LIVE TV
ସରିଲା ତୃତୀୟ ପର୍ଯ୍ୟାୟ ନିର୍ବାଚନ । ଆରମ୍ଭ ହେଲା ବୟାନବାଜି । ବିଜେଡି ସୁପ୍ରିମୋ, ଗତକାଲି ରାଜ୍ୟରେ ସ୍ଥିର ସରକାର ଗଠନ ନେଇ ମନ୍ତବ୍ୟ ଦେବା ପରେ ତେଜିଲା ରାଜନୀତି । ଅନେକ ବିଦ୍ରୋହ ଓ ବିରୋଧୀ ହାୱା ଥିଲେ ବି ନବୀନ କିନ୍ତୁ ବେଶ୍ କନ୍ଫିଡେଣ୍ଟ । କିନ୍ତୁ ବିଜେପି କହିଛି, ଲୋକେ ମନ ବଦଳାଇ ସାରିଛନ୍ତି । ଦୁଇ ତୃତୀୟାଂଶ ସିଟ୍ ଦଖଲ କରି ରାଜ୍ୟରେ ଗଠନ ହେବ ବିଜେପି ସରକାର । ରାଜ୍ୟରେ ବଢୁଥିବା ମୋଦିଙ୍କ ଲୋକପ୍ରିୟତା ବିଜେପିକୁ ବଳ ଯୋଗାଇଛି। ଖାଲି ସେତିକି ନୁହେଁ ପ୍ରଧାନମନ୍ତ୍ରୀଙ୍କ ସମେତ ଶାହ, ନଡ୍ଡାଙ୍କ ଭଳି ମାଳ ମାଳ କେନ୍ଦ୍ରୀୟ ନେତାଙ୍କ ଗସ୍ତ ଓ ପ୍ରଚାର ଗେମ୍ ଚେଞ୍ଜର ହୋଇପାରେ। ଏପେଟେ ବିଜେପି ଓ ବିଜେଡିର ସରକାର ଗଠନ ପାଇଁ ସଂଖ୍ୟା ବୟାନ ବାଜିକୁ କଡ଼ା ସମାଲୋଚନା କରିଛି କଂଗ୍ରେସ୍ । ଏ ଦୁଇ ଦଳକୁ ଲୋକେ ଜବାବ୍ ଦେବେ ବୋଲି ମତ ରଖିଛି କଂଗ୍ରେସ ।
Also Read
୩ଟି ପର୍ଯ୍ୟାୟରେ ରାଜ୍ୟର ୧୫ ଲୋକସଭା ଓ ୧୦୫ ବିଧାନସଭା ନିର୍ବାଚନ ମଣ୍ଡଳୀରେ ମତଦାନ ସରିଛି । ଯାହା ଟ୍ରେଣ୍ଡ୍ କହୁଛି ଏଥର ମତଦାନ ହାର ବଢୁଛି । ଏପରିକି କମ୍ ମତଦାନ ହେଉଥିବା ରାଜଧାନୀ ଭୁବନେଶ୍ୱରରେ ବି ଏଥର ଭୋଟିଂ ପର୍ସେଣ୍ଟେଜ୍ ବଢ଼ିଛି । ୨୦୧୯ରେ ରାଜ୍ୟରେ ମତଦାନ ହାର ଥିଲା ୭୩.୦୨ ପ୍ରତିଶତ । ଆଉ ଭୁବନେଶ୍ୱରରେ ଥିଲା ୫୯.୦୫ ପ୍ରତିଶତ। ଏଥର କିନ୍ତୁ ଭୁବନେଶ୍ୱର ସଂସଦୀୟ କ୍ଷେତ୍ରରେ ୬୨% ମତଦାନ ହୋଇଛି ।
ସେହିପରି ରାଜ୍ୟରେ ପ୍ରଥମ ପର୍ଯ୍ୟାୟରେ ୭୩.୯୭, ଦ୍ୱିତୀୟ ପର୍ଯ୍ୟାୟରେ ୭୩.୫ ଏବଂ ତୃତୀୟ ପର୍ଯ୍ୟାୟରେ ପ୍ରାୟ ୭୧ ପ୍ରତିଶତ ମତଦାନ ହୋଇଛି । ରାଜନୈତିକ ସମୀକ୍ଷକଙ୍କ ମତ ହେଲା ମତଦାନ ହାର ବଢ଼ିଲେ ଏହା ପରିବର୍ତ୍ତନ ଆଡ଼କୁ ଇଶାରା ଦେଇଥାଏ । ସେ ଦୃଷ୍ଟିରୁ ଦେଖିଲେ ରାଜ୍ୟ ରାଜନୀତିରେ ଆଗକୁ ରୋଚକ ମୋଡ଼ ଦେଖିବାକୁ ମିଳିପାରେ । ଓଡ଼ିଶାରେ ପରିବର୍ତ୍ତନର ହାୱା କେତେ କାମ ଦେଉଛି ଓ ରାଜନୈତିକ ସମୀକରଣ କେଉଁ ଆଡ଼କୁ ଯାଉଚି ତା ଉପରେ ନଜର ।
- Reported by:
- JAGDISH DAS , SOUMYA RANJAN SAHOO
