LIVE TV
ଚଳିତ ବର୍ଷ ଭାରତର ଟି-୨୦ ବିଶ୍ୱକପ୍ ବିଜୟ ସହ ତତ୍କାଳୀନ ମୁଖ୍ୟ କୋଚ୍ ରାହୁଲ ଦ୍ରାବିଡ଼ଙ୍କ ସମ୍ପ୍ରସାରିତ କାର୍ଯ୍ୟକାଳ ଶେଷ ହୋଇଥିଲା । ଖେଳାଳିଙ୍କ ସମର୍ଥନ ସତ୍ତ୍ୱେ ସେ ଆଉ ତାଙ୍କର କାର୍ଯ୍ୟକାଳ ବଢ଼ାଇବାକୁ ଚାହିଁ ନ ଥିଲେ ।
ଏହାପରେ ମୁଖ୍ୟ କୋଚ୍ ପଦବୀ ପାଇଁ ଯେଉଁ ନାମକୁ ନେଇ ସର୍ବାଧିକ ଚର୍ଚ୍ଚା ହୋଇଥିଲା, ସେ ଥିଲେ ଜାତୀୟ କ୍ରିକେଟ୍ ଏକାଡେମୀ (ଏନ୍ସିଏ) ମୁଖ୍ୟ ତଥା ପୂର୍ବତନ କ୍ରିକେଟର୍ ଭିଭିଏସ୍ ଲକ୍ଷ୍ମଣ ।
Also Read
ଏନ୍ସିଏ ମୁଖ୍ୟ ହେବା ପରେ ଲକ୍ଷ୍ମଣ ବିଭିନ୍ନ ସମୟରେ ଦ୍ରାବିଡ଼ଙ୍କ ଅନୁପସ୍ଥିତିରେ ସୀମିତ ଓଭର୍ ଟିମ୍ର ଅନ୍ତରୀଣ ମୁଖ୍ୟ କୋଚ୍ ଦାୟିତ୍ୱ ସୁଚାରୁ ରୂପେ ତୁଲାଇଥିଲେ ।
ଦ୍ରାବିଡ଼ ଯିବା ପରେ ଜିମ୍ବାୱେ ଗସ୍ତରେ ଆୟୋଜିତ ଟି-୨୦ ଆନ୍ତର୍ଜାତିକ ସିରିଜ୍ ଓ ନିକଟରେ ଦକ୍ଷିଣ ଆଫ୍ରିକା ଗସ୍ତରେ ଖେଳାଯାଇଥିବା ଟି-୨୦ ସିରିଜ୍ରେ ମଧ୍ୟ ସେ ଅନ୍ତରୀଣ ମୁଖ୍ୟ କୋଚ୍ ଭାବେ ଟିମ୍ ସହିତ ସଂଶ୍ଳିଷ୍ଟ ଥିଲେ । ଟିମ୍ ଉଭୟ ସିରିଜ୍ ଜିତିଥିଲା ।
ଏବେ ଲକ୍ଷ୍ମଣଙ୍କ ନାମକୁ ନେଇ ପୁଣି ଚର୍ଚ୍ଚା ହେଉଛି । ତେବେ ଏହି ଆଲୋଚନା ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ ବିଜୟ ପୂର୍ବରୁ ଆରମ୍ଭ ହୋଇଗଲାଣି ।
ଲକ୍ଷ୍ମଣଙ୍କ ନାମକୁ ନେଇ ପୁଣି ଚର୍ଚ୍ଚାଲକ୍ଷ୍ମଣଙ୍କ ଅନାଗ୍ରହ ଓ ଗମ୍ଭୀରଙ୍କ ଉନ୍ମେଷ
ଦୌଡ଼ରେ ସର୍ବାଗ୍ରେ ଥିବା ସତ୍ତ୍ୱେ ଲକ୍ଷ୍ମଣ ତାଙ୍କର ସମସାମୟିକ ଦ୍ରାବିଡ଼ଙ୍କ ପରେ ଭାରତର ମୁଖ୍ୟ କୋଚ୍ ହେବା ପାଇଁ ଆଗ୍ରହ ପ୍ରକାଶ କରି ନ ଥିଲେ । କିନ୍ତୁ ୨୦୨୧ରେ ଦ୍ରାବିଡ଼ଙ୍କୁ ମୁଖ୍ୟ କୋଚ୍ କରାଯିବା ପୂର୍ବରୁ ସେ ଏହି ଦାୟିତ୍ୱ ନେବା ପାଇଁ ଇଚ୍ଛୁକ ଥିଲେ ।
ତେବେ ଲକ୍ଷ୍ମଣଙ୍କୁ ଏହା ପରିବର୍ତ୍ତେ ଏନ୍ସିଏ ମୁଖ୍ୟ କରାଯାଇଥିଲା । ପୂର୍ବରୁ ସେ ଆଇପିଏଲ୍ରେ ୨୦୧୩ରୁ ୨୦୨୧ ଯାଏଁ ସନ୍ରାଇଜର୍ସ ହାଇଦ୍ରାବାଦର ମେଣ୍ଟର ଥିଲେ । ୨୦୧୬ରେ ଟିମ୍ ଚାମ୍ପିଅନ୍ ହୋଇଥିଲା ।
ଲକ୍ଷ୍ମଣଙ୍କ ଅନାଗ୍ରହ ମଧ୍ୟରେ ପୂର୍ବତନ କ୍ରିକେଟର୍ ଗୌତମ ଗମ୍ଭୀରଙ୍କ ଉନ୍ମେଷ ହୋଇଥିଲା, ଯାହାଙ୍କ ମାର୍ଗଦର୍ଶନରେ କୋଲକାତା ନାଇଟ୍ ରାଇଡର୍ସ ଚଳିତ ବର୍ଷ ଆଇପିଏଲ୍ରେ ତୃତୀୟ ଥର ମୁକୁଟ ଜିତିଥିଲା ।
ଗମ୍ଭୀର ସବୁ ଫର୍ମାଟ୍ରେ ଭାରତୀୟ ଟିମ୍ର କୋଚ୍ ହୋଇଥିଲେ । କିନ୍ତୁ ତାଙ୍କ କାର୍ଯ୍ୟକାଳର ସାଢ଼େ ତିନି ମାସ ମଧ୍ୟରେ ଯାହା ଯାହା ଘଟିଛି, ତାହା ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡର ମୁଣ୍ଡବ୍ୟଥା ବଢ଼ାଇଦେଇଛି । ଟେଷ୍ଟରେ ଟିମ୍ ଇଣ୍ଡିଆ ଅଚାନକ ବ୍ୟାକ୍ଫୁଟ୍କୁ ଚାଲିଆସିଛି ।
ଗମ୍ଭୀରଙ୍କ ଉପରେ ଅସନ୍ତୁଷ୍ଟ ବିସିସିଆଇ ନେତୃତ୍ୱ
ଗମ୍ଭୀରଙ୍କ କୋଚିଂ କାଳର ଆଦ୍ୟଭାଗରେ ଭାରତ ଦୁଇଟି ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଛି ।
୧୯୯୭ ପରଠାରୁ ଭାରତୀୟ ଟିମ୍ ଶ୍ରୀଲଙ୍କା ବିପକ୍ଷରେ ଦିନିକିଆ ସିରିଜ୍ରେ ପରାଜିତ ହୋଇନଥିଲା । କିନ୍ତୁ ଗମ୍ଭୀର ଦାୟିତ୍ୱ ନେବା ପରେ ପ୍ରଥମ ଥର ହାରିଥିଲା । ଏହାପରେ ନ୍ୟୁଜିଲାଣ୍ଡ ଠାରୁ ହାରି ଘରେ ତିନି ବା ତତୋଧିକ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ପ୍ରଥମ ଥର କ୍ଲିନ୍ସୁଇପ୍ର ବି ଶିକାର ହେଲା ।
ଦ୍ୱିତୀୟ ବିପର୍ଯ୍ୟୟ ବେଶୀ ଯନ୍ତ୍ରଣାଦାୟକ ଥିଲା, କାରଣ ଏହା ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ ଟେବୁଲ୍ରେ ଭାରତର ପଏଣ୍ଟ ପ୍ରତିଶତକୁ ପ୍ରଭାବିତ କରିଥିଲା । ଏବେ ଟିମ୍ ଇଣ୍ଡିଆ ଲର୍ଡ୍ସରେ ହେବାକୁ ଥିବା ଚାମ୍ପିଅନ୍ସିପ୍ର ଫାଇନାଲ୍କୁ ଯାଇପାରିବ କି ନାହିଁ ସନ୍ଦେହ ।
ଚଳିତ ଚକ୍ରରେ ଅଷ୍ଟ୍ରେଲିଆରେ ହେବାକୁ ଥିବା ବର୍ଡର-ଗାଭାସ୍କର ଟ୍ରଫି ଭାରତର ଶେଷ ଟେଷ୍ଟ ସିରିଜ୍ । ଚାମ୍ପିଅନ୍ସିପ୍ର ଫାଇନାଲ୍କୁ ଯିବା ପାଇଁ ଏଥିରେ ଅତି କମ୍ରେ ଚାରିଟି ମ୍ୟାଚ୍ ଜିତିବାକୁ ହେବ ଅନ୍ୟଥା ଅନ୍ୟ ଟିମ୍ର ମ୍ୟାଚ୍ଗୁଡ଼ିକର ଫଳାଫଳ ଉପରେ ନିର୍ଭର କରିବାକୁ ପଡ଼ିବ ।
ଏହି ଦୁଇ ବିପର୍ଯ୍ୟୟ ପରେ ବୋର୍ଡର ଶୀର୍ଷ ନେତୃତ୍ୱ ଗମ୍ଭୀରଙ୍କ ଉପରେ ଅସନ୍ତୁଷ୍ଟ । ମୁଖ୍ୟ କୋଚ୍ଙ୍କ ନିଷ୍ପତ୍ତି ଓ ରଣକୌଶଳକୁ ନେଇ ପ୍ରଶ୍ନ ଉଠିଛି ।
ନ୍ୟୁଜିଲାଣ୍ଡ ସିରିଜ୍ ନେଇ ବୋର୍ଡର ସମୀକ୍ଷା ବୈଠକରୁ ସଙ୍କେତ ମିଳିଛି ଯେ ଯଦି ଟିମ୍ର ଏଭଳି ଅବସ୍ଥା ଜାରି ରହେ, ତା’ହେଲେ ଗମ୍ଭୀରଙ୍କ ଠାରୁ ଟେଷ୍ଟ ଟିମ୍ର କୋଚିଂ ଦାୟିତ୍ୱ କାଢ଼ି ନିଆଯାଇପାରେ ।
ତାଙ୍କ ମାର୍ଗଦର୍ଶନରେ କୋଲକାତା ନାଇଟ୍ ରାଇଡର୍ସ ଚଳିତ ବର୍ଷ ଆଇପିଏଲ୍ରେ ତୃତୀୟ ଥର ମୁକୁଟ ଜିତିଥିଲା ଲକ୍ଷ୍ମଣଙ୍କୁ ନେଇ ପୁଣି ଚର୍ଚ୍ଚା କାହିଁକି
ଏବେ ଚର୍ଚ୍ଚା ହେଉଛି ଯେ ନିଜ ଟେଷ୍ଟ କ୍ୟାରିଅର୍ରେ ଅନେକ ଉଲ୍ଲେଖନୀୟ ଇନିଂସ୍ ଖେଳିଥିବା ଲକ୍ଷ୍ମଣ ମୁଖ୍ୟ କୋଚ୍ ହୋଇଥିଲେ ଆଜି ହୁଏତ (ଟେଷ୍ଟ) ଟିମ୍ର ଏଭଳି ଦଶା ହୋଇ ନ ଥା’ନ୍ତା ।
ଏକ ମିଡିଆ ରିପୋର୍ଟ ଅନୁଯାୟୀ, ଯଦି ଟିମ୍ ଇଣ୍ଡିଆ ବର୍ଡର-ଗାଭାସ୍କର ଟ୍ରଫି ବି ହାରିବ, ତା’ହେଲେ ବୋର୍ଡ ଟେଷ୍ଟ ଓ ସୀମିତ ଓଭର୍ (ଦିନିକିଆ ଓ ଟି-୨୦ ଆନ୍ତର୍ଜାତିକ) ପାଇଁ ଭିନ୍ନ ଭିନ୍ନ କୋଚ୍ ନିଯୁକ୍ତ କରିବା ଉପରେ ବିଚାର କରିବ ।
ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ ଏନ୍ସିଏ ମୁଖ୍ୟ ଲକ୍ଷ୍ମଣଙ୍କୁ ଟେଷ୍ଟ ଟିମ୍ର କୋଚିଂ ଦାୟିତ୍ୱ ଦିଆଯାଇପାରେ । ପରିବର୍ତ୍ତିତ ସ୍ଥିତିରେ ଲକ୍ଷ୍ମଣ ଟେଷ୍ଟ ଏବଂ ଗମ୍ଭୀର ଦିନିକିଆ ଓ ଟି-୨୦ ଟିମ୍କୁ କୋଚିଂ ଦେଇପାରନ୍ତି ।
କେତେକ କ୍ରିକେଟ୍ ବୋର୍ଡ ପୂର୍ବରୁ ଏହାର ପ୍ରୟୋଗ କରିସାରିଛନ୍ତି । କିନ୍ତୁ ଭାରତରେ ସବୁବେଳେ ସବୁ ଫର୍ମାଟ୍ ପାଇଁ ଜଣେ ମୁଖ୍ୟ କୋଚ୍ଙ୍କୁ ରଖାଯାଇଆସିଛି ।
ତେଣୁ ଅଷ୍ଟ୍ରେଲିଆ ଗସ୍ତରେ ଗମ୍ଭୀରଙ୍କ ଟେଷ୍ଟ କୋଚିଂର ଭବିଷ୍ୟତ ବନ୍ଧା ପଡ଼ିଛି । ଏବେ ବର୍ଡର-ଗାଭାସ୍କର ଟ୍ରଫିରେ ଟିମ୍ର ପ୍ରଦର୍ଶନ ଉପରେ ସମସ୍ତଙ୍କ ନଜର ରହିବ ।
ଲକ୍ଷ୍ମଣଙ୍କ କୋଚିଂରେ ଟିମ୍କୁ ଉଲ୍ଲେଖନୀୟ ସଫଳତା
ଲକ୍ଷ୍ମଣ ଅନ୍ତରୀଣ ମୁଖ୍ୟ କୋଚ୍ ଥିବା ସମୟରେ ଟିମ୍ ଇଣ୍ଡିଆ ଅଧିକାଂଶ ଦ୍ୱିପାକ୍ଷିକ ସୀମିତ ଓଭର୍ ସିରିଜ୍ ଜିତିଛି । ସେଥିମଧ୍ୟରେ ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକା, ଜିମ୍ବାୱେ ଓ ଆୟରଲାଣ୍ଡ ବିପକ୍ଷ ଟି-୨୦ ସିରିଜ୍ ଏବଂ ଜିମ୍ବାୱେ ବିପକ୍ଷ ଦିନିକିଆ ସିରିଜ୍ ବିଜୟ ରହିଛି ।
ଏହାଛଡ଼ା ହାଙ୍ଗ୍ଝୁ ଏସିଆଡ୍ ୨୦୨୨ରେ ସ୍ୱର୍ଣ୍ଣ ପଦକ ଜିତିଥିବା ଭାରତୀୟ ଟିମ୍ର ମଧ୍ୟ ସେ ମୁଖ୍ୟ କୋଚ୍ ଥିଲେ ।
୨୦୨୨ ଜୁନ୍ରେ ଆୟରଲାଣ୍ଡ ଗସ୍ତରେ ଆୟୋଜିତ ଟି-୨୦ ସିରିଜ୍ ଅନ୍ତରୀଣ ମୁଖ୍ୟ କୋଚ୍ ଭାବେ ଲକ୍ଷ୍ମଣଙ୍କ ପ୍ରଥମ ଦାୟିତ୍ୱ ଥିଲା । ଭାରତ ୨-୦ରେ ଏହି ସିରିଜ୍ ଜିତିଥିଲା ।
ଏହାପରେ ଅଗଷ୍ଟରେ ଭାରତୀୟ ଟିମ୍ ଦିନିକିଆ ସିରିଜ୍ ଖେଳିବା ପାଇଁ ଜିମ୍ବାୱେ ଯାଇଥିଲା । ଲକ୍ଷ୍ମଣ ଟିମ୍ ସହ ମୁଖ୍ୟ କୋଚ୍ ଭାବେ ଯୋଡ଼ି ହୋଇଥିଲେ, ଯେଉଁଥିରେ ଭାରତ ୩-୦ରେ ବିଜୟୀ ହୋଇଥିଲା ।
ସେହି ବର୍ଷ ଆୟୋଜିତ ଟି-୨୦ ବିଶ୍ୱକପ୍ ଶେଷ ହେବା ପରେ ଭାରତୀୟ ଟିମ୍ ନଭେମ୍ବରରେ ସୀମିତ ଓଭର୍ ସିରିଜ୍ ଖେଳିବା ପାଇଁ ନ୍ୟୁଜିଲାଣ୍ଡ ଗସ୍ତରେ ଯାଇଥିଲା । ଲକ୍ଷ୍ମଣଙ୍କ କୋଚିଂରେ ଭାରତ ବର୍ଷା-ବାଧାପ୍ରାପ୍ତ ଦିନିକିଆ ସିରିଜ୍ରେ ୦-୧ରେ ହାରିଥିଲେହେଁ ଟି-୨୦ ସିରିଜ୍କୁ ୧-୦ରେ ଜିତିଥିଲା ।
ଲକ୍ଷ୍ମଣଙ୍କ କୋଚିଂରେ ଟିମ୍କୁ ଉଲ୍ଲେଖନୀୟ ସଫଳତାଗତ ବର୍ଷ ଦିନିକିଆ ବିଶ୍ୱକପ୍ ପରେ ଅଷ୍ଟ୍ରେଲିଆ ବିପକ୍ଷ ଘରୋଇ ଟି-୨୦ ସିରିଜ୍ ପାଇଁ ମଧ୍ୟ ଲକ୍ଷ୍ମଣଙ୍କୁ ଟିମ୍ର ମୁଖ୍ୟ କୋଚ୍ ଦାୟିତ୍ୱ ଦିଆଯାଇଥିଲା । ଏଥିରେ ଭାରତ ୪-୧ରେ ବିଜୟୀ ହୋଇଥିଲା ।
୨୦୨୪ରେ ଜିମ୍ବାୱେ ଓ ଦକ୍ଷିଣ ଆଫ୍ରିକାରେ ଟି-୨୦ ସିରିଜ୍ ବିଜୟ
ଚଳିତ ବର୍ଷ ଟି-୨୦ ବିଶ୍ୱକପ୍ ଶେଷ ହେବା ପରେ ଟିମ୍ ଇଣ୍ଡିଆ ଜୁଲାଇରେ ଜିମ୍ବାୱେ ଗସ୍ତରେ ଯାଇଥିଲା । ଲକ୍ଷ୍ମଣଙ୍କ କୋଚିଂରେ ଟିମ୍ ୪-୧ରେ ସିରିଜ୍ ହାତେଇଥିଲା । ସେତେବେଳକୁ ନୂଆ କୋଚ୍ ଗମ୍ଭୀର ଟିମ୍ ସହ ଯୋଗ ଦେଇ ନ ଥିଲେ ।
ନଭେମ୍ବରରେ ଦକ୍ଷିଣ ଆଫ୍ରିକା ଗସ୍ତରେ ଟି-୨୦ ସିରିଜ୍ ପାଇଁ ତାଙ୍କୁ ପୁନର୍ବାର ଟିମ୍ର ଗୁରୁଦାୟିତ୍ୱ ଦିଆଯାଇଥିଲା, ଯେଉଁଥିରେ ସୂର୍ଯ୍ୟକୁମାର ଯାଦବଙ୍କ ଟିମ୍ ୩-୧ରେ ବିଜୟ ହାସଲ କରିଛି । ଅନ୍ୟପଟେ, ମୁଖ୍ୟ କୋଚ୍ ଗମ୍ଭୀର ବର୍ଡର-ଗାଭାସ୍କର ଟ୍ରଫି ପାଇଁ ଟେଷ୍ଟ ଟିମ୍ ସହ ଅଷ୍ଟ୍ରେଲିଆ ଗସ୍ତରେ ଯାଇଛନ୍ତି ।
ଏନ୍ସିଏରେ ତୁଲାଇଛନ୍ତି ଗୁରୁତ୍ୱପୂର୍ଣ୍ଣ ଭୂମିକା
ଏନ୍ସିଏରେ ନିଜ କାର୍ଯ୍ୟକାଳ ସମୟରେ ଲକ୍ଷ୍ମଣ ଖେଳାଳିଙ୍କ ଆଘାତ ପରିଚାଳନା, ଥଇଥାନ ଓ ମହିଳା କ୍ରିକେଟ୍ ପାଇଁ ରୋଡ୍ମ୍ୟାପ୍ ପ୍ରସ୍ତୁତି କ୍ଷେତ୍ରରେ ପୂର୍ବତନ ମୁଖ୍ୟ ଦ୍ରାବିଡ଼ଙ୍କ ଦ୍ୱାରା ନିର୍ଦ୍ଧାରିତ ପ୍ରକ୍ରିୟାକୁ ଆଗକୁ ନେଇଛନ୍ତି ।
ଏନ୍ସିଏ ମୁଖ୍ୟ ଭାବେ ବିଭିନ୍ନ ବୟସବର୍ଗ ଓ ସିନିଅର୍ ସ୍ତରରେ ଜାତୀୟ ପୁରୁଷ ଓ ମହିଳା ଟିମ୍ଗୁଡ଼ିକୁ ନୂଆ ରୂପ ଦେବାରେ ଏହି ପୂର୍ବତନ କ୍ରିକେଟର୍ଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଆସିଛି ।
ରାଜି ହେବେ କି ଲକ୍ଷ୍ମଣ
ପୂର୍ବରୁ ଅରାଜି ଥିବା ଲକ୍ଷ୍ମଣ ବୋର୍ଡର ପ୍ରସ୍ତାବିତ ନୂଆ ଅଫର୍ରେ ରାଜି ହେବେ କି?
ଆନ୍ତର୍ଜାତିକ କ୍ରିକେଟ୍ର ବ୍ୟସ୍ତ କାର୍ଯ୍ୟସୂଚୀ ଯୋଗୁଁ ଜଣେ କୋଚ୍ଙ୍କୁ ପ୍ରାୟ ୧୦ ମାସ ଟିମ୍ ସହ ଯାତ୍ରା କରିବାକୁ ପଡ଼ୁଛି । ସେଥିପାଇଁ ଅନେକ ପୂର୍ବତନ କ୍ରିକେଟର୍ ଏହି ଦାୟିତ୍ୱ ନେବା ପାଇଁ ଆଗ୍ରହ ପ୍ରକାଶ କରୁ ନାହାନ୍ତି । ଏହାଛଡ଼ା, ଟିମ୍ ଇଣ୍ଡିଆର କୋଚ୍ଙ୍କ ଉପରେ ଅଧିକ ଆଶା ଓ ଚାପ ବି ରହୁଛି ।
କେବଳ ଟେଷ୍ଟ କି ସୀମିତ ଓଭର୍ର କୋଚ୍ ହେଲେ, କାର୍ଯ୍ୟଭାର ହ୍ରାସ ପାଇବ । ଏହି ଦୃଷ୍ଟିରୁ ଓ ଟିମ୍ର ବୃହତ୍ତର ସ୍ୱାର୍ଥ ପାଇଁ ଲକ୍ଷ୍ମଣ ନୂଆ ଦାୟିତ୍ୱ ନେବା ପାଇଁ ରାଜି ହୋଇପାରନ୍ତି ।
ତେବେ ଏହା ପୂର୍ବରୁ ବର୍ଡର-ଗାଭାସ୍କର ଟ୍ରଫିକୁ ଅପେକ୍ଷା କରିବାକୁ ହେବ । ଏଥିରେ ଟିମ୍ ଓ ସିନିଅର୍ ଖେଳାଳିମାନେ ଫର୍ମ ହାସଲ କରି ପୂର୍ବ ଗୌରବ ଫେରିପାଇବେ ବୋଲି ଆଶା ଅଛି ।
ଇମେଲ୍: biswasports@gmail.com
(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)
