Tisya Panigrahi Sets Record: ସମୁଦ୍ର ଚିରି ମାଳଦ୍ବୀପରେ ବଡ଼ ରେକର୍ଡ , ଚମକିଲେ ଓଡ଼ିଆ ଝିଅ

ଅକାତ କାତ ପାଣି । ତା' ଉପରେ ସାମୁଦ୍ରିକ ଜୀବଜନ୍ତୁଙ୍କ ଭୟ । ହେଲେ ସବୁ ପ୍ରତିକୂଳ ପରିସ୍ଥିତିକୁ ଏଡାଇ ଗଭୀର ସମୁଦ୍ରରେ ଡାଇଭିଂ କରୁଥିବା ଏ ହେଲେ- ଓଡ଼ିଆ ଝିଅ ତିସ୍ୟା ପାଣିଗ୍ରାହୀ । ବୟସ ମାତ୍ର ୧୫ ବର୍ଷ । କିନ୍ତୁ ଏତେ କମ୍ ବୟସରୁ ସେ ଯେଉଁ ରେକର୍ଡ କରିଛନ୍ତି, ତାହା ଯିଏ ଶୁଣୁଛି ବାଃ ବାଃ କରୁଛି । ମାଳଦ୍ୱୀପର ୧୦୦ ଫୁଟ ଗଭୀର ସମୁଦ୍ର ମଧ୍ୟରେ ୫୦ତମ ଡାଇଭ୍‌ ପୂରଣ କରିବାର ରେକର୍ଡ କରିଛନ୍ତି ତିସ୍ୟା । ଆଉ ବନିଯାଇଛନ୍ତି ସବୁଠାରୁ କନିଷ୍ଠ ଓଡ଼ିଆ ସ୍କୁବା ଡାଇଭର୍ ।

ମାଳଦ୍ବୀପର 'କାଣ୍ଡୁମା ଥିଲା' ଡାଇଭ୍ ସ୍ଥଳରେ ତିସ୍ୟା ନିଜର ୫୦ତମ ଡାଇଭ୍ ପୂରା କରିଛନ୍ତି । ପ୍ରଖର ସ୍ରୋତ, ଗଭୀର ଜଳରାଶି ଓ ସୁଦୃଶ୍ୟ ଜଳଜୀବଙ୍କ ଆଡ୍ଡାସ୍ଥଳୀ 'କାଣ୍ଡୁମା ଥିଲା' ମାଳଦ୍ବୀପର ଗୋଟିଏ ଜଣାଶୁଣା ଏବଂ ରୋମାଞ୍ଚକର ଡାଇଭ ସାଇଟ୍ । ତାଲିମ ଦୃଷ୍ଟିରୁ ଅତ୍ୟନ୍ତ କଠିନ ଏହି ସ୍ଥାନରେ ୧୦୦ ଫୁଟ ଗଭୀର ସମୁଦ୍ର ମଧ୍ୟରେ ସ୍କୁବା ଡାଇଭିଂ କରିଥିଲେ ତିସ୍ୟା । ଦକ୍ଷିଣ ଆଫ୍ରିକାର ସ୍କୁବା ଡାଇଭିଂ ଇନଷ୍ଟ୍ରକଟର ଲୁକାଙ୍କର ନିରୀକ୍ଷଣରେ ଏହି ଡାଇଭ୍‌ ହୋଇଥିଲା । ଏଥିରେ ତିସ୍ୟାଙ୍କ ବାପା ତଥା ଆଡଭାନ୍ସଡ ସ୍କୁବା ଡାଇଭର ପ୍ରିୟଦର୍ଶୀ ପାଣିଗ୍ରାହୀ ସାଥ୍ ଦେଇଥିଲେ । ଡାଇଭିଂ ବେଳେ ପ୍ରଖର ସ୍ରୋତରୁ ସୁରକ୍ଷିତ ରହିବା ପାଇଁ ଉଭୟ ପ୍ରବାଳ ପ୍ରାଚୀରର ଗୋଟିଏ ଅଂଶରେ ହୁକ୍ ବ୍ୟବହାର କରିଥିଲେ । ତେବେ ଅଥଳ ଜଳରାଶିରେ ଡାଇଭିଂ ବେଳେ ସାର୍କ ଓ ଅନ୍ୟାନ୍ୟ ବିଶାଳ ସାମୁଦ୍ରିକଜୀବଙ୍କ ସଂସ୍ପର୍ଶରେ ଆସିବା ଦୁହିଁଙ୍କ ପାଇଁ ଯେତିକି କୌତୁହଳ ଥିଲା ସେତିକି ରୋମାଞ୍ଚଭରା ଥିଲା ବୋଲି କହିଛନ୍ତି ତାଙ୍କର ବାପା । 

୨୦୧୦ରେ ଓଡ଼ିଶାର ସମ୍ବଲପୁରରେ ତିସ୍ୟାଙ୍କ ଜନ୍ମ । ହେଲେ ଗତ ୧୩ ବର୍ଷ ହେଲା ସେ ଦୁବାଇରେ ରହିଆସୁଛନ୍ତି । ମାତ୍ର ୧୦ ବର୍ଷ ବୟସରୁ ସେ ସ୍କୁବା ଡାଇଭିଂ ଆରମ୍ଭ କରିଥିଲେ । ତିସ୍ୟା ଏବେ ଓଡ଼ିଶାର ସର୍ବକନିଷ୍ଠ ସ୍କୁବା ଡାଇଭର, ସର୍ବକନିଷ୍ଠ ଆଡଭାନସଡ ସ୍କୁବା ଡାଇଭର ଓ ସମୁଦ୍ରର ୧୦୦ ଫୁଟ୍ ଗଭୀର ଜଳରାଶିରେ ୫୦ତମ ଡାଇଭିଂ କରିବାର ସର୍ବକନିଷ୍ଠ ଓଡ଼ିଆ ସ୍କୁବା ଡାଇଭର ହେବାର ରେକର୍ଡ ହାସଲ କରିଛନ୍ତି ।

ସ୍କୁବା ଡାଇଭିଂରେ ସଫଳତା ବ୍ୟତୀତ ତିସ୍ୟା ସମୁଦ୍ର ସୁରକ୍ଷା ଓ ସଚେତନତା ପ୍ରଚାର ପାଇଁ ନିଜ ମଞ୍ଚକୁ ବ୍ୟବହାର କରୁଛନ୍ତି । ସେ ଅଣ୍ଡରୱାଟର୍‌ କ୍ଲିନ୍‌-ଅପ୍‌ରେ ଯୋଗ ଦେଉଛନ୍ତି । ବିଭିନ୍ନ ଡାଇଭିଂ ମ୍ୟାଗାଜିନରେ ଲେଖିବା ସହ ଯୁବପିଢିକୁ ସମୁଦ୍ର ସୁରକ୍ଷାରେ ସାମିଲ ହେବାକୁ ପ୍ରୋତ୍ସାହିତ କରୁଛନ୍ତି। ଏତେ କମ୍ ବୟସରୁ ତିସ୍ୟାଙ୍କ ଏପରି ସଫଳତା ସମସ୍ତଙ୍କ ପାଇଁ ପ୍ରେରଣା...