ପୁଣି ECIଙ୍କ ବଦଳି ଛାଟ...୨ ଜିଲ୍ଲାପାଳ, ୫ ଏସପି ଓ କେନ୍ଦ୍ରାଞ୍ଚଳ IGଙ୍କୁ ଟ୍ରାନସଫର୍ ଅର୍ଡର

ପୁଣି ECIଙ୍କ ବଦଳି ଛାଟ । ଏଥର ଆସିଛି ୨ ଜିଲ୍ଲାପାଳ, ୫ ଏସପି ଓ କେନ୍ଦ୍ରାଞ୍ଚଳ ପୋଲିସ୍ ଆଇଜିଙ୍କୁ ଟ୍ରାନସଫର୍ ଅର୍ଡର । ଯେଉଁଥିରେ କଟକ କଲେକ୍ଟର ବୀନିତ ଭରଦ୍ୱାଜ ଓ ଜଗତସିଂହପୁର କଲେକ୍ଟର ପାରୁଲ ପଟୱାରୀଙ୍କୁ ଆସିଛି ବଦଳି ଆଦେଶ । ସେମିତି ୫ SP, ଯେମିତିକି- ଅନୁଗୁଳ ଏସପି ସୁଧାଂଶୁ ଶେଖର ମିଶ୍ର, ବ୍ରହ୍ମପୁର ଏସପି ଶ୍ରବଣା ବିବେକ, ଖୋର୍ଦ୍ଧା ଏସପି ବି. ଯୁଗଳ କିଶୋର, ରାଉରକେଲା ଏସପି ମିତ୍ରଭାନୁ ମହାପାତ୍ର ଓ କଟକ ଡିସିପି କନୱର ବିଶାଲ ସିଂହଙ୍କ ସହ କେନ୍ଦ୍ରାଞ୍ଚଳ ଆଇଜି ଆଶିଷ ସିଂହଙ୍କୁ ବି ଆସିଛି ବଦଳି ନିର୍ଦ୍ଦେଶ । ଭାରତୀୟ ନିର୍ବାଚନ କମିଶନ୍, ନିଜ ନିର୍ଦ୍ଦେଶନାମାରେ ସ୍ପଷ୍ଟ ଭାବେ ଉଲ୍ଲେଖ କରିଛନ୍ତି-ଏସବୁ ଅଫିସରମାନଙ୍କୁ ନିର୍ବାଚନ ସଂପର୍କିତ କାମ ନଥିବା ପଦବୀକୁ ହିଁ ବଦଳି କର । ତା ସହ ବଦଳି ନିର୍ଦ୍ଦେଶାନାମା ଉପରେ କି ପ୍ରକାର ଆକ୍ସନ ନେଲ, ସନ୍ଧ୍ୟା ୫ଟା ସୁଦ୍ଧା ଅବଗତ କରିବାକୁ ବି ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ ଇସିଆଇ ।

ଏଠି ପ୍ରଶ୍ନ- ସାଧାରଣ ନିର୍ବାଚନ ଭଳି ଏକ ଘଡ଼ିସନ୍ଧି ମୁହୂର୍ତ୍ତରେ ହଠାତ୍ କାହିଁକି ଆଠ ଆଠ ଜଣ ଟପ୍ ଅଫିସରଙ୍କୁ ଇସିଆଇଙ୍କ ପାଖରୁ ଆସିଲା ବଦଳି ନିର୍ଦ୍ଦେଶ ? କ’ଣ ଦୀର୍ଘ ଦିନ ଧରି ଏମାନେ ନିର୍ଦ୍ଦିଷ୍ଟ ସ୍ଥାନରେ କାମ କରୁଥିଲେ ? ନା ଏମାନଙ୍କ ବିରୋଧରେ ଥିଲା ଡ୍ୟୁଟିରେ ପକ୍ଷପାତିତା ଅଭିଯୋଗ ? ତାହା ସ୍ପଷ୍ଟ ହୋଇନଥିବା ବେଳେ ବଦଳିକୁ ନେଇ ତେଜିଛି ରାଜନୈତିକ ବୟାନବାଜି । କଂଗ୍ରେସ ଓ ବିଜେପିଙ୍କ ଅଭିଯୋଗ ବ୍ଲକ୍ ଅଫିସରୁ ଉପରସ୍ତର ଯାଏଁ ସବୁଠି ସରକାରୀ କର୍ମଚାରୀ ଓ ଅଧିକାରୀମାନେ ଶାସକ ଦଳର କର୍ମୀଭାବେ କାମ କରୁଛନ୍ତି । ଇସିଆଇ ଯାହା ପଦକ୍ଷେପ ନେଇଛନ୍ତି ତାହା ସ୍ୱାଗତଯୋଗ୍ୟ, ଆଗକୁ ଏଭଳି ପଦକ୍ଷେପ ଜାରି ରହିଲେ ନିରପେକ୍ଷ ନିର୍ବାଚନ ଆଶା କରାଯାଇପାରେ। ତେବେ ଏନେଇ ବିଜେଡିର ପ୍ରତିକ୍ରିୟା ମିଳିନାହିଁ ।

ପୂର୍ବରୁ ଗତ ମାର୍ଚ୍ଚ ୨୧ରେ ECIଙ୍କ ପକ୍ଷରୁ ମଧ୍ୟ ଆସିଥିଲା ଏକ ବଦଳି ନିର୍ଦ୍ଦେଶ । ସେତେବେଳେ ଢେଙ୍କାନାଳ ଜିଲ୍ଲାପାଳ ମନୋରଞ୍ଜନ ମଲ୍ଲିକଙ୍କ ସହ ଦେବଗଡ଼ ଜିଲ୍ଲା ଆରକ୍ଷୀ ଅଧିକ୍ଷକ ରାମ ପ୍ରସାଦ ସାହୁ ଓ କଟକ ଗ୍ରାମାଞ୍ଚଳ ଏସପି ମିହିର ପଣ୍ଡାଙ୍କୁ ବଦଳି ପାଇଁ ଆସିଥିଲା ଅର୍ଡର। ଏମାନେ ସମସ୍ତେ ଅଣକ୍ୟାଡର ଅଫିସର ହୋଇଥିବାରୁ ନିର୍ବାଚନ ସମୟରେ ସେମାନଙ୍କୁ ବଦଳି ନିର୍ଦ୍ଦେଶ ଦେଇଥିଲେ ଭାରତୀୟ ନିର୍ବାଚନ କମିଶନ।