• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Satyendu Shekher Mishra

କିଏ ହେବେ ଓଡିଶାର ନୂଆ ରାଜ୍ୟପାଳ ? ରାଜ୍ୟର ପ୍ରଥମ ନାଗରିକ ଭାବେ କାହାକୁ ମିଳିବ ଏ ଗୁରୁତ୍ୱପୂର୍ଣ୍ଣ ଦାୟିତ୍ୱ ? ତାକୁ ନେଇ ଏବେ ଚର୍ଚ୍ଚା । ଯେହେତୁ ଏବେକାର ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କ କାର୍ଯ୍ୟକାଳ ମେ’ ୨୯ରେ ଅର୍ଥାତ୍ ଆଜି ସରୁଛି ଓ ରାଷ୍ଟ୍ରପତି ଭବନ ପକ୍ଷରୁ ଓଡ଼ିଶା ପାଇଁ ନୂଆ ରାଜ୍ୟପାଳଙ୍କ ନାଁ ଘୋଷଣା ହୋଇନି । ତେଣୁ ବର୍ତ୍ତମାନର ରାଜ୍ୟପାଳ ହିଁ ନୂଆ ରାଜ୍ୟପାଳ ନଆସିବା ଯାଏଁ ଦାୟିତ୍ୱରେ ରହିବେ ।

୨୦୧୮ ମେ’ ୨୯ରେ ପ୍ରଫେସର ଗଣେଶୀ ଲାଲ୍ ଓଡିଶା ରାଜ୍ୟପାଳ ଭାବେ ଶପଥ ନେଇଥିଲେ। ନିଜ କାର୍ଯ୍ୟକାଳକୁ ଗଣେଣୀ ଲାଲ୍ ବେଶ ସୁଚାରୁରୂପେ ଓ ନିର୍ବିବାଦୀୟ ଭାବେ ତୁଲାଇଛନ୍ତି । ତାସହ ଜିଲ୍ଲା ଜିଲ୍ଲା ବୁଲି ସାଧାରଣ ଲୋକଙ୍କ ବିଭିନ୍ନ କାର୍ଯ୍ୟକ୍ରମରେ ବି ଯୋଗ ଦେଇଛନ୍ତି । ଜଣେ ସରଳ ଅମାୟିକ ରାଜ୍ୟପାଳ ଭାବେ ଗଣେଣୀ ଲାଲ୍ ବେଶ୍ ଲୋକପ୍ରିୟ ହୋଇପାରିଛନ୍ତି । ହରିୟାଣାର ମୂଳବାସିନ୍ଦା ପ୍ରଫେସର ଗଣେଶୀ ଲାଲ୍ ସେଠାକାର ରାଜ୍ୟ ବିଜେପି ସଭାପତି ରହିବା ସହ ମନ୍ତ୍ରୀ ଭାବେ ବି ଦାୟିତ୍ୱ ତୁଲାଇଥିଲେ। ଓଡିଶା ରାଜ୍ୟପାଳ ହେବା ପରଠୁ ବିଜେଡି ସରକାରଙ୍କ ସହ ତାଙ୍କର କେବେ କୌଣସି ବିବାଦ ଦେଖାଯାଇନି । ସରକାରଙ୍କ ସହ ଉତ୍ତମ ସମନ୍ବୟ ରକ୍ଷା କରି ସେ ତାଙ୍କ ୫ବର୍ଷ କାର୍ଯ୍ୟକାଳ ଶେଷ କରିଛନ୍ତି। ତେଣୁ ଆଗକୁ ତାଙ୍କ ସ୍ଥାନ କିଏ ନେବ ? ତାକୁ ରାଜ୍ୟବାସୀଙ୍କ ଅପେକ୍ଷା ।

ଯଦିଓ ଅନେକ ରାଜ୍ୟରେ ସରକାର-ରାଜ୍ୟପାଳ ବିବାଦ ନଜରକୁ ଆସିଛି ହେଲେ ଓଡିଶାରେ ସେମିତି କିଛି ନାହିଁ। ଯେହେତୁ ଓଡ଼ିଶାରେ ବିଜେଡିକୁ ସ୍ପଷ୍ଟ ବହୁମତ ମିଳିଥିଲା, ତେଣୁ ସରକାର ପ୍ରତି କୌଣସି ସମୟରେ ବିପଦ ନଥିଲା। କିନ୍ତୁ ଏବେ ରାଜନୈତିକ ପାଣିପାଗ କିଛି ଅଲଗା କହୁଛି ଓ ଆଗକୁ ନିର୍ବାଚନ ଆସୁଛି। ତେଣୁ ଯିଏ ଓଡ଼ିଶାର ନୂଆ ରାଜ୍ୟପାଳ ହେବେ, ତାଙ୍କ ପାଇଁ କାର୍ଯ୍ୟକାଳ ବେଶ୍ ଚ୍ୟାଲେଞ୍ଜିଂ ହେବ । ଯଦି ନିର୍ବାଚନରେ ସଂଖ୍ୟା ଗଣିତ ଏପଟ ସେପଟେ ହେଲା ତାହାଲେ ରାଜ୍ୟପାଳଙ୍କ ଭୂମିକା ଗୁରୁତ୍ୱପୂର୍ଣ୍ଣ ହେବ । ତେଣୁ ଯାହାଙ୍କୁ ଏହି ଗୁରୁ ଦାୟିତ୍ବ ମିଳିବ, ସେ ରାଜ୍ୟ ସରକାରଙ୍କ ସହ କେତେ ସମନ୍ୱୟ ରକ୍ଷା କରୁଛନ୍ତି ତାହା ବି ଦେଖିବାର କଥା। କେବେ ନୂଆ ରାଜ୍ୟପାଳ ଆସିବେ, ଏବେ ତାକୁ ଅପେକ୍ଷା।


  • Reported by:
  • PRADEEP MAHANTY , HARIHARA CHAND , KAPILENDRA PRADHAN