Son Killed Father: ମୋବାଇଲ ପାଇଁ ବାପାକୁ ହାଣିଦେଲା ପୁଅ , କ୍ଷେତରେ ପୋତିଲା ବେଳେ ପଡ଼ିଗଲା ଧରା

ବାପାକୁ ହାଣି ମାରିଦେଲା ପରେ ଶାନ୍ତ ହୋଇ ବସିଛି ପିତୃହନ୍ତା ପୁଅ । ସ୍ବାମୀକୁ ହରାଇ ମା’ ମୁଣ୍ଡରେ ହାତ ଦେଇ କାନ୍ଦୁଛି । ମଙ୍ଗବାର ରାତିରେ ଅତି ନିର୍ମମ ଭାବେ ବାପାକୁ ଟାଙ୍ଗିଆରେ ହାଣି ହତ୍ୟା କରିଛି ପୁଅ । ସାମାନ୍ୟ ମୋବାଇଲ୍ ଫୋନ କିଣିବାକୁ ବାପା ଟଙ୍କା ନଦେବାରୁ ୨୦ ବର୍ଷିୟ ପୁଅ ଉଦୟ କାଡ୍ରାକା ଏପରି କାଣ୍ଡ ଭିଆଇଛି । ଆଉ ହତ୍ୟା କରିବା ପରେ ବାପାର ଶବକୁ ଟାଣିଟାଣି ନେଇ ପାଖ ସୂର୍ଯ୍ୟମୁଖୀ କ୍ଷେତରେ ପୋତିବା ବେଳେ ଧରାପଡ଼ିଛି । 

ରାୟଗଡା ଜିଲ୍ଲା ଚାନ୍ଦିଲି ଥାନା ଅଧିନ ଲାଲିବି ଗାଁରେ ଏହି ଘଟଣା ଘଟିଛି । ପୁଅ ମୋବାଇଲ୍ କିଣିବାକୁ ବାପାକୁ ଟଙ୍କା ମାଗିଥିଲା । ବାପା ଟଙ୍କା ନଦେବାରୁ ଉଭୟଙ୍କ ମଧ୍ୟରେ ବଚସା ହୋଇଥିଲା । ପରେ ଶୋଇବା ଅବସ୍ଥାରେ ୪୫ ବର୍ଷିୟ ବାପା ଭୀମା କାଡ୍ରାକାଙ୍କୁ ପୁଅ ଉଦୟ ହାଣି ହତ୍ୟା କରିଛି ।

ମୃତ ଭୀମାଙ୍କ ଶରୀରରେ ମୋଟ ୭ଟି କ୍ଷତ ଚିହ୍ନ ଥିବା ପୋଲିସ କହିଛି । ସେପଟେ ଭୀମାଙ୍କ ପତ୍ନୀ ଚମ୍ପା ଲାଲିବି ଗାଁରେ ଥିବା ଘରୁ ନିଜ କୁଡିଆକୁ ଯାଇ ଦେଖିଲା ବେଳକୁ ଚାରିଆଡ଼େ ରକ୍ତ ଛିଟା ପଡ଼ିଥିଲା । ଆଉ ସ୍ବାମୀଙ୍କୁ ପାଇନଥିଲେ, ପରେ ଏନେଇ ପୋଲିସକୁ ଖବର ଦେବାପରେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଚଳାଇଛି ।