LIVE TV
ପକାଇଲା ଛେପ ଢ଼ୋକିଲେ ସୁର ! ପୁଅ ପାଇଁ କଲେ ବିଜେଡି ପ୍ରଚାର । ମଞ୍ଚରେ ଚଢ଼ିଲେ... ପାଣ୍ଡିଆନଙ୍କୁ ସ୍ୱାଗତ କଲେ । ଆଉ ବିଜୁ ଜନତା ଦଳ ପାଇଁ ମାଗିଲେ ଭୋଟ୍ । ଜଟଣୀରେ ଆୟୋଜିତ ହୋଇଥିବା ଏକ ସଭାରେ ଦେଖିବାକୁ ମିଳିଥିଲା ଏହି ଦୃଶ୍ୟ...
Also Read
ଗତ ଏପ୍ରିଲ ମାସ ୧୫ ତାରିଖରେ ସୁରଙ୍କୁ କଂଗ୍ରେସ ବହିସ୍କୃତ କରିଥିଲା । ବିଶୃଙ୍ଖଳିତ ଆଚରଣ ଓ ଦଳ ବିରୋଧୀ କାର୍ଯ୍ୟ ପାଇଁ ୬ ବର୍ଷ ଯାଏଁ ସୁରଙ୍କ ପାଦରେ ବେଡି ପକାଇଥିଲା ଦଳ । ହେଲେ ସୁର ଦଳରୁ ବହିଷ୍କାର ହେବା ପରେ ପୂରା କଂଗ୍ରେସ ନେତୃତ୍ୱ ଉପରେ ଖୁବ୍ ବର୍ଷିଥିଲେ । ଆଉ ସେ ଜଣେ କଂଗ୍ରେସର ଶୃଙ୍ଖଳିତ କର୍ମୀ ବୋଲି ବାରମ୍ବାର କହୁଥିଲେ ।
ହେଲେ ଏବେ ଯେମିତି ସୁରଙ୍କର ସେହି କଥା ପାଇକ ପୁଅର ନୁହେଁ ବରଂ ପାଣିର ଗାର ପରି ଦୃଶ୍ୟମାନ ହୋଇଛି । ବାରମ୍ବାର ନୀତି, ନୈତିକତା ଓ ଜଣେ ଶୃଙ୍ଖଳିତ କର୍ମୀ ବୋଲି କହି ଆସୁଥିବା ସୁର ଆଜି ପୁତ୍ର ମୋହରେ ଯେମିତି ଅନ୍ଧ ହୋଇଯାଇଛନ୍ତି । ଖାଲି ବିଜେଡିର ପ୍ରଚାର ନୁହେଁ, ବାରମ୍ବାର ଯେଉଁ ଭି.କେ ପାଣ୍ଡିଆନ୍ଙ୍କୁ ସେ ଟାର୍ଗେଟ୍ କରିଆସୁଥିଲେ ତାଙ୍କୁ ମଞ୍ଚର ମୁଖ୍ୟ ଅତିଥି କହି ସ୍ୱାଗତ କରୁଛନ୍ତି । ସତରେ ସୁରଙ୍କ ଏହି ଅଚାନକ ପାଗ ପରିବର୍ତ୍ତନ ସାଧାରଣରେ ବେଶ୍ ଚର୍ଚ୍ଚାର ବିଷୟ ପାଲଟିଛି ।
ଖାଲି ଏତିକି ଯେ ତାହା ନୁହେଁ, ମଞ୍ଚରେ ଛିଡ଼ାହୋଇ ପାଣ୍ଡିଆନ୍ ଆସିବା ସମୟରେ ଉପସ୍ଥିତ ଥିବା ମହିଳା ଓ ପୁରୁଷମାନଙ୍କୁ ହୁଳହୁଳି କରତାଳି ଦେବାକୁ କହୁଛନ୍ତି ସୁର । ଯାହାର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ରାଜନୀତି ମୈଦାନକୁ ନ ଓହ୍ଲାଇ ମଧ୍ୟ ଜଣେ କଂଗ୍ରେସର ବରିଷ୍ଠ ନେତା ବିଜେଡି ପାଇଁ ବାରମ୍ବାର ପ୍ରଚାର କରିବା ଏବେ ଚର୍ଚ୍ଚାର ବିଷୟ ପାଲଟିଛି । ସବୁଠାରୁ ବଡ଼ କଥା ହେଉଛି, ବାରମ୍ବାର ସ୍ୱାଭିମାନର ଦମ୍ଭୋକ୍ତି ଦେଖାଉଥିବା ସୁରଙ୍କ ସତ ଏବେ ପଦାରେ ପଡ଼ିଛି ।
- Reported by:
- Niranjan Behera
