Pay Upgrade for MLAs: ଏପଟେ ସରକାରୀ କର୍ମଚାରୀଙ୍କ ହରତାଳ, ସେପଟେ ବଢ଼ିବ ବିଧାୟକଙ୍କ ଦରମା

ବଢ଼ିବ ବିଧାୟକଙ୍କ ଦରମା ! ମୋଟା ସାଲାରୀ ନେବେ ମିନିଷ୍ଟର-ଏମଏଲଏ ! ଅଣ୍ଟୁନି ଲକ୍ଷେ ଟଙ୍କା, ଆହୁରି ବଢ଼ାଅ ପାରିଶ୍ରମିକ । ଏପଟେ ଲୋୟର ପିଏମଜିରେ ସରକାରୀ କର୍ମଚାରୀଙ୍କ ହରତାଳ । ଆଉ ସେପଟେ ବିଧାନସଭାରେ ଉଠୁଛି ବିଧାୟକଙ୍କ ଦରମା ବୃଦ୍ଧି ପ୍ରସଙ୍ଗ ।

ମୋଟା ଅଙ୍କର ଦରମା ନେବାକୁ ସବୁ ଦଳର ବିଧାୟକ ଦାବି କରୁଛନ୍ତି । ରାଜରାସ୍ତାରେ ପାଚିକା ଠାରୁ ଆରମ୍ଭ କରି ବିଭିନ୍ନ ବର୍ଗର ଶିକ୍ଷକ ଓ ଆହୁରି କିଛି ସରକାରୀ କର୍ମଚାରୀ ନିଜର ହକ୍ ପାଇଁ ଲଢ଼େଇ କରୁଛନ୍ତି । ଦରମା ବୃଦ୍ଧି ଦାବି ସହ ପୁରୁଣା ପେନସନ୍ କଥା ଉଠାଉଛନ୍ତି । ହେଲେ ଏପରି ସମୟରେ ବିଧାୟକ ଓ ସାଂସଦ ମାନଙ୍କ ଦରମା ବୃଦ୍ଧି ପ୍ରସ୍ତାବ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । 

ଖାଲି ବିଧାୟକ ଓ ମନ୍ତ୍ରୀଙ୍କ ଦରମା ବୃଦ୍ଧି ପ୍ରସଙ୍ଗ ନୁହେଁ, ପୂର୍ବତନ ବିଧାୟକଙ୍କ ପେନସନ ମଧ୍ୟ ବଢ଼ାଯିବାକୁ କୁହାଯାଇଛି । ଏନେଇ ବିଧାନସଭାରେ ଗୁରୁତ୍ୱପୂର୍ଣ୍ଣ ବିଲ ଉପସ୍ଥାପନ କରିଛନ୍ତି ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ । ଏହି ବିଲରେ ବିଧାୟକ, ମନ୍ତ୍ରୀ, ବାଚସ୍ପତି, ଉପବାଚସ୍ପତି ଓ ପୂର୍ବତନ ବିଧାୟକମାନଙ୍କ ଦରମା, ଭତ୍ତା ଓ ପେନସନ ବଢିବାର ବ୍ୟବସ୍ଥା ରହିଛି ।

କେଉଁ ରାଜ୍ୟରେ କେତେ ?

ପୂର୍ବରୁ ଓଡ଼ିଶାର ବିଧାୟକମାନେ ଲକ୍ଷେ ଟଙ୍କା ଦରମା ପାଉଥିଲେ । ଆଉ ଏବେ ପୁଣି ସେମାନଙ୍କ ଦରମା ବୃଦ୍ଧି ପାଇପାରେ । ଓଡ଼ିଶା ତୁଳନାରେ ଅନ୍ୟ ରାଜ୍ୟକୁ ଦେଖିଲେ ପଡ଼ୋଶୀ ପଶ୍ଚିମବଙ୍ଗରେ ୭୫ ହଜାର ଟଙ୍କା ରହିଛି ବିଧାୟକଙ୍କ ମାସିକ ଦରମା । ସେହିପରି ଆସାମରେ ଲକ୍ଷେ ଟଙ୍କା, ଛତିଶଗଡ଼ରେ ଲକ୍ଷେ ୬୦ ହଜାର ଓ ଆନ୍ଧ୍ରରେ ମଧ୍ୟ ଲକ୍ଷେ ୨୫ ହଜାର ଟଙ୍କା ପାଉଛନ୍ତି ବିଧାୟକ ।   

ପ୍ରତି ବର୍ଷ ବିଧାୟକଙ୍କ ଦରମା ବୃଦ୍ଧିକୁ ନେଇ ସବୁ ଦଳର ବିଧାୟକମାନେ ବାରମ୍ବାର ଦାବି କରିଆସିଛନ୍ତି । ବିଜେଡି ସରକାର ସମୟରେ ମଧ୍ୟ ଏହି ଦାବି ହେଉଥିଲା । ହେଲେ ଏହି ବର୍ଷ ବିଧାୟକଙ୍କ ଦରମା ସରକାର ବଢ଼ାଇବାକୁ ଉଦ୍ୟମ ଆରମ୍ଭ କରିଛନ୍ତି।