Bans Public Drinking: ସବ୍-କଲେକ୍ଟରଙ୍କ କଡ଼ା ତାଗିଦ୍ , ମଦ ବ୍ୟାନ୍ !

ଆଉ ଢକ ଢକ ପିଇପାରିବେନି ମଦ ! ଚାଲିବନି ମଦ୍ୟପଙ୍କ ମନମାନି ! ପବ୍ଲିକ୍ ପ୍ଲେସରେ ମଦ ବ୍ୟାନ୍ ! ପର୍ଯ୍ୟଟନ ସ୍ଥଳୀରେ ନିଶାକୁ ବାରଣ । ଉପ-ଜିଲ୍ଳାପାଳଙ୍କ ଏପରି କଡ଼ା ତାଗିଦ ପରେ ଏବେ ରାୟଗଡ଼ାରେ ହଇଚଇ । ମଦୁଆଙ୍କୁ ସାବାଡ ପାଇଁ ଯୁବ IASଙ୍କ ଇଏ ହେଉଛି କଡା ପଦକ୍ଷେପ l ଗୁଣୁପୁର ସବଡିଭିଜନର ବିଭିନ୍ନ ଗୁରୁତ୍ବପୂର୍ଣ୍ଣ ସାର୍ବଜନୀନ ସ୍ଥାନମାନଙ୍କରେ ଏଣିକି ମଦ୍ୟପାନ କରିବାକୁ ପ୍ରଶାସନ ବାରଣ କରିଛି l ଏନେଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଉପ ଜିଲ୍ଲାପାଳ ଅଭିଷେକ ଦୁଧାଲ ଏକ ନିର୍ଦେଶନାମା ଜାରି କରିଛନ୍ତି । 

ଗୁଣୁପୁରର ଧାର୍ମିକ ସ୍ଥଳ, ସର୍ବସାଧାରଣ ସ୍ଥାନ ଏବଂ ପର୍ଯ୍ୟଟନ ସ୍ଥଳରେ ମଦ୍ୟପାନ ଏବଂ ନିଶାଦ୍ରବ୍ୟ ସେବନ ହେଉଥିବା ନେଇ ସାଧାରଣ ଜନତା ଉପଜିଲ୍ଲାପାଳଙ୍କୁ ଅଭିଯୋଗ କରିଥିଲେ । ଏହି ସମ୍ପର୍କରେ ଅନେକ ମୌଖିକ ଅଭିଯୋଗ ପରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଉପ ଜିଲ୍ଲାପାଳ ପଦକ୍ଷେପ ନେଇଛନ୍ତି । ସହର ନିକଟସ୍ଥ ସେଫାଳି ପାହାଡ଼, କେନ୍ଦୁଗୁଡ଼ା ଡ୍ୟାମ୍, ବ୍ଲକ କଲୋନି, ମା’ ମାଣିକେଶ୍ୱରୀ ମନ୍ଦିର ଏବଂ ଆଖପାଖ ଅଞ୍ଚଳରେ ନିଶା ସେବନ ହୋଇଥିବା ସ୍ଥାନ ଗୁଡ଼ିକୁ ପରିଦର୍ଶନ କରୁଥିବା ମହିଳା ଓ ପର୍ଯ୍ୟଟକଙ୍କ ସୁରକ୍ଷା ପାଇଁ ଉପଜିଲ୍ଲାପାଳ ଏହି ପଦକ୍ଷେପ ନେଇଛନ୍ତି । ଏନେଇ ଗୁଣପୁର ଉପଖଣ୍ଡର ସମସ୍ତ ଥାନା ଆଇଆଇସି, ତହସିଲଦାର, ଆରକ୍ଷୀ ଅଧିକ୍ଷକ ପୁଲିସ ଏବଂ ଜିଲ୍ଲାପାଳଙ୍କୁ ଉପଜିଲ୍ଲାପାଳ ସୂଚନା ପ୍ରଦାନ କରିଥିବା ଜଣାପଡିଛି । 

ଗୁଣପୁରରେ ପ୍ରଥମ ଥର ପାଇଁ ଜଣେ ଯୁବ IAS ଏଭଳି ଆଦେଶ ଜାରି କରିଛନ୍ତି । ଉପଜିଲ୍ଲାପାଳ ନିଜେ ବିଭିନ୍ନ ଅଞ୍ଚଳ ଗସ୍ତ କରୁଥିବାବେଳେ ପରିସ୍ଥିତି ଦେଖି ନିର୍ଦ୍ଦେଶ ଦେଇଛନ୍ତି । ଯୁବ IASଙ୍କ ଏଭଳି ପଦକ୍ଷେପକୁ ବିଭିନ୍ନ ବର୍ଗ ପ୍ରଶଂସା କରିଛନ୍ତି ।