Domestic Violence: ଶ୍ବଶୁର ପେଟ୍ରୋଲ ଆଣିଲେ, ଶୋଇବା ଘରେ ଢାଳି ଜାଳିଦେଲେ

ବୋହୂର ଅଭିଯୋଗ ଶ୍ବଶୁର ପେଟ୍ରୋଲ ଆଣିଲେ, ଶୋଇବା ଘରେ ଢାଳି ଜାଳିଦେଲେ । ଶାଶୁ ପାଖରେ ଥିଲେ ହେଲେ ପ୍ରତିବାଦ କଲେନି । ସବୁ କିଛି ଜଳିଗଲା କିନ୍ତୁ ସେ ବାହାରକୁ ଆସିବାରୁ ବଞ୍ଚିଗଲେ । ଏଥିଲା ଜଣେ ବୋହୂର ଅଭିଯୋଗ ।

ଆଉ ଶ୍ବଶୁର ଓ ସ୍ବାମୀଙ୍କ କଥା ଶୁଣିଲେ ଆପଣଙ୍କୁ ଆଶ୍ଚର୍ଯ୍ୟ ଲାଗିବ ।  ଶ୍ବଶୁରଙ୍କ କହିବା କଥା ବୋହୂ ସବୁବେଳେ ଶୁଏ । ସଂଧ୍ୟା ୬ଟାରେ ଶୁଏ ରାତି ୧୦ଟାରେ ଉଠେ । ଡାକିଲେ ଶୁଣେନି । ବିଛଣା ଥିଲେ ସିନା ଶୋଇବ । ତେଣୁ ରାଗି ମୁଁ ବିଛଣା ପୋଡ଼ିଦେଲି । ବାପାଙ୍କ ଏହି କଥାକୁ ବି ସମର୍ଥନ ଜଣାଇଛନ୍ତି ପୁଅ ।

ଏ ଘଟଣା ଗତକାଲି ବିଳମ୍ବିତ ରାତିର । କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ଡାମରପୁର ଗାଁରେ ଘଟିଛି । ଶ୍ବଶୁର ପ୍ରଫୁଲ୍ଲ ରାୟ ବୋହୂ ସସ୍ମିତା ଦାସ ଓ ନାତୁଣୀକୁ ପୋଡ଼ି ମାରିଦେବାକୁ ଉଦ୍ୟମ କରିଥିବା ଅଭିଯୋଗ ହୋଇଛି ।

କୁହାଯାଉଛି, ୮ ବର୍ଷ ତଳେ ନିଶ୍ଚିନ୍ତକୋଇଲି ବାଲିପଡ଼ା ଗାଁ ସସ୍ମିତା ଦାସ ପଟ୍ଟାମୁଣ୍ଡାଇ ଡାମରପୁର ଗାଁ ଶୁଶାନ୍ତ ରାୟଙ୍କୁ ବାହା ହୋଇଥିଲେ l ଶୁଶାନ୍ତଙ୍କର ପ୍ରଥମ ପତ୍ନୀଙ୍କ ଦୁଇଟି ଝିଅ ଥିଲା  l ପରେ ଦ୍ଵିତୀୟ ପତ୍ନୀଙ୍କ ଗୋଟିଏ ଝିଅ ହେବାରୁ ତାକୁ ବାରମ୍ବାର ଶାଶୁ, ଶ୍ଵଶୁର, ସ୍ୱାମୀ ଶାରୀରିକ ମାନସିକ ନିର୍ଯାତନା ଦେଉଥିଲେ  l ତେଣୁ  ସସ୍ମିତାଙ୍କୁ ଶ୍ବଶୁର ପୋଡ଼ି ମାରିଦେବାକୁ ଉଦ୍ୟମ କରିଥିବା ସେ ଅଭିଯୋଗ କରିଛନ୍ତି ।

ବ୍ରହ୍ମଚଣ୍ଡାଳ ରାଗ ଏଠି ସବୁ ଜାଳିପୋଡ଼ି ପାଉଁଶ କରିଛି । ଘର ଭିତରେ ଥିବା ସମସ୍ତ ଆସବାପତ୍ର ନଷ୍ଟ ହୋଇଛି । ଆଉ ଅଳ୍ପକେ ବଞ୍ଚିଯାଇଛି ଦୁଇଦୁଇଟି ଅମୁଲ୍ୟ ଜୀବନ । ତେବେ ଏହି ଘଟଣା କାହିଁକି ଘଟିଲା ତା’ ତଦନ୍ତ ହେଲେ ପ୍ରକୃତ ସତ ପଦାକୁ ଆସିବ ।