାଞ୍ଚ କରୁଛି।
ପୋଲିସ ୱାଜିରପୁର ଶିଳ୍ପାଞ୍ଚଳର ଜଣେ ଚା ଦୋକାନୀଙ୍କୁ ମଧ୍ୟ ପଚରାଉଚରା କରିଛି। ଯେଉଁଠାରେ ବିସ୍ଫୋରଣ ପୂର୍ବରୁ ଉମର କିଛି ସମୟ ପାଇଁ ଅଟକିଥିଲା। ସିସି ଟିଭି ଫୁଟେଜରେ ସେ କିଛି ମିନିଟ୍ ପାଇଁ ଷ୍ଟଲରେ ବସିଥିବାର ଦେଖାଯାଇଥିଲା।

ଫରିଦାବାଦ ପୋଲିସ କହିଛି ଯେ ଜିଲ୍ଲା ବ୍ୟାପୀ ଯାଞ୍ଚ କରିବା ସହ ଜମ୍ମୁ ଓ କାଶ୍ମୀରର ପ୍ରାୟ ୧୪୦ଟି ମସଜିଦ, ୧୭୦୦ ଭଡାଟିଆ, ୪୦ଟି ସାର ଏବଂ ବିହନ ଦୋକାନ, ୨୦୦ଟି ଗେଷ୍ଟହାଉସ୍ ଏବଂ ୫୦୦ରୁ ଅଧିକ ଲୋକଙ୍କୁ ଯାଞ୍ଚ କରାଯାଉଛି।