Nuapada Village Bans Liquor: ନିଶା କାରବାର କଲେ ୫୦ ହଜାର ଫାଇନ ସହ ୨୦ ବର୍ଷ ଗାଁରୁ ବାସନ୍ଦ, ନିଷ୍ପତ୍ତି ନେଲେ ଗାଁ ଲୋକେ

ମଦ ପିଇଲେ ୧୦ ହଜାର ଫାଇନ୍ । ମଦ ବିକିଲେ ଗଣିବେ ୫୦ ହଜାର । ଗାଁରୁ ବାସନ୍ଦ ହେବେ ନିଶା କାରବାର ଲୋକ । ଗାଁର ଗଳି ଗଳିରେ ଲାଗିଛି ଏଭଳି କିଛି ପୋଷ୍ଟର । ଗାଁ ଲୋକେ ସଫା ସଫା ଲେଖିଛନ୍ତି ଗାଁରେ ନିଶା କାରବାର କଲେ ୫୦ ହଜାର ଫାଇନ ସହ ୨୦ ବର୍ଷ ଗାଁରୁ ବାସନ୍ଦ (Anti Liquor Protest ) l ଖାଲି ସେତିକି ନୁହେଁ, ପୁଣି ନିଶା କାରବାର ସମ୍ପର୍କରେ ଯିଏ ସୂଚନା ଦେବ ତାଙ୍କୁ ୧୦ ହଜାର ଟଙ୍କା ପୁରସ୍କାର ଦେବ ଗ୍ରାମବାସୀ l 

ଚାରିଆଡ଼େ ଲାଗିଛି ପୋଷ୍ଟର....

ନୂଆପଡ଼ା ଜିଲ୍ଲାର କୋମନା ଥାନା ଗୋହିରାପଦର ଗାଁରେ ଲାଗିଛି ଏଭଳି କିଛି ପୋଷ୍ଟର l ଗାଁକୁ ନିଶା ବେପାରୀ ଓ ନିଶାଖୋରଙ୍କ ନିକଟରୁ ମୁକ୍ତି ପାଇଁ ଏପରି ଚରମ ନିଷ୍ପତ୍ତି ନେଇଛନ୍ତି ଗାଁର ଲୋକେ l ଗାଁରେ ପାଖାପାଖି ପ୍ରାୟ ହଜାରେ ଲୋକ ବସବାସ କରନ୍ତି l କିନ୍ତୁ ଗାଁରେ ଦିନକୁ ଦିନ ବେଆଇନ ମଦ, ଗଞ୍ଜେଇ ଓ କଫ ସିରଫ ବ୍ୟବହାରକାରୀଙ୍କ ସଂଖ୍ୟା ବଢ଼ିବାରେ ଲାଗିଛି । ଫଳରେ ଘରେ ଘରେ ବଢ଼ୁଛି ଅଶାନ୍ତି  l ତେଣୁ ଗାଁ ଲୋକେ ବୈଠକ କରି ଏହି ଚରମ ନିଷ୍ପତ୍ତି ନେବାକୁ ବାଧ୍ୟ ହୋଇଛନ୍ତି l ତେବେ ଗାଁ ଲୋକଙ୍କ ଏହି ଉଦ୍ୟମକୁ ନୂଆପଡ଼ା ଜିଲ୍ଲାପାଳ ପ୍ରଶଂସା କରିଛନ୍ତି । 

ତେବେ ଦିନକୁ ଦିନ ଗାଁରେ ମଦ୍ୟପଙ୍କ ସଂଖ୍ୟା ବଢ଼ୁଥିବାରୁ ଗାଁ ଲୋକଙ୍କ ଏପରି ପଦକ୍ଷେପ ସତରେ ସ୍ବାଗତ ଯୋଗ୍ୟ ।