LIVE TV
ରକ୍ତରଂଜିତ ହେଲା ନିର୍ବାଚନୀ ରାଜନୀତି । ଗଡ଼ିଲା ରାଜନୈତିକ ଦଳର କର୍ମୀଙ୍କ ମୁଣ୍ଡ। ରକ୍ତରେ ଭିଜିଲା ଖଲ୍ଲିକୋଟ ମାଟି । ରାଜନୈତିକ ହତ୍ୟା ପରେ ରଣକ୍ଷେତ୍ର ପାଲଟିଛି ଇଲାକା । ମୃତକଙ୍କ ସଂପର୍କୀୟ ଓ ସମର୍ଥକ ଉତ୍ତ୍ୟକ୍ତ ହୋଇ କେଉଁଠି ରାସ୍ତାରୋକ କରିଛନ୍ତି । ତ ଆଉ କେହି ଥାନାକୁ ଘେରିଛନ୍ତି । ତେଣେ ହତ୍ୟା ଅଭିଯୁକ୍ତଙ୍କୁ ଗିରଫ କରି ଥାନାକୁ ଆଣିବା ସମୟରେ ପୋଲିସ ଗାଡ଼ି ଉପରକୁ ପଥର ସହ ପାଣି ବୋତଲ ମାଡ଼ ହୋଇଛି। ପୋଲିସ ବି ଲାଠିମାଡ଼ କରିଛି ।
Also Read
ଦିଲୀପ ପାହାନ ନାମକ ଜଣେ ବିଜେପି କର୍ମୀଙ୍କୁ ଗତରାତିରେ ହତ୍ୟା ପରଠୁ ଆଜି ଅପରାହ୍ନ ଯାଏଁ ଲାଗିରହିଥିଲା ଉତ୍ତେଜନାମୂଳକ ସ୍ଥିତି। ଔଷଧ ବିକଳରେ ତାଟିଆ କାମୁଡ଼ିଲା ଭଳି ପୋଲିସ ବି ଥାନା ସାମ୍ନାରେ ରଖାଯାଇଥିବା ଗାଡ଼ିଗୁଡ଼ିକୁ ଏଭଳି ଭଙ୍ଗାରୁଜା କରିଥିଲା । ଏପରିକି ଗଣମାଧ୍ୟମ ପ୍ରତିନିଧିଙ୍କ ଗାଡ଼ିକୁ ବି ପଥରରେ ଛେଚି ଭାଙ୍ଗୁଥିବା ଦେଖିବାକୁ ମିଳିଛି । ଶେଷରେ ଖଲ୍ଲିକୋଟ ଥାନା ନିକଟରେ ୧୪୪ ଧାରା ଜାରି ପରେ ସ୍ଥିତି ନିୟନ୍ତ୍ରଣାଧିନ ଥିବା ସୂଚନା ମିଳିଛି ।
ଅଧିକ ପଢ଼ନ୍ତୁ: ରାସ୍ତାରୁ ହଟାଇବାକୁ ଷଡଯନ୍ତ୍ର କରିଥିଲା କି ଶଙ୍ଖ ଦଳ ? ପ୍ରଦାପଙ୍କ ପାୱାର ଦେଖି ଭେଲକା BJD !
ବୁଧବାର, ରାତି ପ୍ରାୟ ୮ଟା । ଖଲ୍ଲିକୋଟ ଶ୍ରୀକୃଷ୍ଣଶରଣପୁର ଗାଁରେ ବିଜେପିର ବ୍ୟାନର୍ ଲଗାଇବାକୁ କେନ୍ଦ୍ର କରି ଉପୁଜିଥିଲା ତୁମୁଳକାଣ୍ଡ । ବାଇକରେ ୧୦ରୁ ଅଧିକ ବିଜେଡି କର୍ମୀ ଆସି ଦିଲୀପ ପାହାନଙ୍କୁ ଖଣ୍ଡାରେ ହାଣି ହତ୍ୟା କରାଯାଇଥିବା ଅଭିଯୋଗ ହୋଇଛି । ହତ୍ୟାକାଣ୍ଡର ପୂର୍ବଦିନ ବ୍ୟାନର ମରାକୁ ନେଇ ଧମକ ଦିଆଯାଇଥିବା ନେଇ ଥାନାର ଦ୍ୱାରସ୍ଥ ହୋଇଥିଲେ ଦିଲୀପ । କିନ୍ତୁ, ପୋଲିସ କୌଣସି ଆକ୍ସନ ନେଇ ନ ଥିବା ଅଭିଯୋଗ ହୋଇଛି । ୨ ମାସ ତଳେ ବିଜେଡି ଛାଡ଼ି ବିଜେପିରେ ମିଶିଥିଲେ ଦିଲୀପ । ବିଜେଡିରେ ଥାଇ ଖଲ୍ଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟଙ୍କୁ ଦିଲୀପ କୁଆଡ଼େ ବିରୋଧ କରିଆସୁଥିଲେ । ଏପରିକି ସୂର୍ଯ୍ୟମଣିଙ୍କ ବଦଳରେ ଅନ୍ୟ କାହାକୁ ଟିକଟ ଦେବାକୁ ନବୀନ ନିବାସ ଆସି ଦାବି କରିଥିଲେ ।
ତେବେ ଏହି ହତ୍ୟାକାଣ୍ଡ ପଛରେ ଦିବଂଗତ ଖଲ୍ଲିକୋଟ ରାଣୀ ସୁଜ୍ଞାନ କୁମାରୀ ଦେଓଙ୍କ ପୁତୁରା ସାକେତ ରାମାରାଓଙ୍କ ଆଡ଼କୁ ଇଙ୍ଗିତ କରିଛି ବିଜେପି । ବିଜେପିର ଲୋକସଭା ସଂଯୋଜକ ଯଜ୍ଞ ନାରାୟଣ ଦାଶଙ୍କ କହିବା କଥା, ଗତରାତିରେ ରାଣୀଙ୍କ ବଙ୍ଗଳାରେ ଭୋଜିଭାତ ଚାଲିଥିଲା। ସେଠାରେ ଷଡ଼ଯନ୍ତ୍ର ରଚି ବିଜେପି କର୍ମୀଙ୍କୁ ହମଲା କରାଯାଇଥିଲା। ତେବେ ଅଭିଯୋଗ ନେଇ ସାକେତ ରାମାରାଓଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
ଆସନ୍ତା ୨୦ରେ ଖଲ୍ଲିକୋଟରେ ପଡ଼ିବ ଭୋଟ୍ । ତା’ପୂର୍ବରୁ ଏଭଳି ରାଜନୈତିକ ହିଂସାକୁ ନିନ୍ଦା କରିବା ସହ ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ । କହିଛନ୍ତି, ଗଣତନ୍ତ୍ରରେ ହିଂସାର ସ୍ଥାନ ନାହିଁ । ପୋଲିସ ଘଟଣାର ସଠିକ୍ ତଦନ୍ତ କରି କାର୍ଯ୍ୟାନୁଷ୍ଠାନ ନେବ । ତେଣେ ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା କହିଛନ୍ତି, ଗଣତନ୍ତ୍ରକୁ ଗୁଣ୍ଡାତନ୍ତ୍ରରେ ପରିଣତ କରିବାକୁ ଶାସକ ଦଳର ହୀନ ପ୍ରୟାସ । ହାରିବା ଭୟରେ ବିଜେଡି ହିଂସାତ୍ମକ କାଣ୍ଡ ଭିଆଉଛି । ସେହିପରି ରାଜ୍ୟ ବିଜେପି ସଭାପତି ବି ଘଟଣାର ତୀବ୍ର ନିନ୍ଦା କରିଛନ୍ତି। ଅପରପକ୍ଷେ ହିଂସା ନିୟନ୍ତ୍ରଣ ପାଇଁ ବିଧି ସମ୍ମତ ପଦକ୍ଷେପ ନେବାକୁ ଗଞ୍ଜାମ ଜିଲ୍ଲାପାଳ ଏବଂ ଏସପିଙ୍କୁ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିର୍ଦ୍ଦେଶ ଦେଇଛନ୍ତି।
ଅଧିକ ପଢ଼ନ୍ତୁ: ପୁଣି ଆଚରଣବିଧି ଉଲଂଘନ! ସରକାରୀ କର୍ମଚାରୀ ବିଜେଡି ପାଇଁ ପ୍ରଚାର କରୁଥିବା ଅଭିଯୋଗ
- Reported by:
- Partha Sarathi nayak , Silu Biswal , Jagannath Sahu
