Odia NEET Aspirant Dead: ଖବର ଆସିଲା ତମ ପୁଅ ଆଉ ନାହିଁ...ଡାକ୍ତର ହୋଇଥାଆନ୍ତା, ଶବ ହୋଇ ଫେରିଛୁ

ପୁଅ ଡାକ୍ତର ହେବ, ନାଁ ରଖିବ । କେତେ ଆଶା, କେତେ ଅସୁମାରୀ ସ୍ୱପ୍ନ ଦେଖିନଥିଲେ ସେ । ପୁଅକୁ ଡାକ୍ତର କରିବାକୁ କୋଟା ପଠାଇଥିଲେ । ହେଲେ ଖବର ଆସିଲା ତମ ପୁଅ ଆଉ ନାହିଁ... । ଗୋଟିଏ ଝଟ୍‌କାରେ ପାଉଁଶ ହୋଇଗଲା ସବୁ ସ୍ୱପ୍ନ । ଭାଙ୍ଗିପଡିଲା ଦୁଃଖର ପାହାଡ । ଡାକ୍ତର କରିବାକୁ ପଠାଇଥିବା ପୁଅକୁ ହରାଇ ଏ ଅସହାୟ ବାପାଟି ଆଜି ଯେମିତି ପାଷାଣ ପାଲଟି ଯାଇଛି । କେମିତି ବା ଧୈର୍ଯ୍ୟ ଧରିବେ

ଯେଉଁ ପୁଅକୁ ପଢିବାକୁ ପଠାଇଥିଲେ, ଆଜି ସେଇ ପୁଅର ଶବ ଆଣିବାକୁ ଯାଉଛନ୍ତି ସେ । ଭଗବାନ ଏମିତି ଦୁଃଖ କାହାକୁ ନ ଦିଅନ୍ତୁ...ରାଜସ୍ଥାନ କୋଟାରେ ରୋସନ ପାତ୍ର ନାମକ ଜଣେ ଓଡ଼ିଆ ଛାତ୍ରଙ୍କ ସନ୍ଦେହଜନକ ମୃତ୍ୟୁ ହୋଇଛି । ମୃତ ଛାତ୍ରଙ୍କ ଘର ଗଂଜାମ ପାତ୍ରପୁର ବ୍ଲକ ଅଭୟପୁର ଗାଁରେ । 

ନିଟ୍ ପରୀକ୍ଷା ପାଇଁ ଗତବର୍ଷଠୁ କୋଟାରେ ରହି କୋଚିଂ ନେଉଥିଲେ ରୋସନ । ଶନିବାର ସକାଳେ କୋଟାରୁ କଲ୍ ଆସିଲା, ତମ ପୁଅ ଦେହ ସିରିୟସ୍ । ଏଠିକୁ ଜଲଦି ଆସ । କିଛି ସମୟ ପରେ ରୋସନଙ୍କ ମୃତ୍ୟୁ ହୋଇଯାଇଥିବା ନେଇ ଘରଲୋକଙ୍କୁ ଫୋନ୍ କରି ଜଣାଇଥିଲେ ସାଙ୍ଗମାନେ । ଏହି ଖବର ପାଇବା ପରେ ରୋସନଙ୍କ ବାପା ଓ କକା କୋଟା ଅଭିମୁଖେ ଯାଇଛନ୍ତି ପୁଅର ମୃତଦେହ ଆଣିବାକୁ । ତେବେ କେମିତି ରୋସନଙ୍କ ମୃତ୍ୟୁ ହେଲା, ହତ୍ୟା, ଆତ୍ମହତ୍ୟା ନା ଦୁର୍ଘଟଣା ତାହା ଏ ଯାଏଁ ସ୍ପଷ୍ଟ ହୋଇନି । 

ପୁଅକୁ ହରାଇ ଭାଙ୍ଗିପଡିଛି ପୂରା ପରିବାର । ଛାତିରେ ପଥର ରଖି ପୁଅର ମୃତଦେହ ଫେରାଇ ଆଣିବାକୁ ରାଜସ୍ଥାନ ଯାଇଛନ୍ତି ବାପା । ସେଠି ପହଞ୍ଚିବା ପରେ ରୋସନଙ୍କ  ମୃତ୍ୟୁର କାରଣ ସ୍ପଷ୍ଟ ହୋଇପାରିବ ବୋଲି କୁହାଯାଉଛି ।