Shubman Gill: ଅଧିନାୟକ ଭାବରେ ପ୍ରଥମ ମ୍ୟାଚ୍‌ରେ ଇତିହାସ ରଚିଲେ ଗିଲ୍, ଶତକ ମାରି ବିରାଟ-ଗାଭାସ୍କରଙ୍କ ହେଲେ ସମକକ୍ଷ

ଶୁଭମନ ଗିଲ୍‌ ଇଂଲଣ୍ଡ ବିପକ୍ଷ ସିରିଜର ପ୍ରଥମ ମ୍ୟାଚ୍‌ରେ ଶତକ ହାସଲ କରିଛନ୍ତି । ଅଧିନାୟକ ଭାବରେ ଏହା ତାଙ୍କର ପ୍ରଥମ ଟେଷ୍ଟ ଇନିଂସ ଥିଲା, ଯେଉଁଥିରେ ସେ ଶତକ ହାସଲ କରି ଇତିହାସ ସୃଷ୍ଟି କରିଛନ୍ତି । ଅଧିନାୟକ ଭାବରେ ତାଙ୍କର ଡେବ୍ୟୁ ଟେଷ୍ଟ ଇନିଂସ୍‌ରେ ଶତକ ହାସଲ କରିବାରେ ସେ ଚତୁର୍ଥ ଭାରତୀୟ ଖେଳାଳି ହୋଇଛନ୍ତି। ତାଙ୍କ ପୂର୍ବରୁ ବିରାଟ କୋହଲି, ସୁନୀଲ ଗାଭାସ୍କର ଏବଂ ବିଜୟ ହଜାରେ ଏହି ରେକର୍ଡ ସ୍ଥାପନ କରିଛନ୍ତି । ରୋହିତ ଶର୍ମାଙ୍କ ଟେଷ୍ଟ ଅବସର ପରେ ଶୁଭମନ ଗିଲଙ୍କୁ ଭାରତୀୟ ଟେଷ୍ଟ ଦଳର ଅଧିନାୟକ ନିଯୁକ୍ତ କରାଯାଇଥିଲା । ସେ ଇଂଲଣ୍ଡ ବିପକ୍ଷରେ ଚାଲିଥିବା ଟେଷ୍ଟରେ ଅଧିନାୟକ ଭାବରେ ତାଙ୍କର ପ୍ରଥମ ମ୍ୟାଚ୍ ଖେଳୁଛନ୍ତି । ଏହି ମ୍ୟାଚ୍‌ରେ ସେ ୧୪୦ ବଲ୍‌ରେ ତାଙ୍କର ଶତକ ପୂରଣ କରିଥିଲେ ।

ଅଧିନାୟକ ଭାବରେ ତାଙ୍କର ଡେବ୍ୟୁ ଟେଷ୍ଟ ଇନିଂସରେ ଶତକ ହାସଲ କରିଥିବା ପ୍ରଥମ ଭାରତୀୟ ଥିଲେ ବିଜୟ ହଜାରେ, ଯିଏ ୧୯୫୧ ମସିହାରେ ଇଂଲଣ୍ଡ ବିପକ୍ଷରେ ଅପରାଜିତ ୧୬୪ ରନ କରିଥିଲେ । ତାଙ୍କ ପରେ, ସୁନୀଲ ଗାଭାସ୍କର ୧୯୭୬ ମସିହାରେ ନ୍ୟୁଜିଲାଣ୍ଡ ବିପକ୍ଷରେ ଅଧିନାୟକ ଭାବରେ ତାଙ୍କର ପ୍ରଥମ ଟେଷ୍ଟ ଇନିଂସରେ ୧୧୬ ରନ କରିଥିଲେ । ବିରାଟ କୋହଲି ମଧ୍ୟ ୨୦୧୪ ମସିହାରେ ଅଧିନାୟକ ଭାବରେ ଦାୟିତ୍ୱ ଗ୍ରହଣ କରିବା ସମୟରେ ତାଙ୍କର ପ୍ରଥମ ଇନିଂସରେ ୧୧୫ ରନ କରିଥିଲେ। ଏବେ ଶୁଭମନ ଗିଲ ମଧ୍ୟ ଏହି କିମ୍ବଦନ୍ତୀ ତାଲିକାରେ ସାମିଲ ହୋଇଛନ୍ତି।

ଅଧିକ ପଢ଼ନ୍ତୁ: କ’ଣ ରହିବ ଟିମ ଇଣ୍ଡିଆର ଲାଇନ ଅପ, ସସପେନ୍ସ ଉପରୁ ପରଦା ଉଠାଇଲେ ପନ୍ତ

ସେପଟେ ଶୁଭମନ ଗିଲ୍‌ ଟେଷ୍ଟ କ୍ରିକେଟରେ ପ୍ରଥମ ଥର ପାଇଁ ୪ ନମ୍ବରରେ ବ୍ୟାଟିଂ କରୁଛନ୍ତି । ପୂର୍ବରୁ ବିରାଟ କୋହଲି ଏହି ସ୍ଥାନରେ ବ୍ୟାଟିଂ କରୁଥିଲେ, କିନ୍ତୁ ସେ ଏବେ ଅବସର ନେଇଛନ୍ତି। ଇଂଲଣ୍ଡ ବିପକ୍ଷ ସିରିଜ ପୂର୍ବରୁ ଶୁଭମନ ଗିଲ ତାଙ୍କ ୩୨ ମ୍ୟାଚ୍ ବିଶିଷ୍ଟ ଟେଷ୍ଟ କ୍ୟାରିୟରରେ ୧୮୯୩ ରନ୍ କରିଥିଲେ। ଏବେ ଇଂଲଣ୍ଡ ବିପକ୍ଷରେ ୧୦୭ ରନ୍ କରି ସେ ଟେଷ୍ଟ ଫର୍ମାଟରେ ୨୦୦୦ ରନ୍ ପୂରଣ କରିଛନ୍ତି। ସେ ତାଙ୍କର ୬୦ତମ ଟେଷ୍ଟ ଇନିଂସରେ ଏହି ସଫଳତା ହାସଲ କରିଛନ୍ତି ।