LIVE TV
ତେଜିଲା ଭୁବନେଶ୍ବର ବିଜେଡି ବିବାଦ । ଗତକାଲି ଶଙ୍ଖ ଭବନ ହଙ୍ଗାମା ପରେ ଘନେଇଲା ବ୍ଲେମ୍ ଗେମ୍ । ପୂର୍ବତନ ମନ୍ତ୍ରୀ ଅଶୋକ ପଣ୍ଡାଙ୍କ ଇଙ୍ଗିତରେ ବିଶୃଙ୍ଖଳା ଭିଆଯାଇଛି ବୋଲି ଅଭିଯୋଗ ଆଣିଲେ ଦଳର ଦୁଇ ବିଦ୍ରୋହୀ କର୍ପୋରେଟର । ଆଜି ଗଣମାଧ୍ୟମକୁ ପ୍ରତିକ୍ରିୟା ଦେଇ ଅମରେଶ ଜେନା ଓ ବିରଞ୍ଚି ମହାସୂପକାର କହିଛନ୍ତି ଅଶୋକ ପଣ୍ଡାଙ୍କ ପାଇଁ ଭୁବନେଶ୍ବର ବିଜେଡିରେ ବିଶୃଙ୍ଖଳା ଦେଖା ଦେଉଛି । ଗତକାଲି ଶଙ୍ଖ ଭବନକୁ ଜଣେ ବିଜେପି ସଦସ୍ୟ ରାଜେଶ ପାତ୍ରଙ୍କୁ ଆଣି ଅଶୋକ ଗଣ୍ଡଗୋଳ କରାଇଛନ୍ତି । ଏନେଇ ଆମେ ସୁପ୍ରିମୋଙ୍କୁ ଅଭିଯୋଗ କରିବୁ।
Also Read
ଖାଲି ସେତିକି ନୁହେଁ ଅଶୋକଙ୍କୁ କଡା ଭାଷାରେ ସମାଲୋଚନା କରି କହିଛନ୍ତି ପରାଜୟ ପରେ ସେ ରାଜନୀତିରୁ ସନ୍ନ୍ୟାସ ନେଇ ଲୋକ ସେବା କରିବା କଥା । ତେବେ ଅମରେଶ ଓ ବିରଞ୍ଚିଙ୍କ ଅଭିଯୋଗ ନେଇ ଅଶୋକ ପଣ୍ଡା ପ୍ରତିକ୍ରିୟା ଦେବାକୁ ମନା କରିଦେଇଥିବାବେଳେ ଏକାମ୍ର ନିର୍ବାଚନ ମଣ୍ଡଳୀର ବିଜେଡି ସଭାପତି ଘଟଣାକୁ ଖଣ୍ଡନ କରିଛନ୍ତି ।
୨୦୨୪ ନିର୍ବାଚନ ଟିକେଟ ବଣ୍ଟନ ସମୟରୁ ଭୁବନେଶ୍ବର ବିଜେଡିରେ କଳି ବଢିବାରେ ଲାଗିଛି । ଅମରେଶ ଓ ବିରଞ୍ଚି ସିଧାସଳଖ ଅଶୋକ ପଣ୍ଡା ଓ ଅନନ୍ତନାରାୟଣ ଜେନାଙ୍କୁ ଖୋଲାଖୋଲି ବିରୋଧ କରିଆସୁଛନ୍ତି । ଏକାମ୍ର ନିର୍ବାଚନ ମଣ୍ଡଳୀରେ ଅଶୋକ ପଣ୍ଡା ପରାଜିତ ହୋଇଥିବାବେଳେ ଭୁବନେଶ୍ବର ମଧ୍ୟ ନିର୍ବାଚନ ମଣ୍ଡଳୀରେ ମାତ୍ର ୩୭ ଖଣ୍ଡ ଭୋଟରେ ବିଜୟୀ ହୋଇଥିଲେ ଅନନ୍ତ । ଆଉ ଏବେ କଳି ତୀବ୍ର ରୂପ ଧାରଣ କରିଛି। ଅମରେଶ ଓ ବିରଞ୍ଚିଙ୍କୁ କୋଣଠେସା କରିବାକୁ ଅନ୍ୟ କର୍ପୋରେଟରଙ୍କୁ ନେଇ ବିରୋଧ ଆରମ୍ଭ ହୋଇଛି । ରାଜନୈତିକ ସମୀକ୍ଷକଙ୍କ ମତ ହେଲା ଆଗାମୀ ଦିନରେ ଏହି କନ୍ଦଳ ପାଇଁ ଭୁବନେଶ୍ବରରେ ବିଜେଡିକୁ ବଡ଼ ଝଟକା ଲାଗିପାରେ।
ନିର୍ବାଚନ ମଣ୍ଡଳୀର ବିବାଦ ଏବେ ବିଜେଡି ମୁଖ୍ୟାଳୟ ଶଙ୍ଖ ଭବନରେ ପହଞ୍ଚିଲାଣି । ଛାମୁଆ ନେତାଙ୍କ ଉପସ୍ଥିତିରେ ହଙ୍ଗାମା ଆଉ ତା ପରେ କଡ଼ା ବୟାନ ବାଜି ଦଳୀୟ ଶୃଙ୍ଖଳା ଉପରେ ପ୍ରଶ୍ନବାଚୀ ଲଗାଇଛି । ତେବେ ସମାଧାନ ପାଇଁ ସୁପ୍ରିମୋ କି ପଦକ୍ଷେପ ନେଉଛନ୍ତି ତାଉପରେ ନଜର ।
- Reported by:
- JAGDISH DAS , KAPILENDRA PRADHAN , ATULYA BOUT
