କେଉଁଠି ହେବ ପଶ୍ଚିମ ଓଡ଼ିଶା ବିକାଶ ପରିଷଦର ହେଡ୍ କ୍ୱାର୍ଟର? ଦୀର୍ଘବର୍ଷ ପରେ ବି କାହିଁକି ହୋଇପାରୁନି ସହମତି? କିଏ ପୁରାଉଛି କେଁ? ନେତା ନା ସରକାର? WODCର ହେଡ୍ କ୍ୱାଟର୍ ସ୍ଥାପନ ନେଇ ଛିଣ୍ଡୁନି ଅଙ୍କ । ପରିଷଦ ବୈଠକରେ ବାରମ୍ବାର ଆଲୋଚନା ସତ୍ତ୍ୱେ ସଦସ୍ୟଙ୍କ ମଧ୍ୟରେ ହୋଇପାରୁନି ସହମତି । ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲାର ବିଧାୟକମାନେ ସେମାନଙ୍କ ଜିଲ୍ଲାରେ ପରିଷଦର ହେଡ୍ କ୍ୱାର୍ଟର ସ୍ଥାପନ କରିବାକୁ ଦାବି କରିଛନ୍ତି । ଯାହା ଫଳରେ ସୃଷ୍ଟି ହୋଇଛି ସମସ୍ୟା ।
ବରଗଡ଼, କଳହାଣ୍ଡି ଓ ନୂଆପଡ଼ା ଜିଲ୍ଲା ର ବିଧାୟକମାନେ ଏ ପ୍ରସଙ୍ଗରେ ଜୋରଦାର୍ ଦାବି ଉପସ୍ଥାପନ କରିଛନ୍ତି । ଏପରିକି ଏମ୍ଏଲ୍ଏଙ୍କ ମଧ୍ୟରେ ଏନେଇ ଏକ ପ୍ରକାର ଟଣାଓଟରା ଲାଗିଛି । ପ୍ରଥମେ ୨୦୨୧ ଡିସେମ୍ବର ଓ ପରେ ୨୦୨୨ ମେ ମାସରେ ବସିଥିବା ବୈଠକରେ ଏ ସଂପର୍କରେ ଆଲୋଚନା ହୋଇଥିଲା, ହେଲେ କୌଣସି ନିର୍ଦ୍ଦିଷ୍ଟ ସ୍ଥାନକୁ ନେଇ ସହମତି ହୋଇପାରି ନଥିଲା ।
Also Read
ପଶ୍ଚିମ ଓଡ଼ିଶା ବିକାଶ ପରିଷଦ ମୁଖ୍ୟାଳୟ ଇସ୍ୟୁ ଏକ ସମ୍ବେଦନଶୀଳ ପ୍ରସଙ୍ଗ, ଏହା ପଶ୍ଚିମ ଓଡ଼ିିଶା ଲୋକଙ୍କ ଭାବାବେଗ ସହ ଜଡିତ ଥିବାରୁ ଆସନ୍ତା ୩ ବର୍ଷ ପର୍ଯ୍ୟନ୍ତ ସ୍ଥିତାବସ୍ଥା ବଜାୟ ରଖିବାକୁ ପରିଷଦ ବୈଠକରେ ନିଷ୍ପତ୍ତି ହୋଇଛି । ଅର୍ଥାତ ଆସନ୍ତା ୩ ବର୍ଷ ପର୍ଯ୍ୟନ୍ତ ପରିଷଦର ମୁଖ୍ୟ କାର୍ଯ୍ୟାଳୟ ଭୁବନେଶ୍ୱର ହିଁ ରହିବ । ଆଉ ଏହି ବୈଠକର ବିବରଣୀ ପତ୍ରରେ WODCର ସଦସ୍ୟ ଥିବା ସବୁ ଦଳର ବିଧାୟକ ଓ ସାଂସଦମାନେ ସ୍ୱାକ୍ଷର କରିଛନ୍ତି । ରାଜ୍ୟ ସରକାର ପରିଷଦର ହେଡ୍ କ୍ୱାର୍ଟର ପଶ୍ଚିମ ଓଡିଶାକୁ ସ୍ଥାନ୍ତାନ୍ତର କରିବା ପାଇଁ WODCକୁ ଚିଠି ଲେଖିଥିଲେ । ଉତ୍ତରରେ WODC ଏହା ଉଲ୍ଲେଖ କରିଛି, ଯାହାକୁ ନେଇ ରାଜ୍ୟ ସରକାରଙ୍କ ଉପରେ ଅସନ୍ତୋଷ ଝାଡିଛନ୍ତି ବିରୋଧୀ ।
ପଶ୍ଚିମ ଓଡ଼ିଶାର ସାମଗ୍ରିକ ବିକାଶ ଲକ୍ଷ୍ୟରେ ଗଠନ ହୋଇଥିଲା WODC । ତା ସହିତ ବିକାଶମୂଳକ କାର୍ଯ୍ୟ ପାଇଁ ପରିଷଦକୁ ୨୦୦ କୋଟି ଟଙ୍କାର ପାଣ୍ଠି ପ୍ରଦାନ କରାଯାଇଛି । ପରିଷଦ ଅଧ୍ୟକ୍ଷ ଅସିତ ତ୍ରିପାଠୀ ମଧ୍ୟ ବିଭିନ୍ନ ଜିଲ୍ଲା ଗସ୍ତ କରି ସମୀକ୍ଷା କରୁଛନ୍ତି । ହେଲେ ମୁଖ୍ୟ କାର୍ଯ୍ୟାଳୟ ସ୍ଥାପନ ନେଇ ସହମତି ଆଣିପାରୁ ନଥିବା କୁହାଯାଉଛି । ସେପଟେ ଯୋଜନା ଓ ସଂଯୋଜନ ମନ୍ତ୍ରୀ କହିଛନ୍ତି, ପରିଷଦର ମୁଖ୍ୟାଳୟ ସ୍ଥାନାନ୍ତର ପ୍ରସଙ୍ଗ ଏବେ ହାଇକୋର୍ଟରେ ବିଚାରାଧିନ ରହିଛି ।
ପଶ୍ଚିମ ଓଡିଶାରେ ହାଇକୋର୍ଟ ର ସ୍ଥାୟୀ ବେଂଚ ପ୍ରତିଷ୍ଠା ପ୍ରସଙ୍ଗ ହେଉ କି ସ୍ୱତନ୍ତ୍ର କୋଶଲ ରାଜ୍ୟ ପ୍ରତିଷ୍ଠା ଦାବି, ସବୁଥିରେ ଖୋଦ୍ ପଶ୍ଚିମ ଓଡ଼ିଶାର ଜିଲ୍ଲା-ଜିଲ୍ଲା ମଧ୍ୟରେ ହିଁ ଭିନ୍ନ ମତ ରହିଛି । ଯେଉଁଥିପାଇଁ ପରିଷଦ ହେଡ୍କ୍ୱାର୍ଟର ହେଉ କିମ୍ବା ସ୍ଥାୟୀ ବେଞ୍ଚ କୌଣସି ଗୋଟିଏ ବି ସମ୍ଭବ ହେଉନାହିଁ ।