IPL Final 2025: ଯେଉଁ ଟିମ୍ ଜିତେ କ୍ୱାଲିଫାୟର-୧, ସେହି ଟିମ୍‌ ୧୪ରୁ ୧୧ ଥର ଜିତିଛି IPL ଟାଇଟଲ୍‌

ଆସନ୍ତାକାଲି ଅର୍ଥାତ ଜୁନ୍‌ ୩ରେ ଖେଳାଯିବ ଆଇପିଏଲ ମେଗା ଫାଇନାଲ । ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଏହି ମ୍ୟାଚ୍‌ ଖେଳାଯିବ । ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ପଞ୍ଜାବ କିଙ୍ଗ୍ସ ମଧ୍ୟରେ ଫାଇନାଲ ଫାଇଟ୍‌ ଅନୁଷ୍ଠିତ ହେବ । ତେବେ ଚଳିତ ଥର ଆଇପିଏଲରେ ନୂଆ ଚାମ୍ପିଅନ୍‌ ଦେଖିବାକୁ ମିଳିବ । କାହିଁକି ନା ଉଭୟ ପଞ୍ଜାବ ଓ ବେଙ୍ଗାଲୁରୁ ଏପର୍ଯ୍ୟନ୍ତ ଆଇପିଏଲରେ କୌଣସି ଟ୍ରଫି ଜିତିନାହାନ୍ତି ।

ଅଧିକ ପଢ଼ନ୍ତୁ: ୱାର୍ଲ୍ଡ ନଂ ୧ ଖେଳାଳିଙ୍କୁ ହରାଇଲେ ଗୁକେଶ; ବିଚଳିତ ହେଲେ ମାଗନସ୍...

ତେବେ ଏହି ଫାଇନାଲ ମ୍ୟାଚ୍‌ ପୂର୍ବରୁ ନ୍ୟୁ ଚଣ୍ଡିଗଡ଼ରେ ଖେଳାଯାଇଥିବା ପ୍ରଥମ କ୍ୱାଲିଫାୟାର ମ୍ୟାଚ୍‌ରେ ପଞ୍ଜାବ କିଙ୍ଗ୍ସକୁ ପରାସ୍ତ କରି ପ୍ରଥମ ଦଳ ଭାବେ ଫାଇନାଲରେ ପ୍ରବେଶ କରିଥିଲା ବେଙ୍ଗାଲୁରୁ । ତେବେ ଦ୍ୱିତୀୟ କ୍ୱାଲିଫାୟାର ମ୍ୟାଚ୍‌ରେ ପଞ୍ଜାବ କିଙ୍ଗ୍ସ ମୁମ୍ବାଇ ଇଣ୍ଡିଆନ୍ସକୁ ପାଞ୍ଚ ୱିକେଟରେ ପରାସ୍ତ କରି ଫାଇନାଲରେ ପ୍ରବେଶ କରିଛି । ଏହା ସହିତ, ଆଇପିଏଲ୍ ଇତିହାସରେ ଦ୍ୱିତୀୟ ଥର ପାଇଁ ପଞ୍ଜାବ ଫାଇନାଲରେ ପ୍ରବେଶ କରିଛି । ଏହା ପୂର୍ବରୁ ପଞ୍ଜାବ ୨୦୧୪ରେ ଆଇପିଏଲ୍ ଫାଇନାଲ୍ ଖେଳିଥିଲା । କିନ୍ତୁ ଏହି ମ୍ୟାଚ୍‌ରେ ପରାଜର ସ୍ୱାଦ ଚାଖିଥିଲା ।

ସେହିପରି ବେଙ୍ଗାଲୁରୁ ମଧ୍ୟ ୯ ବର୍ଷ ପରେ ଆଇପିଏଲ ଫାଇନାଲ ଖେଳିବାକୁ ଯାଉଛି । ପୂର୍ବରୁ ଆରସିବି ୨୦୦୯, ୨୦୧୧ ଏବଂ ୨୦୧୬ରେ ଫାଇନାଲ ଖେଳିଥିଲା ।

ସେପଟେ ଯଦି ଆଇପିଏଲ ଇତିହାସ କଥା ଦେଖିବା ତାହାଲେ, ୧୪ ଥର ମଧ୍ୟରୁ ୧୧ ଥର, ଯେଉଁ ଦଳ ପ୍ରଥମ କ୍ୱାଲିଫାୟାର ଜିତିଛି, ସେହି ଦଳ ଆଇପିଏଲ ଟ୍ରଫି ନିଜ ନାଁରେ କରିଛି । ୨୦୦୮ରୁ ୨୦୧୦ ମସିହା ପର୍ଯ୍ୟନ୍ତ ଆଇପିଏଲର ନକ୍‌ଆଇଟ୍‌ ମ୍ୟାଚ୍‌ ସେମି ଫାଇନାଲ ଫର୍ମାଟରେ ଖେଳାଯାଉଥିଲା । ସେହି ସମୟରେ ଦୁଇଟି ସେମିଫାଇନାଲ ଏବଂ ଗୋଟିଏ ଫାଇନାଲ ମ୍ୟାଚ୍‌ ଖେଳାଯାଉଥିଲା ।

କିନ୍ତୁ ୨୦୧୧ ମସିହାରେ ଏହି ନିୟମରେ ପରିବର୍ତ୍ତନ ହୋଇଥିଲା ଏବଂ ପ୍ଲେ ଅଫ୍‌ ‍ଆରମ୍ଭ ହୋଇଥିଲା । ନୂଆ ସିଷ୍ଟମ୍ ଅନୁଯାୟୀ, ପଏଣ୍ଟ ଟେବୁଲରେ ଶୀର୍ଷ-୨ରେ ଥିବା ଦଳଗୁଡ଼ିକୁ ଫାଇନାଲରେ ପହଞ୍ଚିବା ପାଇଁ ଦୁଇଟି ସୁଯୋଗ ମିଳିଥାଏ। ନୂତନ ପ୍ଲେ-ଅଫ୍ ସିଷ୍ଟମ ପ୍ରଚଳନ ହେବା ପରଠାରୁ, ୨୦୨୪ ପର୍ଯ୍ୟନ୍ତ, କ୍ୱାଲିଫାୟର-୧ ଜିତିଥିବା ଦଳ ସେହି ସିଜନରେ ୧୧ ଥର ଟ୍ରଫି କବଜା କରିଛି । ତେବେ ଚଳିତ ଥର ଏହି ରେକର୍ଡ ରିପିଟ୍‌ ହେଉଛି ନା ନାହିଁ ତାହା ଜୁନ୍‌ ୩ ପରେ ହିଁ ଜଣାପଡ଼ିବ ।

ଅଧିକ ପଢ଼ନ୍ତୁ: ବଢିଲା କଳ୍ପନା, ଆରମ୍ଭ ହେଲା ଚର୍ଚ୍ଚା: ଧଳା ଜର୍ସି ପିନ୍ଧି ପୁଣି କମାଲ୍‌ କରିବେ କି ରନ୍‌ ମେସିନ୍‌ ?