Bangladesh Election: ବାଂଲାଦେଶରେ ଐତିହାସିକ ନିର୍ବାଚନ; ଜମ୍ମାତ୍-ବିଏନପି କଡା ଟକ୍କର

ବାଂଲାଦେଶରେ ହସିନା ସରକାରଙ୍କ ପତନ ପରେ ପ୍ରଥମ ଥର ପାଇଁ ନିର୍ବାଚନ ହେଉଛି। ନେତା ବାଛିବା ପାଇଁ ଭୋଟ ଦେଉଛି ବାଂଲାଦେଶ। ବାଂଲାଦେଶରେ ୧୩ତମ ସଂସଦୀୟ ନିର୍ବାଚନ ପାଇଁ ମତଦାନ ଚାଲିଛି। ଏହାକୁ ବାଂଲାଦେଶ ଇତିହାସର ସବୁଠାରୁ ଗୁରୁତ୍ୱପୂର୍ଣ୍ଣ ନିର୍ବାଚନ ବୋଲି ବିବେଚନା କରାଯାଉଛି। ୨୦୨୪ ମସିହାର ଜୁଲାଇ-ଅଗଷ୍ଟରେ ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହାସିନାଙ୍କ ବିରୋଧରେ ଛାତ୍ର ନେତୃତ୍ୱାଧୀନ ଗଣ ଆନ୍ଦୋଳନ ପରେ ଏହା ପ୍ରଥମ ସାଧାରଣ ନିର୍ବାଚନ। ଏହି ଛାତ୍ର ଆନ୍ଦୋଳନ ଶେଖ୍ ହାସିନାଙ୍କ ସରକାରକୁ ଗାଦିଚ୍ୟୁତ କରିଥିଲା, ଯାହା ତାଙ୍କୁ ଭାରତରେ ଆଶ୍ରୟ ନେବାକୁ ବାଧ୍ୟ କରିଥିଲା।

ବାଂଲାଦେଶୀ ଅଧିକାରୀଙ୍କ ଅନୁଯାୟୀ, ସ୍ଥାନୀୟ ସମୟ ସକାଳ ୭:୩୦ ରେ ମତଦାନ ଆରମ୍ଭ ହୋଇଛି ଏବଂ ସନ୍ଧ୍ୟା ୪:୩୦ ପର୍ଯ୍ୟନ୍ତ ଚାଲିବ। କିଛି ଅଞ୍ଚଳରେ, ମତଦାନ ସନ୍ଧ୍ୟା ୫:୩୦ କିମ୍ବା ୬:୩୦ ପର୍ଯ୍ୟନ୍ତ ଚାଲିପାରେ। ଭୋଟ ଗଣତି ସନ୍ଧ୍ୟା ୫:୦୦ ରେ ଆରମ୍ଭ ହେବ। ସୁରକ୍ଷା ଅତ୍ୟନ୍ତ କଡ଼ାକଡ଼ି। ଅଧାରୁ ଅଧିକ ମତଦାନ କେନ୍ଦ୍ରକୁ ଅତ୍ୟନ୍ତ ସମ୍ବେଦନଶୀଳ ଭାବରେ ବର୍ଗୀକୃତ କରାଯାଇଛି। ମତଦାନ କେନ୍ଦ୍ରଗୁଡ଼ିକ ସିସିଟିଭି ଦ୍ୱାରା ତଦାରଖ କରାଯାଉଛି। 
ବାଂଲାଦେଶର ନିର୍ବାଚନ କମିଶନଙ୍କ ଅନୁଯାୟୀ, ପ୍ରାୟ ୧୨୭.୭ ନିୟୁତ ପଞ୍ଜୀକୃତ ଭୋଟର ୨୯୯ ସଂସଦୀୟ ଆସନ ପାଇଁ ଭୋଟ ଦେଉଛନ୍ତି। ସାମ୍ବିଧାନିକ, ନିର୍ବାଚନୀ ଏବଂ ସାଂଗଠନିକ ସଂସ୍କାରର ୮୪-ସୂତ୍ରୀ ପ୍ୟାକେଜ୍ ଉପରେ ମତାମତ ଲୋଡ଼ି ଏକ ଜାତୀୟ ଜନମତ ମଧ୍ୟ ଚାଲିଛି। 

ପ୍ରଥମ ଥର ପାଇଁ, ଏହି ନିର୍ବାଚନ ହାସିନାଙ୍କ ପାର୍ଟି ଆୱାମୀ ଲିଗ୍ ଦଳ ବିନା ଅନୁଷ୍ଠିତ ହେଉଛି। ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କୁ ଆନ୍ଦୋଳନ ଦମନ କରିବା ପାଇଁ ଦୋଷୀ ସାବ୍ୟସ୍ତ କରାଯାଇ ମୃତ୍ୟୁଦଣ୍ଡ ଦିଆଯିବା ପରେ, ତାଙ୍କ ଆୱାମୀ ଲିଗ୍ ଦଳକୁ ମଧ୍ୟ ୟୁନୁସ୍ ସରକାର ନିଷିଦ୍ଧ କରିଥିଲା। ମୁଖ୍ୟ ପ୍ରତିଯୋଗିତା ଏବେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP) ଏବଂ ଜମାତ-ଏ-ଇସଲାମି ନେତୃତ୍ୱାଧୀନ ୧୧-ଦଳୀୟ ମେଣ୍ଟ ମଧ୍ୟରେ। BNPର ନେତା ଏବଂ ପୂର୍ବତନ ପ୍ରଧାନମନ୍ତ୍ରୀ ଖାଲେଦା ଜିଆଙ୍କ ପୁଅ ତାରିକ୍ ରହମାନ ୧୭ ବର୍ଷ ନିର୍ବାସନ ପରେ ଢାକା ଫେରିଛନ୍ତି। ତାଙ୍କୁ ପ୍ରଧାନମନ୍ତ୍ରୀ ପଦ ପାଇଁ ସବୁଠାରୁ ଶକ୍ତିଶାଳୀ ଦାବିଦାର ବୋଲି ବିବେଚନା କରାଯାଉଛି।