IPL 2025: ପୁଣି RCBର ଅଧିନାୟକ ହେବେ ବିରାଟ କୋହଲି !

ଆଇପିଏଲ ୨୦୨୫ ସିଜିନ୍‌ ପାଇଁ ଖେଳାଳିଙ୍କ ରିଟେନ୍‌ସନ୍‌ ଲିଷ୍ଟକୁ ନେଇ ସବୁ ଫ୍ରାଞ୍ଚାଇଜ୍‌ ମଧ୍ୟ ହଲଚଲ ଜାରି ରହିଛି । ଦଳରେ କାହାକୁ ରଖିବେ, କାହାକୁ ଛାଡ଼ିବେ ଏନେଇ ବିଭିନ୍ନ ଫ୍ରାଞ୍ଚାଇଜ୍‌ ଜାରି ରଖିଛନ୍ତି ସେମାନଙ୍କ ଅଙ୍କକଷା । ତେବେ ରିଟେନ୍‌ସନ୍‌ ଲିଷ୍ଟ ଆସିବା ପୂର୍ବରୁ ଷ୍ଟାର୍‌ କ୍ରିକେଟର ବିରାଟ କୋହଲିଙ୍କୁ ନେଇ ଆସିଛି ବଡ଼ ଖବର । ପୁଣି ଥରେ ଆଇପିଏଲରେ ଅଧିନାୟକ ଭୂମିକାରେ ନଜର ଆସିପାରନ୍ତି ବିରାଟ । ଆଇପିଏଲ ୨୦୨୫ ସିଜିନ୍‌ ପାଇଁ ବିରାଟ କୋହଲି ପୁଣି ଥରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର କ୍ୟାପଟେନ୍‌ ହୋଇପାରନ୍ତି । ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ କୋହଲି RCB ଟିମ୍‌ ମ୍ୟାନେଜମେଣ୍ଟ ସହ କରିସାରିଛନ୍ତି ଏବଂ ଅଧିନାୟକତ୍ୱକୁ ଫେରିବାକୁ ପ୍ରସ୍ତୁତ ଅଛନ୍ତି । ତେବେ ଏନେଇ ଚୂଡ଼ାନ୍ତ ନିଷ୍ପତ୍ତି ନଭେମ୍ବରରେ ହେବାକୁ ଥିବା ମେଗା ନିଲାମ ପରେ ହିଁ ନିଆଯିବ ।

ବିରାଟ କୋହଲି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ୯ଟି ସିଜିନରେ ଅଧିନାୟକ ଥିଲେ । ୨୦୧୩ରୁ ୨୦୨୧ ପର୍ଯ୍ୟନ୍ତ ଆରସିବି ଅଧିନାୟକ ଥିଲେ କୋହଲି । ତାଙ୍କ ଅଧିନାୟକତ୍ୱରେ ବାଙ୍ଗାଲୋର ୨୦୧୬ରେ ଫାଇନାଲରେ ପ୍ରବେଶ କରିଥିଲା । କିନ୍ତୁ ଫାଇନାଲ ମ୍ୟାଚ୍‌ରେ ସନ୍‌ ରାଇଜର୍ସ ହାଇଦ୍ରାବାଦଠାରୁ ପରାସ୍ତ ହୋଇଥିଲା । ମୋଟ ଉପରେ ବିରାଟ ଆରସିବି ପାଇଁ ୧୪୩ଟି ମ୍ୟାଚ୍‌ରେ ଅଧିନାୟକତ୍ୱ କରିଛନ୍ତି । ସେଥିମଧ୍ୟରୁ ସେ ୬୬ଟି ମ୍ୟାଚ୍‌ରେ ବିଜୟ ଲାଭ କରିଥିବାବେଳେ ୭୦ଟି ମ୍ୟାଚ୍‌ରେ ଦଳ ପରାଜୟର ସ୍ୱାଦ ଚାଖିଥିଲା ।

୨୦୨୧ରେ ବିରାଟ କୋହଲି ଅଧିନାୟକତ୍ୱ ଛାଡ଼ିଥିଲେ । ଏହାପରେ ୨୦୨୨ ମସିହାରୁ ଫାଫ୍‌ ଡୁ ପ୍ଲେସିସ୍‌ ଦଳର ଅଧିନାୟକ ଦାୟିତ୍ୱ ତୁଲାଇଥିଲେ । ତେବେ ଆଗାମୀ ସିଜିନ୍‌ରେ ଡୁ ପ୍ଲେସିସ୍‌ RCBର ଅଧିନାୟକ ହେବା ଆଶା ବହୁତ କ୍ଷୀଣ । ଡୁ ପ୍ଲେସିସ୍‌ଙ୍କ ଅଧିନାୟକତ୍ୱରେ ଦଳ ୨୦୨୨ ଓ ୨୦୨୪ରେ ପ୍ଲେ ଅଫରେ ପ୍ରବେଶ କରିଥିଲା । କିନ୍ତୁ ଟ୍ରଫି ଜିତିବାରେ ସଫଳ ହୋଇନଥିଲା ।

ବିରାଟ କୋହଲି ଆଇପିଏଲ ଆରମ୍ଭରୁ ଆରସିବି ସହ ରହିଛନ୍ତି । ୨୦୦୮ରୁ ଆଜି ପର୍ଯ୍ୟନ୍ତ ବିରାଟ ସବୁବେଳେ ଆରସିବି ଅଂଶ ହୋଇରହିଛନ୍ତି । ୧୭ ବର୍ଷ ମଧ୍ୟରେ ଆରସିବି କେବେହେଲେ କୋହଲିଙ୍କୁ ରିଲିଜ୍‌ କରିନାହିଁ । ଆଇପିଏଲରେ ବିରାଟଙ୍କ ନାମରେ ସର୍ବାଧିକ ରନ୍‌ ମଧ୍ୟ ରହିଛି ।

ସେପଟେ ଆଇପିଏଲ୍ ମେଗା ନିଲାମ -୨୦୨୪ ପାଇଁ ଖେଳାଳି ରିଟେନ୍‌ସନ୍‌ ପାଇଁ ଶେଷ ତାରିଖ ହେଉଛି ଅକ୍ଟୋବର ୩୧ । ଅର୍ଥାତ ଆସନ୍ତାକାଲି ଅପରାହ୍ମ ୫ଟା ପୂର୍ବରୁ ସମସ୍ତ ଫ୍ରାଞ୍ଚାଇଜ୍ ରିଟେନ୍‌ସନ୍‌ ପ୍ଲେୟାର ଲିଷ୍ଟ୍‌ ଆଇପିଏଲ୍ ଆୟୋଜକ କମିଟି ନିକଟକୁ ପଠାଇବେ ।

ଆଇପିଏଲ୍ ମେଗା ନିଲାମ ପୂର୍ବରୁ ସମସ୍ତ ଫ୍ରାଞ୍ଚାଇଜ୍ ୬ ଜଣ ଖେଳାଳିଙ୍କୁ ରଖିପାରିବେ । ଯେଉଁଥିରେ ସର୍ବାଧିକ ୫ ଜଣ ଅନ୍ତର୍ଜାତୀୟ ଖେଳାଳି ଓ ୨ ଜଣ ଅନକ୍ୟାପ୍‌ଡ୍‌ ଖେଳାଳି ରହିପାରିବେ । ଆନ୍ତର୍ଜାତୀୟ ଖେଳାଳି ଯେ କୌଣସି ଦେଶରୁ ହେଲେ ଚଳିବ କିନ୍ତୁ ଅନ୍‌କ୍ୟାପ୍ଡ୍‌ ଖେଳାଳି କେବଳ ଭାରତରୁ ହୋଇଥିବା ଆବଶ୍ୟକ ।