Bomb Threat at VP’s Residence: ଉପରାଷ୍ଟ୍ରପତିଙ୍କ ବାସଭବନକୁ ବୋମାରେ ଉଡ଼ାଇ ଦେବାକୁ ଧମକ! ଏହା ପଛରେ କିଏ ଓ କ’ଣ ରହିଛି ଉଦ୍ଦେଶ୍ୟ

ଶୁକ୍ରବାର ଦିନ ଚେନ୍ନାଇରେ ଥିବା ଉପରାଷ୍ଟ୍ରପତି ସିପି ରାଧାକ୍ରିଷ୍ଣନଙ୍କ ବାସଭବନକୁ ବୋମା ମାଡ଼ରେ ଉଡାଇ ଦେବାକୁ ଧମକ (Bomb Threat) ଦିଆଯାଇଛି। ଇମେଲ୍ ମାଧ୍ୟମରେ ଏହି ଧମକ ତାମିଲନାଡୁ ଡିଜିପି ଅଫିସକୁ ଆସିଥିବା ଜଣାପଡ଼ିଛି।
ସୂଚନା ପାଇବା ପରେ, ଏକ ବମ୍ ସ୍କ୍ବାଡ୍ ଏବଂ ପୋଲିସ ଟିମ୍ ଉପରାଷ୍ଟ୍ରପତିଙ୍କ ବାସଭବନକୁ ଯାଇ ପୁଙ୍ଖାନୁପୁଙ୍ଖ ତଲାସୀ କରିଥିଲେ। ଯାଞ୍ଚ ପରେ, ଅଧିକାରୀମାନେ ଜାଣିବାକୁ ପାଇଥିଲେ ଯେ ଏହି ଧମକ ଏକ ମିଥ୍ୟା ଥିଲା। କର୍ତ୍ତୃପକ୍ଷ ଏବେ କିଏ ଓ କାହିଁକି ଇମେଲ ପଠାଇ ଥିଲା, ତାହାର ତଦନ୍ତ କରୁଛନ୍ତି ଏବଂ ଉକ୍ତ ଲୋକଙ୍କୁ ଖୋଜିବା ଆରମ୍ଭ କରୁଛନ୍ତି।
ସେହିପରି ଚେନ୍ନାଇର ଟି ନଗରରେ ଥିବା ପ୍ରସିଦ୍ଧ ସଂଗୀତ ନିର୍ଦ୍ଦେଶକ ଇଲିଆରାଜାଙ୍କ ଷ୍ଟୁଡିଓକୁ ମଧ୍ୟ ବୋମାରେ ଉଡାଇ ଦେବାକୁ ଧମକପୂର୍ଣ୍ଣ ଇମେଲ୍ ମିଳିଥିଲା , ଯାହା ପରେ ସୁରକ୍ଷା ବ୍ୟବସ୍ଥାକୁ ତୁରନ୍ତ କଡାକଡି କରାଯାଇଥିଲା। ତାମିଲନାଡୁ ଡିଜିପି ଅଫିସକୁ ମଧ୍ୟ ପଠାଯାଇଥିବା ଏହି ଇମେଲ୍‌ରେ ଦାବି କରାଯାଇଥିଲା ଯେ ଉକ୍ତ ସ୍ଥାନରେ ଏକ ବମ୍ ରଖାଯାଇଥିଲା।
ପୋଲିସ ଟିମ୍ ବୋମା ଚିହ୍ନଟ ଏବଂ ନିଷ୍କ୍ରିୟକାରୀ ଦଳ (BDDS) ସହିତ, ଇଲିଆରାଜାଙ୍କ ଷ୍ଟୁଡିଓ ଏବଂ ଆଖପାଖ ପରିସରରେ ସନ୍ଧାନ କରିଥିଲେ। କିନ୍ତୁ ସେପରି କୌଣସି ସନ୍ଦେହଜନକ ଜିନିଷ ମିଳିନଥିଲା।
ଗତ ସପ୍ତାହରେ, ଚେନ୍ନାଇ ପୋଲିସକୁ ତାମିଲନାଡୁର ନୀଳାଙ୍ଗରାଇରେ ଥିବା ଅଭିନେତା ତଥା ରାଜନେତା ବିଜୟଙ୍କ ବାସଭବନକୁ ବୋମା ମାଡ କରି ଉଡାଇ ଦେବାକୁ ଧମକପୂର୍ଣ୍ଣ ଫୋନ୍ ଆସିଥିଲା । କନ୍ୟାକୁମାରୀର ଏହି ବ୍ୟକ୍ତି ଜଣକ ଜରୁରୀକାଳୀନ ନମ୍ବର ୧୦୦ କୁ ଡାଏଲ୍ କରି ଧମକ ଦେଇଥିଲେ ଯେ ଯଦି ସେ ଭବିଷ୍ୟତରେ କୌଣସି ସାଧାରଣ ସଭା କରନ୍ତି ତେବେ ବିଜୟଙ୍କ ଘରେ ବୋମା ଖଞ୍ଜାଯିବ। ପରେ ତାହା ଏକ ମିଛ ଧମକ ବୋଲି ଜଣା ପଡିଥିଲା।