ସୌମ୍ୟଙ୍କୁ ନେଇ ବିଜେପି ରଖିଲା ମତ; ଏମିତି କହିଲେ ସମୀର ଓ ପୃଥ୍ୱୀରାଜ

ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କ ଦୈନିକ ଖବରକାଗଜ କାର୍ଯ୍ୟାଳୟରେ ଇଓଡବ୍ଲୁ ରେଡ୍ ପ୍ରସଙ୍ଗରେ ରାଜ୍ୟ ସରକାରଙ୍କୁ କଡ଼ା ସମାଲୋଚନା କଲେ ପୂର୍ବତନ ରାଜ୍ୟ ବିଜେପି ସଭାପତି ସମୀର ମହାନ୍ତି । ଏହା ଗଣତନ୍ତ୍ରର କଣ୍ଠରୋଧ ପାଇଁ ଅପଚେଷ୍ଟା । ରାଜନୈତିକ ଅଭିସନ୍ଧି ରଖି ‘ସମ୍ବାଦ’ ଉପରେ ପ୍ରାୟୋଜିତ ରେଡ୍ କରାଯାଇଛି ବୋଲି ସାମ୍ବାଦିକ ସମ୍ମିଳନୀରେ କହିଛନ୍ତି ସମୀର ।

ଏଥିସହ ସେ କହିଛନ୍ତି ଯେ, ସୌମ୍ୟବାବୁ ଯେବେ ଯାଏଁ ବିଜେଡିର ସ୍ୱାର୍ଥ ସାଧନ କରୁଥିଲେ, ସେବେ ଯାଏଁ ସେ ଭଲ ଥିଲେ । ଯେଉଁଦିନ ପ୍ରଶ୍ନ ପଚାରିବା ଆରମ୍ଭ କଲେ, ତା ପରେ ପ୍ରାୟୋଜିତ ରେଡ୍ କରାଗଲା । ଚତୁର୍ଥ ସ୍ତମ୍ଭ ଉପରେ ରାଜନୈତିକ ଅଭିସନ୍ଧି ରଖି ସରକାର ଯେଉଁ କାର୍ଯ୍ୟାନୁଷ୍ଠାନ ନେଇଛନ୍ତି, ଓଡ଼ିଶା ଭଳି ଶାନ୍ତିପ୍ରିୟ ରାଜ୍ୟରେ ତାହା ଗ୍ରହଣୀୟ ନୁହେଁ ବୋଲି କହିଛନ୍ତି ସମୀର ।

ବିଜେପି ନେତା ପୃଥ୍ୱୀରାଜ ହରିଚନ୍ଦନ କହିଛନ୍ତି ଯେ, ଦେଶରେ ଜରୁରୀକାଳୀନ ସ୍ଥିତି ବେଳେ ଯେଉଁଭଳି ଗଣମାଧ୍ୟମ ସ୍ୱାଧୀନତା ନିଶ୍ଚିହ୍ନ ହୋଇଥିଲା, ଏବେ ସମାନ ଅବସ୍ଥା । ଜଣେ ସଚିବ ଯେଉଁଭଳି ମହାରାଜା ଭଳି ବୁଲି ପ୍ରତିଶ୍ରୁତି ବାଣ୍ଟୁଛନ୍ତି, ଗଣତନ୍ତ୍ରରେ ଏଭଳି ବିଧିବିଧାନ ନାହିଁ । ଏକଥାକୁ ଯଦି ଜଣେ ସଂପଦକୀୟ ଆଲେଖ୍ୟ ଲେଖି ସମାଲୋଚନା କଲେ, ସେଥିରେ ପ୍ରତିଶୋଧ ପରାୟଣ ହୋଇ ତାଙ୍କ ସଂସ୍ଥା ଉପରେ ଚଢ଼ଉ କରାଯିବା ସରକାରଙ୍କ ଏକଛତ୍ରବାଦ ଶାସନର ନମୁନା ।

ଅନ୍ୟପକ୍ଷରେ ଏହାର ଜବାବ ରଖି ରାଜସ୍ୱମନ୍ତ୍ରୀ ପ୍ରମିଳା ମଲ୍ଲିକ କହିଛନ୍ତି, କେଉଁଠି ବି ଗଣମାଧ୍ୟମ ଉପରେ ଆକ୍ରମଣ କରାଯାଇନି । ବିଜେଡି ସରକାର କାହା ଉପରେ ଆକ୍ରୋଶ ରଖି ରେଡ୍‌ କରେନି । ଆଇନ୍ କାନୁନ ବ୍ୟବସ୍ଥା ଭିତରେ ସବୁ କିଛି ହେଉଛି ।