Lawyer creates ruckus in Chief Justice’s court: ପ୍ରଧାନ ବିଚାରପତିଙ୍କ କୋର୍ଟରେ ଓକିଲଙ୍କ ହଙ୍ଗାମା, ଜୋତା ଫିଙ୍ଗିବାକୁ ଉଦ୍ୟମ

ଜଣେ ଓକିଲ ସୁପ୍ରିମକୋର୍ଟର ମୁଖ୍ୟ ବିଚାରପତି ଜଷ୍ଟିସ ବି.ଆର. ଗଭାଇଙ୍କ ଡାଏସ୍ ନିକଟକୁ ଆସି ଜୋତା କାଢ଼ି ତାଙ୍କ ଉପରକୁ ଫିଙ୍ଗିବାକୁ ଚେଷ୍ଟା କରିଥିଲେ। କିନ୍ତୁ କୋର୍ଟରେ ଉପସ୍ଥିତ ସୁରକ୍ଷା ବାହିନୀ ଓକିଲଙ୍କୁ କାବୁ କରି ବାହାରକୁ ନେଇଯାଇଥିଲେ।

ଗଣମାଧ୍ୟମର ରିପୋର୍ଟ ଅନୁଯାୟୀ, ସୋମବାର ଦିନ ଜଣେ ଓକିଲ ସୁପ୍ରିମକୋର୍ଟର ମୁଖ୍ୟ ବିଚାରପତି (CJI) ଜଷ୍ଟିସ ବି.ଆର. ଗଭାଇଙ୍କ କୋର୍ଟରେ ହଙ୍ଗାମା କରିଥିଲେ। ସେ ଚିତ୍କାର କରି ମୁଖ୍ୟ ବିଚାରପତିଙ୍କ ଉପରକୁ ଜୋତା ଫିଙ୍ଗିବାକୁ ଚେଷ୍ଟା କରିଥିଲେ। ପୋଲିସ ଏହି ଘଟଣାରେ ସମ୍ପୃକ୍ତ ଓକିଲଙ୍କୁ ଅଟକ ରଖିଛି।  

ଏହି ଘଟଣା ପରେ ଜଷ୍ଟିସ ଗଭାଇ ଶାନ୍ତ ରହି ମାମଲାର ଶୁଣାଣି ଜାରି ରଖିଥିଲେ । ଏହା କିଛି ପ୍ରଭାବ ପକାଇବ ନାହିଁ ବୋଲି ଜଷ୍ଟିସ ଗଭାଇ କହିଥିଲେ ।  ପୋଲିସ ଓକିଲଙ୍କୁ କୋର୍ଟରୁମରୁ ବାହାରକୁ ନେଇଯିବା ସମୟରେ ସେ ସନାତନ ଧର୍ମ ସହିତ ଜଡିତ ସ୍ଲୋଗାନ ଦେଇଥିଲେ ।

 ସେ ଯାଉଥିବା ସମୟରେ ସେ ଚିତ୍କାର କରି କହିଥିଲେ, ‘ଆମେ ସନାତନ ଧର୍ମର ଅପମାନକୁ ସହ୍ୟ କରିବୁ ନାହିଁ’। ଅଭିଯୁକ୍ତ ଓକିଲଙ୍କୁ ସୁରକ୍ଷା ବାହିନୀ ହେପାଜତକୁ ନେଇଛି। ଅଭିଯୁକ୍ତ ଓକିଲଙ୍କ ନାମ ରାକେଶ କିଶୋର ବୋଲି କୁହାଯାଉଛି।

ଭଗବାନ ବିଷ୍ଣୁଙ୍କ ଉପରେ ସିଜେଆଇଙ୍କ ମନ୍ତବ୍ୟରେ ଓକିଲ ବିରକ୍ତ ହୋଇଥିବା ଅନୁମାନ କରାଯାଉଛି। ସେପ୍ଟେମ୍ବର ମାସରେ ଭଗବାନ ବିଷ୍ଣୁଙ୍କ ପ୍ରତିମୂର୍ତ୍ତି ପୁନଃନିର୍ମାଣ ସମ୍ପର୍କରେ ତାଙ୍କ ମନ୍ତବ୍ୟର ସୋସିଆଲ ମିଡିଆ ସମାଲୋଚନା ପରେ ଜଷ୍ଟିସ୍ ବି.ଆର. ଗଭାଇ କହିଥିଲେ ଯେ ସେ ସବୁ ଧର୍ମକୁ ସମ୍ମାନ କରନ୍ତି। 

ପ୍ରକୃତରେ ଏକ ମାମଲାର ଶୁଣାଣି ସମୟରେ ସିଜେଆଇ କହିଥିଲେ, ଏହା ସମ୍ପୂର୍ଣ୍ଣ ଭାବରେ ପ୍ରଚାର ପାଇଁ ଦାଖଲ କରାଯାଇଥିବା ଏକ ଆବେଦନ... ଯାଇ ଭଗବାନଙ୍କୁ କିଛି କରିବାକୁ କୁହନ୍ତୁ। ଯଦି ଆପଣ କହୁଛନ୍ତି ଯେ ଆପଣଙ୍କର ଭଗବାନ ବିଷ୍ଣୁଙ୍କ ପ୍ରତି ଗଭୀର ବିଶ୍ୱାସ ଅଛି, ତେବେ ଟିକେ ପ୍ରାର୍ଥନା କରନ୍ତୁ ଏବଂ ଧ୍ୟାନ କରନ୍ତୁ। 

ଭଗବାନ ବିଷ୍ଣୁଙ୍କ ମନ୍ଦିର ସମ୍ପର୍କିତ ଆବେଦନ ଖାରଜ ହୋଇଥିଲା

ସିଜେଆଇଙ୍କ ମନ୍ତବ୍ୟକୁ ସୋସିଆଲ ମିଡିଆ (Social Media)ରେ ବହୁଳ ଭାବରେ ସମାଲୋଚନା କରାଯାଇଥିଲା । ଏହାକୁ ହିନ୍ଦୁ ବିଶ୍ୱାସର ଉପହାସ ବୋଲି ବର୍ଣ୍ଣନା କରାଯାଇଥିଲା। ଏହି ପ୍ରତିକ୍ରିୟା ପରେ, ତାଙ୍କ ବିରୁଦ୍ଧରେ ଅନଲାଇନରେ ମହାଭିଯୋଗ ଦାବି ମଧ୍ୟ ଉଠିଥିଲା। ସମାଲୋଚକମାନେ ତାଙ୍କୁ ଧାର୍ମିକ ଭାବନା ଏବଂ ନ୍ୟାୟପାଳିକାର ମର୍ଯ୍ୟାଦା ପ୍ରତି ଅସମ୍ମାନ କରିଥିବା ଅଭିଯୋଗ କରିଥିଲେ।

ସୁପ୍ରିମକୋର୍ଟ ମଧ୍ୟପ୍ରଦେଶର ଖଜୁରାହୋ ମନ୍ଦିର ପରିସରରେ ଅବସ୍ଥିତ ଜୱାରି ମନ୍ଦିରରେ ଭଗବାନ ବିଷ୍ଣୁଙ୍କ ସାତ ଫୁଟ ଉଚ୍ଚ ମୂର୍ତ୍ତିକୁ ପୁନଃସ୍ଥାପନ କରିବା ପାଇଁ ପ୍ରାର୍ଥନା କରାଯାଇଥିବା ଏକ ଆବେଦନକୁ ଖାରଜ କରିଦେଇଥିଲେ।