Amazon Lays Off: ପୁଣି ବଡ ଧରଣର ଛଟେଇ, ବାହାରିଲେ ୧୪ ହଜାର କର୍ମଚାରୀ...ଗୋଟିଏ ମେସେଜରେ ଚାକିରି ଗଲା

ପୁଣି ବଡ ଧରଣର ଛଟେଇ । ବାହାରିଲେ ୧୪ ହଜାର କର୍ମଚାରୀ । ଗୋଟିଏ ମେସେଜରେ, ଚାକିରି ଗଲା ।  ଏ ବର୍ଷ ଆଇଟି କର୍ମଚାରୀଙ୍କ ଉପରେ ଯେମିତି ଛଟେଇର ଚଡକ ପଡିଛି । ଗୋଟିଏ ପରେ ଗୋଟିଏ ଟେକ୍‌ କମ୍ପାନୀ ହଜାର ହଜାର କର୍ମଚାରୀଙ୍କୁ ବିଦା କରିବାରେ ଲାଗିଛନ୍ତି । ପୂର୍ବରୁ ଇନଫୋସିସ୍‌, ଟିସିଏସ୍‌, ଆକ୍ସେଞ୍ଚର ପରେ ଆଉ ଗୋଟିଏ ବଡ କମ୍ପାନୀରେ ଛଟେଇ ନେଇ ବଢିଛି ଚିନ୍ତା । ୧୪ ହଜାର କର୍ମଚାରୀଙ୍କୁ ବିଦା କରିଛି ଟେକ୍‌ ଜିଆଣ୍ଟ ଆମାଜନ ।

ସକାଳୁ ଆମାଜନ କର୍ମଚାରୀମାନଙ୍କୁ ମେସେଜ ଗଲା । ‘ଅଫିସ୍‌ ଆସିବା ପୂର୍ବରୁ ନିଜ ଇମେଲ୍‌ ଚେକ୍‌ କର । ଇମେଲ୍ ମିଳିନଥିଲେ ହେଲ୍ପ ଡେସ୍କ ନମ୍ବରକୁ ଫୋନ୍ କର’ । ଆଉ ଏହି ଇମେଲ୍‌ ପଢିବା ପରେ ଛାନିଆ ହୋଇଯାଇଥିଲେ କର୍ମଚାରୀ । ‘ୟୁ ଆର୍‌ ଫାୟାର୍ଡ’ ଲେଖି ବିଦା କରିଦେଇଥିଲା କମ୍ପାନୀ ।  କିଛି ରିପୋର୍ଟରେ କୁହାଯାଉଛି, ଆମାଜନ ଆହୁରି କର୍ମଚାରୀ ଛଟେଇ କରିବ ।  ଅତିକମରେ ୩୦ ହଜାର କର୍ମଚାରୀଙ୍କୁ ବିଦା କରିପାରେ । ଆମାଜନ ଇତିହାସର ଏହା ସବୁଠୁ ବଡ ଛଟେଇ ହେବ । ସୂତ୍ର ଅନୁସାରେ, କମ୍ପାନୀ କୋଭିଡ ବେଳେ ଅନେକଗୁଡିଏ କର୍ମଚାରୀ ନିଯୁକ୍ତ କରିଥିଲା, ଆଉ ଏବେ ଦରମା ଦେଇ ନପାରିବାରୁ ବାହାର କରୁଛି । ଛଟେଇର ବଡ କାରଣ AI ବୋଲି ବି କୁହାଯାଉଛି । ତେବେ ବାହାର କରାଯାଉଥିବା କର୍ମଚାରୀଙ୍କୁ ୯୦ ଦିନର ଦରମା ଦିଆଯିବ ବୋଲି କହିଛନ୍ତି ଆମାଜନ HR ହେଡ୍ । 

ଗତ ଜୁନ୍‌ରେ ଆମାଜନ ସିଇଓ ଏଣ୍ଡି ଜେସି କହିଥିଲେ, ଦ୍ରୁତଗତିରେ ଏଆଇର ବ୍ୟବହାର ବଢୁଛି । ଏଥିରେ ଲୋକଙ୍କ ଚାକିରି ଯିବାର ଆଶଙ୍କା ରହିଛି । ରୁଟିନ୍ ଟାସ୍କ ଆଧାରିତ କର୍ମଚାରୀଙ୍କ ଛଟେଇ ହୋଇପାରେ । ଏମାନଙ୍କୁ ୯୦ ଦିନର ସେଭରାନ୍ସ ପ୍ୟାକେଜ ଦେଇ ବାହାର କରାଯିବ ।

୨୦୨୫ ଆରମ୍ଭରୁ ଏ ପର୍ଯ୍ୟନ୍ତ ଭାରତର ଗ୍ଲୋବାଲ ଟେକ୍ନୋଲୋଜି ସେକ୍ଟରରେ ଲକ୍ଷେ ୧୨ ହଜାର ଛଟେଇ ହୋଇସାରିଛି । କେବଳ ଟିସିଏସ୍ ୧୨ ହଜାର ଛଟେଇ ଘୋଷଣା କରିଥିଲା । ପରେ ଇନଫୋସିସ୍, ମାଇକ୍ରୋସଫ୍ଟ, ଆକ୍ସେଞ୍ଚର ଭଳି ବଡ ବଡ କମ୍ପାନୀ ବି ଏହି ଲିଷ୍ଟରେ ସାମିଲ୍ ହୋଇଥିଲେ । ଆଇଟି ଇଣ୍ଡଷ୍ଟ୍ରୀ ଏମିତି ଛଟେଇକୁ ନେଇ ଏବେ ଚିନ୍ତାରେ ଲକ୍ଷ ଲକ୍ଷ କର୍ମଚାରୀ ।