LIVE TV
ଶିକ୍ଷକମୟ ରାଜଧାନୀର ମାହାତ୍ମା ଗାନ୍ଧୀ ମାର୍ଗ । ପିଏମ୍ଜି ଛକରୁ ମାଷ୍ଟର କ୍ୟାଣ୍ଟିନ୍ । ଦୁଇ ଦିନ ଧରି ସ୍କୁଲ ଛାଡ଼ି ଧାରଣାରେ ହଜାର ହଜାର ଶିକ୍ଷକ । ଖୁଦ ପକାଇବାକୁ ରାହା ନାହିଁ । ତାରି ଭିତରେ ପାତର ଅନ୍ତର ନୀତିକୁ ନେଇ ସରକାର ବିରୋଧୀ ନାରାବାଜି, ବିକ୍ଷୋଭ, ପ୍ଲାକାର୍ଡ ପ୍ରଦର୍ଶନ । ଏପରିକି ଦାବି ପୂରଣ ନହେଲେ ପଦ୍ମପୁର ଓ ୨୦୨୪ ନିର୍ବାଚନରେ ଶାସକ ଦଳକୁ ଧାମନଗର ଭଳି ପ୍ରଭାବ ଦେବାକୁ ବି ଚେତାବନୀ ।
Also Read
ପ୍ରାଥମିକ ଶିକ୍ଷାରେ ଚୁକ୍ତିଭିତ୍ତିକ ନିଯୁକ୍ତି ଉଚ୍ଛେଦ ସହ ୨୦୦୧ରୁ ନିଯୁକ୍ତି ପାଇଥିବା ଶିକ୍ଷକମାନଙ୍କୁ ଇନ୍କ୍ରିମେଣ୍ଟ ପ୍ରଦାନ, ପୁରୁଣା ପେନ୍ସନ୍ ବ୍ୟବସ୍ଥା ପୁନଃ ପ୍ରଚଳନ ଭଳି ତିନି ଦଫା ଦାବି ନେଇ ଗତକାଲିଠୁ ବିଧାନସଭା ସମ୍ମୁଖରେ ଏମିତି ଆନ୍ଦୋଳନରେ ବସିଛନ୍ତି ଶିକ୍ଷକ । ଦାବି ପ୍ରତି ସରକାରଙ୍କ ଧ୍ୟାନ ଆକର୍ଷଣ କରିବାକୁ ନିଜକୁ ଫ୍ୟାନ୍ସି ଡ୍ରେସ୍ରେ ବି ସଜାଇଛନ୍ତି କେହି କେହି ଗୁରୁ । କିଏ ଖୋଲା ଦେହରେ ଦାବିକୁ ଲଟ୍କେଇ ଆଦିବାସୀ ବେଶରେ ନିଜକୁ ସଜାଇଛନ୍ତି ତ ଆଉ କିଏ ରାଣୀ ଲକ୍ଷ୍ମୀବାଇ, ମହାତ୍ମା ଗାନ୍ଧି, ପୁଣି ସୁଭାଷ ବୋଷ ବେଶରେ । ଦାବି ପୂରଣ ପାଇଁ ସେଇ ଠାଣିରେ ବି ସରକାରଙ୍କ ଉପରେ ଗର୍ଜନ ।
ବିଧାନସଭା ସାମ୍ନାରେ ଶିକ୍ଷକଙ୍କ ରଣହୁଙ୍କାର ପ୍ରସଙ୍ଗକୁ ନେଇ ବିଧାନସଭା ଭିତରେ ହଟ୍ଟଗୋଳ । ପ୍ରଶ୍ନକାଳ ଆରମ୍ଭରୁ ବିରୋଧୀ ବିଜେପି ଓ କଂଗ୍ରେସ ଶିକ୍ଷକଙ୍କ ଆନ୍ଦୋଳନ କଥା ଉଠାଇ ବାଚସ୍ପତିଙ୍କ ପୋଡ଼ିୟମ୍ ତଳେ ନାରାବାଜି କରିଥିଲେ । ଠିକା ଯୁଗ ଶେଷ ବୋଲି ମୁଖ୍ୟମନ୍ତ୍ରୀଙ୍କ ଘୋଷଣା ପରେ ବି କାହିଁକି ଏମିତି ସ୍ଥିତି ? କାହିଁକି ଶିକ୍ଷକଙ୍କ ନାର୍ଯ୍ୟ ଦାବି ପୂରଣ ଦିଗରେ ସରକାର ପଦକ୍ଷେପ ନେଉ ନାହାନ୍ତି ବୋଲି ପ୍ରଶ୍ନ କରିଥିଲେ । ହଟ୍ଟଗୋଳ ଲାଗିରହିବାରୁ ବାଚସ୍ପତି ଦୁଇ ଦୁଇଥର ଗୃହକୁ ମୁଲତବୀ କରି ସର୍ବଦଳୀୟ ବୈଠକ ଡାକିଥିଲେ । ପରେ ଶିକ୍ଷକ ଆନ୍ଦୋଳନ ପ୍ରତି ସରକାର ସ୍ୱତନ୍ତ୍ର ଧ୍ୟାନ ଦେବାକୁ ବାଚସ୍ପତିଙ୍କ ନିର୍ଦ୍ଦେଶ ପରେ ଗୃହକାର୍ଯ୍ୟ ସ୍ୱାଭାବିକ ହୋଇଥିଲା ।
ଆନ୍ଦୋଳନ ତୀବ୍ରତର ହେଉଥିବା ଦେଖି ଗଣଶିକ୍ଷା ବିଭାଗ ସଚିବ ଏସ୍ ଅଶ୍ୱସ୍ଥି ଆଜି ଶିକ୍ଷକ ପ୍ରତିନିନିଧିଙ୍କ ସହ ଆଲୋଚନା କରିଥିଲେ ବି କୌଣସି ନିଷ୍କର୍ସ ବାହାରି ପାରି ନାହିଁ । ଫଳରେ ଆନ୍ଦୋଳନକୁ ଜାରି ରଖିଛି ସଂଘ ।
