Turkey Plane Crash: ବିମାନ ଦୁର୍ଘଟଣା; ୪ ସୈନ୍ୟ ଅଧିକାରୀଙ୍କ ସହ ଆର୍ମି ଚିଫ୍ ମୃତ

ବଡ ଧରଣର ବିମାନ ଦୁର୍ଘଟଣା ଘଟିଛି। ଦୁର୍ଘଟଣାରେ ଲିବ୍ୟାର ସେନାମୁଖ୍ୟ (ଆର୍ମି ଚିଫ୍) ଙ୍କ ମୃତ୍ୟୁ ଘଟିଛି। ମଙ୍ଗଳବାର ଦିନ ତୁର୍କୀର ରାଜଧାନୀ ଅଙ୍କାରାରୁ ଲିବିୟାର ସାମରିକ ମୁଖ୍ୟ, ଚାରି ଜଣ ଉଚ୍ଚପଦସ୍ଥ ଲିବିଆନ ସାମରିକ ଅଧିକାରୀ ଏବଂ ତିନି ଜଣ କ୍ରୁ ସଦସ୍ୟଙ୍କୁ ନେଇ ଆସୁଥିବା ଏକ ଘରୋଇ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଯେଉଁଥିରେ ବିମାନରେ ଥିବା ସମସ୍ତ ସାତ ଜଣଙ୍କର ମୃତ୍ୟୁ ହୋଇଥିଲା। 

ଲିବ୍ୟା ସେନାମୁଖ୍ୟ ମହମ୍ମଦ ଅଲି ଅହମ୍ମଦ ଅଲ-ହଦ୍ଦାଦଙ୍କୁ ନେଇ ଯାଉଥିବା ବିମାନ ତୁର୍କୀର ରାଜଧାନୀ ଆଙ୍କାରା ନିକଟରେ ଏକ ଦୁର୍ଘଟଣାଗ୍ରସ୍ତ ହୋଇଥିଲା। ସେ ଯେଉଁ ଘରୋଇ ଜେଟ୍ ଯୋଗେ ଯାତ୍ରା କରୁଥିଲେ ତାହା ସେଠାକାର ଏକ ବିମାନବନ୍ଦରରୁ ଉଡ଼ାଣ ଭରିବାର କିଛି ସମୟ ପରେ ହିଁ ଦୁର୍ଘଟଣାଗ୍ରସ୍ତ ହୋଇଥିଲା। 

ମହମ୍ମଦ ଅଲି ଅହମ୍ମଦ ଅଲ-ହଦ୍ଦାଦଙ୍କ ବ୍ୟତୀତ ନିହତ ଅନ୍ୟ ଚାରି ଜଣ ଅଧିକାରୀ ହେଲେ ଲିବିୟାର ସ୍ଥଳସେନାର ମୁଖ୍ୟ ଜେନେରାଲ ଅଲ-ଫିତୋରି ଘରାଇବିଲ, ସାମରିକ ମାନୁଫାକ୍ଚରିଂ ଅଥରିଟିର ନେତୃତ୍ୱ ନେଉଥିବା ବ୍ରିଗେଡିୟର ଜେନେରାଲ ମହମୁଦ ଅଲ-କତାୱି, ପରାମର୍ଶଦାତା ମହମ୍ମଦ ଅଲ-ଆସାୱି ଦିଆବ ଏବଂ ଜଣେ ସାମରିକ ଫଟୋଗ୍ରାଫର ମହମ୍ମଦ ଓମାର ଅହମ୍ମଦ ମହଜୋବ। ତିନି କ୍ରୁ ସଦସ୍ୟଙ୍କ ପରିଚୟ ମିଳିନାହିଁ।

ଲିବିଆ ପ୍ରଧାନମନ୍ତ୍ରୀ ଅବଦୁଲ-ହାମିଦ ଦବେବାହ ଏକ ଫେସବୁକ ବିବୃତ୍ତିରେ ଜେନେରାଲ ମହମ୍ମଦ ଅଲି ଅହମଦ ଅଲ-ହଦ୍ଦାଦଙ୍କ ମୃତ୍ୟୁକୁ ନିଶ୍ଚିତ କରି ଦୁର୍ଘଟଣାକୁ ଏକ "ଦୁଃଖଦ ଦୁର୍ଘଟଣା" ଏବଂ ଦେଶ ପାଇଁ ଏକ "ମହାନ କ୍ଷତି" ବୋଲି କହିଛନ୍ତି। ଲିବିୟାର ଅଧିକାରୀମାନେ କହିଛନ୍ତି ଯେ ଯାନ୍ତ୍ରିକ ତ୍ରୁଟି ଯୋଗୁଁ ବିମାନଟି ଖସି ପଡ଼ିଥିଲା। ବିମାନ ଉଡ଼ାଣ ଆରମ୍ଭ ହେବାର ପ୍ରାୟ ୪୦ ମିନିଟ୍ ପରେ ବିମାନ ସହିତ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା।

ସେନା ମୁଖ୍ୟଙ୍କ ବିୟୋଗରେ ସାରା ଦେଶରେ ତିନି ଦିନ ପାଇଁ ସରକାରୀ ଶୋକ ଘୋଷଣା କରିଛନ୍ତି ସରକାର। ସମସ୍ତ ରାଷ୍ଟ୍ରାୟତ୍ତ ପ୍ରତିଷ୍ଠାନ ପତାକା ଅର୍ଦ୍ଧନମିତ ରହିବ। ସରକାରୀ ଉତ୍ସବ ଏବଂ ଉତ୍ସବ ସ୍ଥଗିତ ରହିବ।