Triple Salary for Legislators: ହଜମ ହେଉନି ବିଧାୟକଙ୍କ ଦରମା ବୃଦ୍ଧି, ଏକାଥରେ ୩ ଗୁଣା ଦରମା ଦେଖି ତାତିଲେ ଜନତା

କିଏ କହୁଛି ୩ ଗୁଣା ନକରି ୧୦ ଗୁଣା କରନ୍ତୁ ତ ଆଉ କିଏ କଡ଼ା ଭାଷାରେ ନିନ୍ଦା କରୁଛି । ବିଧାୟକଙ୍କ ବର୍ଦ୍ଧିତ ଦରମାକୁ ନେଇ ସାରା ରାଜ୍ୟରେ ଚର୍ଚ୍ଚା, ସବୁଠି ଅସନ୍ତୋଷ । ବୁଦ୍ଧିଜୀବୀ ମହଲ ହେଉକି ସାଧାରଣା ଜନତା, ସମସ୍ତେ ଖପ୍ପା । 'ଏମାନଙ୍କୁ ଯେତେ ମିଳିଲେ ସେତେ ନିଅଣ୍ଟ । ଦିବ୍ୟାଙ୍ଗ, ବାର୍ଦ୍ଧକ୍ୟ ଭତ୍ତା ବୃଦ୍ଧି ପାଇଁ ଟଙ୍କା ନାହିଁ, ହେଲେ ନିଜ ଦରମା ବଢାଇବାକୁ ଟଙ୍କା ଅଛି । ଗରିବ ଅବହେଳିତମାନଙ୍କ ପ୍ରତି ଏହା ଉପହାସ' ବୋଲି କହୁଛନ୍ତି ଲୋକେ ।

ବୋଝ ରାଜକୋଷ ଉପରେ

ଛକ ବଜାରରୁ ନେଇ ଚା' ଖଟି ସବୁଠି ଚର୍ଚ୍ଚାର ପ୍ରମୁଖ ମୁବ୍ଦା ସାଜିଛି ବିଧାୟକଙ୍କ ଦରମା ବୃଦ୍ଧି । ୮ ବର୍ଷ ହେଲାଣି ବଢିନଥିଲା, ହେଲେ ଏମିତି ବଢିଲା ଯେ ସାରା ଦେଶରେ ନମ୍ବର ୧ । ପଛରେ ପଡିଲା ୟୁପି, ମହାରାଷ୍ଟ୍ର । ୩ ଗୁଣା ଦରମା ବୃଦ୍ଧି ପରେ ଓଡ଼ିଶା ବିଧାୟକଙ୍କ ଦରମା ବର୍ତ୍ତମାନ ସବୁ ରାଜ୍ୟଠୁ ଅଧିକ । ଯାହାକୁ ସହଜରେ ଗ୍ରହଣ କରିପାରୁନାହାନ୍ତି ଓଡ଼ିଶାବାସୀ । ଏହାର ବୋଝ ରାଜକୋଷ ଉପରେ ପଡିବ । ଏହା ଏକ ଜନପ୍ରିୟ ସରକାରଙ୍କ ପାଇଁ ଉଚିତ୍‌ ପଦକ୍ଷେପ ନୁହେଁ ବୋଲି କହୁଛନ୍ତି ।

ଏତେ ଟେଲିଫୋନ ଭତ୍ତା କାହିଁକି ?

ସେହିପରି ବଢିଥିବା ଦରମାକୁ ନେଇ ଯେତେ ଆଲୋଚନା ହେଉଛି, ତା ଠାରୁ ଅଧିକ ଚର୍ଚ୍ଚା ଭତ୍ତାକୁ ନେଇ। ବର୍ଦ୍ଧିତ ଦରମା ସହ ବିଧାୟକଙ୍କୁ ମିଳିବ ୨୦ ହଜାରର ବିଜୁଳି, ୧୫ ହଜାରର ଟେଲିଫୋନ, ୧୦ ହଜାରର ବହି, ୩୫ ହଜାରର ମେଡିକାଲ ଓ ୫୦ ହଜାରର ଗସ୍ତ ଖର୍ଚ୍ଚ । ବର୍ଷକୁ ୪ରୁ ୬ ହଜାର ଟଙ୍କାରେ ରିଚାର୍ଜ କଲେ ମିଳୁଛି ଅନଲିମିଟେଡ କଲ୍ ସହ ଅନଲିମିଟେଡ ଡାଟା । ହେଲେ ଟେଲିଫୋନ ଭତ୍ତା ୫ ହଜାରରୁ ବଢାଇ କାହିଁକି ୧୫ ହଜାର କରାଗଲା ବୋଲି ପ୍ରଶ୍ନ କରୁଛନ୍ତି ରାଜ୍ୟବାସୀ । 

ପ୍ରାଥମିକ ଶିକ୍ଷକ ସଂଘ, ପାଚିକା ସଂଘ ରାଜଧାନୀରେ ଆନ୍ଦୋଳନ କରୁଥିବାବେଳେ ବିଧାୟକଙ୍କ ୩ ଗୁଣା ଦରମା ବଢିବାକୁ ନେଇ ସାରା ରାଜ୍ୟରେ ନାପସନ୍ଦ କରାଯାଉଛି । ବିଜୁଳି, ଟେଲିଫୋନ ଆଉ ବହି କିଣା ବାବଦ ଭତ୍ତା ତିନିରୁ ପାଞ୍ଚଗୁଣା ବଢିବା, କେତେ ଯୁକ୍ତିଯୁକ୍ତ ବୋଲି ପ୍ରଶ୍ନ ଉଠୁଛି । ଏନେଇ ଆପଣଙ୍କ ମତାମତ କ’ଣ ଜଣାଇପାରିବେ... ।