ଭାରତ-ପାକିସ୍ତାନ ମ୍ୟାଚ୍‌, ଖେଳାଳିଙ୍କୁ ପଡ଼ିଲା ମହଙ୍ଗା ! ଲାଗିଲା ଜୋରିମାନା, ୪୦ ପ୍ରତିଶତ କଟିବ ମ୍ୟାଚ୍‌ ଫି'

ସାରା ବିଶ୍ୱ ଜାଣିଛି ଭାରତ ପାକିସ୍ତାନ ମ୍ୟାଚ୍‌ ଏକ ହାଇଭୋଲଟେଜ୍‌ ମ୍ୟାଚ୍‌ । ସାରା ବିଶ୍ୱର ନଜର ଏହି ମ୍ୟାଚ୍‌ ଉପରେ ଥାଏ । ଚଳିତ ଏସିଆ କପ୍‌ରେ ଗତ ୨୮ ତାରିଖରେ ଭାରତ ଓ ପାକିସ୍ତାନ ମୁହାଁମୁହିଁ ହୋଇଥିଲେ । ଆଉ ଏହି ମ୍ୟାଚ୍‌କୁ ଦର୍ଶକ ସବୁ ଉପଭୋଗ କରିଥିଲେ । କାରଣ ଏହା ଖୁବ୍‌ ସଂଘର୍ଷପୂର୍ଣ୍ଣ ରହିଥିଲା । ଏମିତିକି ଶେଷ ଓଭର ପର୍ଯ୍ୟନ୍ତ ମ୍ୟାଚ୍‌ ଚାଲିଥିଲା । ଶେଷ ଓଭରରେ ବି, କିଏ ବାଜି ମାରିବ ତାହା ଆକଳନ କରିବା କଷ୍ଟକର ଥିଲା।

ତେବେ ଏହି ରୋମାଞ୍ଚକର ମ୍ୟାଚ୍ ଭିତରେ ଉଭୟ ଦଳକୁ ଜରିମାନା କରାଯାଇଛି। ଆଇସିସି ଦ୍ୱାରା ଭାରତ ଏବଂ ପାକିସ୍ତାନ ଦଳକୁ ୪୦ ପ୍ରତିଶତ ଜୋରିମାନା କରାଯାଇଛି । ମନ୍ଥର ଓଭର ପାଇଁ ଆଇସିସି ପକ୍ଷରୁ ଏହି ଜୋରିମାନା କରାଯାଇଛି । ଉଭୟ ଦଳ ନିଜ ଫିଲ୍ଡିଂ ସମୟରେ, ଓଭର ଶେଷ କରିବାର ନିର୍ଦ୍ଧାରିତ ସମୟଠାରୁ ଅଧିକ ସମୟ ନେଇଥିଲେ। ଏହି ଜରିମାନା ଖେଳାଳିଙ୍କ ମ୍ୟାଚ୍ ଫି ଉପରେ ଆଧାରିତ, ଅର୍ଥାତ୍ ଭାରତୀୟ ଦଳ ଏଥିରେ ଅଧିକ କ୍ଷତି ସହିଛି । କାରଣ ଭାରତୀୟ ଖେଳାଳିଙ୍କ ମ୍ୟାଚ୍ ଫି, ପାକିସ୍ତାନୀ ଖେଳାଳିଙ୍କ ତୁଳନାରେ ବହୁତ ଅଧିକ।

ମ୍ୟାଚ୍ ରେଫରି ଜେଫ୍ କ୍ରୋଏଙ୍କ ଅନୁଯାୟୀ; ରୋହିତ ଶର୍ମା ଏବଂ ବାବର ଆଜାମ, ଉଭୟ ଅଧିନାୟକ ପ୍ରାୟ ଦୁଇ ଓଭର ପଛରେ ଚାଲୁଥିଲେ। ଆଇସିସି ନିଜ ବିବୃତିରେ କହିଛି ଯେ, ଖେଳାଳି କିମ୍ବା ସେମାନଙ୍କ ସହଯୋଗୀଙ୍କ ଯୋଗୁଁ ଯଦି ନିର୍ଦ୍ଧାରିତ ସମୟ ମଧ୍ୟରେ ଓଭର ନ ସରେ ତେବେ ପ୍ରତି ଓଭର ପିଛା ୨୦ ପ୍ରତିଶତ ମ୍ୟାଚ୍‌ ଫି କଟାଯିବାର ନିୟମ ରହିଛି । ଏନେଇ ଆଇସିସି ଆଚରଣ ସଂହିତା ଧାରା ୨.୨୨ରେ ସ୍ପଷ୍ଟ ଲେଖା ଅଛି ।

ଆଇସିସି ଆହୁରି ମଧ୍ୟ କହିଛି ଯେ, ଉଭୟ ଦଳର ଅଧିନାୟକ ସେମାନଙ୍କର ଭୁଲ ସ୍ୱୀକାର କରିଛନ୍ତି ଏବଂ ସେମାନେ ଜରିମାନା ଆଦେଶକୁ ଗ୍ରହଣ କରିଛନ୍ତି । ତେଣୁ ଏନେଇ ଆନୁଷ୍ଠାନିକ ଘୋଷଣା କରିବା କରିବାର କୌଣସି ଆବଶ୍ୟକତା ପଡ଼ିନାହିଁ । ମଇଦାନରେ ଉପସ୍ଥିତ ଥିବା ଦୁଇ ଅମ୍ପାୟାର, ତୃତୀୟ ଅମ୍ପାୟାର ଏବଂ ଚତୁର୍ଥ ଅମ୍ପାୟାର, ଦୁଇ ଦଳ ମଧ୍ୟରେ ଏହି ଅଭିଯୋଗ ଆଣିଥିଲେ ।