Asia Cup: ଏସିଆ କପ୍ ପାଇଁ ଟିମ୍ ଇଣ୍ଡିଆର ଦଳ ଘୋଷଣା, ଶୁଭମନ ଗିଲ ଉପଅଧିନାୟକ

ଦଳ ଘୋଷଣା ପୂର୍ବରୁ ଏହା କୁହାଯାଉଥିଲା ଯେ ଟେଷ୍ଟ ଅଧିନାୟକ ଶୁଭମନ ଗିଲଙ୍କୁ ମଧ୍ୟ ଦଳରେ ସାମିଲ କରାଯିବ। ଶୁଭମନଙ୍କୁ କେବଳ ଦଳରେ ସାମିଲ କରାଯାଇ ନାହିଁ, ବରଂ ତାଙ୍କୁ ଉପଅଧିନାୟକ କରାଯାଇଛି। ଯଦିଓ ଅଭିଷେକ ଶର୍ମା ଏବଂ ସଞ୍ଜୁ ସାମସନ ଏକ ଉତ୍କୃଷ୍ଟ ଓପନିଂ ଯୋଡ଼ି ହୋଇଥିଲେ, କିନ୍ତୁ ଗିଲଙ୍କ ପ୍ରବେଶ ପ୍ରାୟତଃ ନିଶ୍ଚିତ କରିଛି ଯେ ଏବେ ସେ ଏବଂ ଅଭିଷେକ ଟୁର୍ଣ୍ଣାମେଣ୍ଟରେ ଓପନିଂ କରୁଥିବାର ଦେଖାଯିବେ। ଏହା ବ୍ୟତୀତ ଯଶପ୍ରୀତ ବୁମରାଙ୍କ ଚୟନ ମଧ୍ୟ ଏହି ପ୍ରଶ୍ନ ଉଠାଇଛି ଯେ ସେ ସମସ୍ତ ମ୍ୟାଚ୍ ପାଇଁ ଉପଲବ୍ଧ ହେବେ କି?

ଟିମ୍ ଇଣ୍ଡିଆର ପ୍ରଥମ ମୁକାବିଲା ଆୟୋଜକ ୟୁଏଇ ବିପକ୍ଷରେ ୧୦ ସେପ୍ଟେମ୍ବରରେ ହେବ। ଏହା ସହିତ ଟୁର୍ଣ୍ଣାମେଣ୍ଟର ପ୍ରତୀକ୍ଷିତ ମୁକାବିଲା ଅର୍ଥାତ୍ ଭାରତ ବନାମ ପାକିସ୍ତାନ ୧୪ ସେପ୍ଟେମ୍ବରରେ ହେବ। ଯଦି ଉଭୟ ଦଳ ସୁପର ଫୋରରେ ପହଞ୍ଚନ୍ତି, ତେବେ ସେମାନେ ଆଉ ଥରେ ମୁହାଁମୁହିଁ ହେବେ। ୨୮ ସେପ୍ଟେମ୍ବରରେ ଟୁର୍ଣ୍ଣାମେଣ୍ଟର ଫାଇନାଲ ମୁକାବିଲା ମଧ୍ୟ ଦୁବାଇରେ ହିଁ ଖେଳାଯିବ। ଯଦି ପାକିସ୍ତାନ ଏବଂ ଭାରତ ଫାଇନାଲରେ ପହଞ୍ଚନ୍ତି, ତେବେ ଉଭୟ ଦଳ ଟୁର୍ଣ୍ଣାମେଣ୍ଟରେ ତୃତୀୟ ଥର ପାଇଁ ମୁହାଁମୁହିଁ ହୋଇପାରନ୍ତି। ଟିମ୍ ଇଣ୍ଡିଆକୁ ଏସିଆ କପ୍ ପରେ ତୁରନ୍ତ ୨ ଅକ୍ଟୋବରରୁ ୱେଷ୍ଟଇଣ୍ଡିଜ୍ ବିପକ୍ଷରେ ଟେଷ୍ଟ ସିରିଜ୍ ଖେଳିବାକୁ ହେବ।

ନିକଟରେ ଟେଷ୍ଟ ଅଧିନାୟକ ହୋଇଥିବା ଶୁଭମନ ଗିଲ ଏବଂ ଯଶସ୍ୱୀ ଜୟସ୍ୱାଲଙ୍କୁ ଏଥିପାଇଁ ପ୍ରସ୍ତୁତ ହେବା ପାଇଁ ଅଧିକ ସମୟ ମିଳିବ ନାହିଁ, ଏହି କାରଣରୁ ଉଭୟଙ୍କ ଏସିଆ କପ୍ ପାଇଁ ଚୟନ ସନ୍ଦେହଜନକ ଲାଗୁଥିଲା। କିନ୍ତୁ ଶୁଭମନଙ୍କ ଦଳକୁ ଫେରିବା ଏହା ଦର୍ଶାଇଛି ଯେ ମ୍ୟାନେଜମେଣ୍ଟ ତାଙ୍କୁ ପ୍ରତ୍ୟେକ ଫର୍ମାଟରେ ନେତୃତ୍ୱ ଭୂମିକାରେ ଦେଖୁଛି। ଯଶପ୍ରୀତ ବୁମରାଙ୍କ ଚୟନ ମଧ୍ୟ ଏହି ପ୍ରଶ୍ନ ଉଠାଇଛି ଯେ ଫାଇନାଲ ଏବଂ ପ୍ରଥମ ଟେଷ୍ଟ ମ୍ୟାଚ୍ ମଧ୍ୟରେ ମାତ୍ର ୩ ଦିନର ବ୍ୟବଧାନ ରହିଛି। ଏପରି ପରିସ୍ଥିତିରେ ସେ କ’ଣ ଫାଇନାଲ ମୁକାବିଲା ଖେଳିବେ? ଏବଂ ଯଦି ଖେଳନ୍ତି, ତେବେ ସେ ପ୍ରଥମ ଟେଷ୍ଟ ପାଇଁ ଫିଟ୍ ହେବେ କି?

ଘୋଷିତ ଏସିଆ କପ୍ ଦଳ ବିଷୟରେ କହିବାକୁ ଗଲେ, ସୂର୍ଯ୍ୟକୁମାର ଯାଦବଙ୍କୁ ଅଧିନାୟକ ଏବଂ ଶୁଭମନ ଗିଲଙ୍କୁ ଉପଅଧିନାୟକ ଭାବେ ଚୟନ କରାଯାଇଛି। ଏହା ବ୍ୟତୀତ ଅଭିଷେକ ଶର୍ମା, ତିଲକ ବର୍ମା, ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ଅକ୍ଷର ପଟେଲ, ଜିତେଶ ଶର୍ମା, ଯଶପ୍ରୀତ ବୁମରା, ବରୁଣ ଚକ୍ରବର୍ତ୍ତୀ, ଅର୍ଶଦୀପ, କୁଲଦୀପ ଯାଦବ, ସଞ୍ଜୁ ସାମସନ, ହର୍ଷିତ ରାଣା ଏବଂ ରିଙ୍କୁ ସିଂହଙ୍କୁ ୧୫ ଜଣିଆ ଦଳରେ ସାମିଲ କରାଯାଇଛି। ଏହା ବ୍ୟତୀତ ରିଜର୍ଭ ଖେଳାଳୀ ଭାବେ ୱାଶିଂଟନ ସୁନ୍ଦର, ପ୍ରସିଦ୍ଧ କ୍ରିଷ୍ଣା, ଯଶସ୍ୱୀ ଜୟସୱାଲ, ରିୟାନ ପରାଗ ଏବଂ ଧ୍ରୁବ ଜୁରେଲଙ୍କୁ ସାମିଲ କରାଯାଇଛି।

ଅଧିକ ପଢ଼ନ୍ତୁ: ଭାରତର ଟି-୨୦ ଯୋଜନାରେ ଫିଟ୍ ହେବେ କି ଶୁବମନ ଗିଲ୍‌ ?