କଠୋର ହେଲା ICC, ଆଣିଲା ନୂଆ ନିୟମ ‘ଷ୍ଟପ୍‌ କ୍ଲକ୍‌’

ଏଣିକି ନିର୍ଦ୍ଧାରିତ ସମୟରେ ସରିବ କ୍ରିକେଟ ମ୍ୟାଚ୍। ହ୍ୱାଇଟ୍ ବଲ କ୍ରିକେଟ ମ୍ୟାଚରେ ଲାଗୁହେବ ନୂଆ ନିୟମ। ଲାଗୁ ହେବାକୁ ଯାଉଛି ଆଇସିସିର ନୂଆ ରୁଲ୍ ‘ଷ୍ଟପ୍ କ୍ଳକ୍’ । ଟି-20 ବିଶ୍ୱକପରୁ କ୍ରିକେଟ ମ୍ୟାଚରେ ପରମାନେଣ୍ଟ ଲାଗୁ ହେବ ଷ୍ଟପ କ୍ଳକ୍ ନିୟମ । ସୀମିତ ଓଭର ଅନ୍ତର୍ଜାତୀୟ ମ୍ୟାଚରେ ଏହି ନିୟମ ହେବ ବାଧ୍ୟତାମୂଳକ । ଶୁକ୍ରବାର ଦୁବାଇରେ ଅନୁଷ୍ଠିତ ଆଇସିସିର ବୋର୍ଡ ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ।

ତେବେ ନଜର ପକାନ୍ତୁ କଣ ଏହି ଷ୍ଟପ୍ କ୍ଲକ୍ ରୁଲ୍ ?

ଷ୍ଟପ୍ କ୍ଲକ୍ ରୁଲ୍ ଅନୁଯାୟୀ, ଫିଲ୍ଡିଂ ଟିମକୁ ଗୋଟିଏ ଓଭର ଶେଷ କରିବାର 60 ସେକେଣ୍ଡ ମଧ୍ୟରେ ଆରମ୍ଭ କରିବାକୁ ହେବ ନୂଆ ଓଭର । ଏକ ଇଲେକଟ୍ରୋନିକ୍ କ୍ଲକ୍ 60ରୁ ଶୂନ ଯାଏ ଚାଲିବ । ପଡ଼ିଆରେ ଏହି କାଉଣ୍ଟଡାଉନ୍ ଡିସପ୍ଲେ ହେବ । ଆଉ ଥାର୍ଡ ଅମ୍ପାୟର ଏହା ଉପରେ ନଜର ରଖିବେ । ନିର୍ଦ୍ଧାରିତ 60 ସେକେଣ୍ଡ ମଧ୍ୟରେ ଯଦି ଫିଲ୍ଡଂ ଟିମ ନୂଆ ଓଭରର ପ୍ରଥମ ବଲ୍ ବୋଲିଂ କରିବାକୁ ଅସମର୍ଥ ହୁଏ, ତେବେ ୱାର୍ଣ୍ଣିଂ ମିଳିବ ଦୁଇଥର । ତେବେ ମ୍ୟାଚ୍ ବେଳେ ବୋଲିଂ ଟିମ ଦ୍ୱାରା ଯଦି ବାରମ୍ବାର ନିୟମର ଉଲଂଘନ ହୁଏ, ପେନାଲିଟି 5 ରନ୍ ମିଳିବ ।

ତେବେ ମ୍ୟାଚର କିଛି ପରିସ୍ଥିତିରେ ଏହି ନିୟମ କୋହଳ କରିପାରନ୍ତି ଅମ୍ପାୟାର । ନୂଆ ବ୍ୟାଟର ପଡ଼ିଆକୁ ଆସୁଥିଲେ, କିମ୍ବା ଅଫିସିଆଲ ଡ୍ରିଂକ୍ସ ବ୍ରେକ୍ ହୋଇଥିଲେ କ୍ଳକ୍ ବନ୍ଦ ରହିବ । ଯଦି କ୍ଳକ୍ ଚାଲୁଥାଏ ଅଧାରୁ ଅମ୍ପାୟାରଙ୍କୁ ବନ୍ଦ କରିବାକୁ ହେବ । କୌଣସି ବ୍ୟାଟର କିମ୍ବା ଫିଲ୍ଡରଙ୍କୁ ପଡ଼ିଆରେ ଚିକିତ୍ସା ପାଇଁ ଅମ୍ପାୟର ଅନୁମତି ଦେଇଥିଲେ କିମ୍ବା ବୋଲିଂ ଟିମର ନିୟନ୍ତ୍ରଣ ବାହାରେ କିଛି କାରଣ ପାଇଁ ଖେଳ ବନ୍ଦ ଥିଲେ ଏହି ନିୟମ ଲାଗୁ ହେବ ନାହିଁ ।

ଡିସେମ୍ବର 2023ରେ ଷ୍ଟପ କ୍ଳକ୍ ନିୟମକୁ ଟ୍ରାଏଲ ବେସିସରେ ଲାଗୁ କରିଥିଲା ଆଇସିସି । ନୂଆ ନିୟମ ଲାଗୁ ହେଲେ ନିର୍ଦ୍ଧାରିତ ସମୟରେ ମ୍ୟାଚ ସାରିବା ସହଜ ହେବ ହେବ ବୋଲି ଅନୁଭବ କରିଛି ଆଇସିସି ।