ରତ୍ନଭଣ୍ଡାର ଲେଜର ସ୍କାନିଂ; ରାଜ୍ୟ ସରକାରଙ୍କୁ ବିଜେପିର ଟାର୍ଗେଟ୍‌

ରତ୍ନଭଣ୍ଡାର ଲେଜର ସ୍କାନିଂକୁ ନେଇ ରାଜ୍ୟ ସରକାରଙ୍କୁ ବିଜେପିର ଟାର୍ଗେଟ । ରାଜ୍ୟ ସରକାରଙ୍କ ଯୋଜନାବଦ୍ଧ ଷଡ଼ଯନ୍ତ୍ର କହିଲେ ସମୀର ମହାନ୍ତି । ରତ୍ନଭଣ୍ଡାର ନ ଖୋଲି ଲେଜର ସ୍କାନିଂ ଯୋଜନାବଦ୍ଧ ଷଡ଼ଯନ୍ତ୍ର ବୋଲି ସମୀର କହିଛନ୍ତି । ରତ୍ନଭଣ୍ଡାର ଖୋଲିବା ଦାୟିତ୍ୱ ସଂପୂର୍ଣ୍ଣ ସରକାରଙ୍କର ।

କେବଳ ସୁପାରିସ କରିବା କ୍ଷମତା ଗଜପତିଙ୍କ ଅଛି । ୧୯୫୨ ମସିହାରେ ସ୍ୱତନ୍ତ୍ର ଆଇନ କରି ଜଗନ୍ନାଥ ମନ୍ଦିର ପରିଚାଳନା ପାଇଁ ନିଷ୍ପତ୍ତି ନେଇ ଗଜପତିଙ୍କ ଠାରୁ କ୍ଷମତା ନେଇଗଲେ । ତେଣୁ ରତ୍ନ ଭଣ୍ଡାର ଖୋଲିବା ଦାୟିତ୍ୱ ସମ୍ପୂର୍ଣ୍ଣ ସରକାରଙ୍କର ବୋଲି ସମୀର କହିଛନ୍ତି । ହାଇକୋର୍ଟ ଓ ଗଜପତିଙ୍କ ସୁପାରିସ କାହିଁକି କାର୍ଯ୍ୟକାରୀ କରୁନାହାନ୍ତି ବୋଲି ସମୀର ପ୍ରଶ୍ନ କରିଛନ୍ତି ।

ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ସରକାର ତୁରନ୍ତ କମିଟି ଗଠନ କରନ୍ତୁ । କମିଟି ଗଠନ ନକଲେ କଣ୍ଟେପ୍ଟ ଅଫ କୋର୍ଟ ଫାଇଲ କରିବାକୁ ବିଜେପି ଚେତାବନୀ ଦେଇଛି । ପରିକ୍ରମା ପ୍ରକଳ୍ପ ପୂର୍ବରୁ କମିଟି ଗଢ଼ି ରତ୍ନଭଣ୍ଡାର ଖୋଲିବାକୁ ଦାବି କରିଛି ବିଜେପି । ତେବେ ସମୀରଙ୍କ ଅଭିଯୋଗ ନେଇ ରାଜ୍ୟ ସରକାରଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।