ପ୍ରଦୀପଙ୍କ ବଡ଼ ଘୋଷଣା, ବିରାଟ କାର୍ଯ୍ୟକ୍ରମ ଆୟୋଜନ କରି କହିଲେ ବିଜେଡିରେ ମିଶିବି

ଭୁବନେଶ୍ୱର: ପୂର୍ବତନ ନବରଂପୁର ସାଂସଦ ପ୍ରଦୀପ ମାଝି ବିଜେଡିରେ ଯୋଗଦେବେ । ଏନେଇ ଆଜି ନବରଙ୍ଗପୁରରେ ଏକ ସାମ୍ବାଦିକ ସମ୍ମିଳନୀ କରି ସେ ଘୋଷଣା କରିଛନ୍ତି । ଏହି କାର୍ଯ୍ୟକ୍ରମରେ ପ୍ରଦୀପଙ୍କ ଶତାଧିକ ସମର୍ଥକ ଯୋଗଦେଇଥିଲେ । ଏକ ବିରାଟ କାର୍ଯ୍ୟକ୍ରମର ଆୟୋଜନ କରି ପ୍ରଦୀପ ମାଝି ନିଜର ସମର୍ଥକଙ୍କ ଗହଣରେ ଏହି ଘୋଷଣା କରିଛନ୍ତି ।

ସେ କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହାତମୁଠାକୁ ଟାଣ କରିବୁ । ବର୍ତ୍ତମାନ କଂଗ୍ରେସ ସହ ପାଦ ମିଶାଇ ଚାଲିବା ଅସମ୍ଭବ । ବିଜେଡି ରାଜ୍ୟରେ ସ୍ଥିର ସରକାର ଦେବାରେ ସଫଳ ହୋଇଛି । ପ୍ରତି ନିର୍ବାଚନରେ ସଂଖ୍ୟା ବୃଦ୍ଧି କରି ଦେଶରେ ଇତିହାସ ରଚିଛି । ଏହି ଅଞ୍ଚଳର ବିକାଶ ପାଇଁ ମୁଖ୍ୟମନ୍ତ୍ରୀ ପ୍ରତିଶ୍ରୁତିବଦ୍ଧ । ଅବିଭକ୍ତ କୋରାପୁଟ ଜିଲ୍ଲାବାସୀ ସେହି ସ୍ରୋତରେ ସାମିଲ ହୁଅନ୍ତୁ ବୋଲି ଆହ୍ୱାନ୍‌ କରିଛନ୍ତି ପ୍ରଦୀପ ।

ତେବେ ଗତ କିଛି ଦିନ ଧରି ପ୍ରଦୀପ ବିଜେଡିରେ ସାମିଲ ହେବେ ବୋଲି ଚର୍ଚ୍ଚା ହେଉଥିଲା । ହେଲେ ପରେ ସେ ଏହାକୁ ଖଣ୍ଡନ କରିଥିଲେ । ଦିଲ୍ଲୀରେ କଂଗ୍ରେସ ହାଇକମାଣ୍ଡଙ୍କୁ ଭେଟିବା ପରେ ସେ କହିଥିଲେ ‘ମୁଁ କଂଗ୍ରେସରେ ଅଛି ଆଉ ରହିବି’ । କିନ୍ତୁ ଏହାର କିଛି ଦିନ ପରେ ପୁଣି ତାଙ୍କର ଆଚରଣ ଓ ଉଚାରଣରେ ବ୍ୟତିକ୍ରମ ଦେଖାଦେଇଥିଲା । ଆଉ ଯେଉଁ ପ୍ରଦୀପ ଦିନେ ନବୀନ ସରକାରଙ୍କୁ ବାରମ୍ବାର ଅଡ଼ୁଆରେ ପକାଉଥିଲେ ସେହି ପ୍ରଦୀପଙ୍କ ମୁହଁରେ ନବୀନ ଓ ବିଜେଡିର ପ୍ରଶଂସା ଶୁଣିବାକୁ ମିଳିଥିଲା । ଓଟିଭିକୁ ଦେଇଥିବା ଏକ ସାକ୍ଷାତକାରରେ ପ୍ରଦୀପ ପରୋକ୍ଷରେ ସୂଚାଇ ଦେଇଥିଲେ ଯେ, ସେ ବିଜେଡିରେ ଯୋଗଦେବାକୁ ଯାଉଛନ୍ତି । କଂଗ୍ରେସରେ ଲୋକଙ୍କ ସେବା କରିବାର ସୁଯୋଗ ନାହିଁ । ଯେଉଁ ଦଳରେ ଲୋକଙ୍କର ସେବା କରିବାର ସୁଯୋଗ ମିଳିବ ସେହି ଦଳକୁ ସେ ଯିବେ । ଏଥିରେ କିଛି ଅସୁବିଧା ନାହିଁ ବୋଲି ପ୍ରଦୀପ କହିଥିଲେ ।

Also Read

ଆଜି ୧୨ ଘଣ୍ଟିଆ ମୟୂରଭଞ୍ଜ ଓ କଳାହାଣ୍ଡି ବନ୍ଦ

ସିଲ୍‌ କଭର୍‌ର ସିକ୍ରେଟ୍‌ ମୁଖ୍ୟମନ୍ତ୍ରୀଙ୍କୁ ଅଜଣା

“୮ ଥର ଆଲୋଚନା ପରେ ବିଜେଡ଼ିରେ ମିଶିବାକୁ ନିଷ୍ପତ୍ତି ନେଲି”

ଏହି ସମାନ କଥା ଦର୍ଶାଇ ରାଜ୍ୟ କଂଗ୍ରେସର ପୂର୍ବତନ କାର୍ଯ୍ୟକାରୀ ସଭାପତି ପ୍ରଦୀପ ମାଝି ହାଇକମାଣ୍ଡ ସୋନିଆ ଗାନ୍ଧିଙ୍କୁ ନିଜର ଇସ୍ତଫା ପତ୍ର ଦେଇଛନ୍ତି । କଂଗ୍ରେସ ସହ ୨୦ ବର୍ଷର ସମ୍ପର୍କ ଛିନ୍ନ କରି ଆଜି ବିଜେଡିରେ ସାମିଲ ହେବେ ବୋଲି ଘୋଷଣା କରିଛନ୍ତି ପ୍ରଦୀପ । ଦକ୍ଷିଣ ଓଡ଼ିଶାର ଯୁବ ଓ ଦକ୍ଷ ନେତା ଏବଂ ଜାତୀୟ ସ୍ତରରେ ଜଣେ ଟାଣୁଆ ଆଦିବାସୀ ଚେହରା ହେଉଛନ୍ତି ପ୍ରଦୀପ । ଏବେ ବିଜେଡିରେ ସାମିଲ ହେବା ପରେ ଦକ୍ଷିଣ ଓଡ଼ିଶାରେ ବିଜେଡି କବ୍‌ଜା କରିବ ବୋଲି ଆଶା କରାଯାଉଛି । ପ୍ରଦୀପ ନିଜ ଇସ୍ତଫା ପତ୍ରରେ ଆହୁରି ଲେଖିଛନ୍ତି ଯେ, ଦଳ ଏବେ ବିଶ୍ୱାସନୀୟତା ହରାଇଛି । ଦଳରେ କିଛି ମୁଷ୍ଟିମେୟଙ୍କ ରାଜୁତି ଚାଲୁଥିବା ବେଳେ ଏଠାରେ ସେବା କରିବାର ସୁଯୋଗ ନାହିଁ । 

ତେବେ ଏହି ଘଟଣାକୁ ପଞ୍ଚାୟତ ନିର୍ବାଚନ ପୂର୍ବରୁ ରାଜ୍ୟ କଂଗ୍ରେସକୁ ପ୍ରଦୀପ୍ ଝଟକା କହିଲେ ଅତ୍ୟୁକ୍ତି ହେବ ନାହିଁ । ଦୀର୍ଘ ଦିନର ଚର୍ଚ୍ଚା ପରେ ଶେଷରେ ୨୦ ବର୍ଷର ସମ୍ପର୍କ ତୁଟାଇ କଂଗ୍ରେସ ଛାଡ଼ି ବିଜେଡିରେ ସାମିଲ ହେବେ ଦକ୍ଷିଣ ଓଡ଼ିଶାର ଯୁବ, ଦକ୍ଷ ଓ ଟାଣୁଣା ଆଦିବାସୀ ଚେହେରା ପ୍ରଦୀପ ମାଝୀ ।

OTV is now on Whatsapp

Join and get latest news update delivered to you via whatsapp

Join Now