LIVE TV
ପୁଣି ଥରେ ସାମ୍ନାସାମ୍ନି ହେଲେ ଭୁବନେଶ୍ୱର ସାଂସଦ ଅପରାଜିତା ଷଢ଼ଙ୍ଗୀ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭୁବନେଶ୍ୱରର ଜୟଦେବ ବିହାର ନିକଟରେ ନବ ନିିର୍ମିତ ଭେଙ୍କଟେଶ୍ୱର ସ୍ୱାମୀ ମନ୍ଦିରର ପ୍ରତିଷ୍ଠା ଉତ୍ସବରେ ସାମ୍ନାସାମ୍ନି ହୋଇଛନ୍ତି ମୁଖ୍ୟମନ୍ତ୍ରୀ ଓ ଭୁବନେଶ୍ୱର ସାଂସଦ । ତେବେ ଏଠାରେ କେହି କାହାକୁ କିଛି କହିନାହାନ୍ତି । କେବଳ ପରସ୍ପରକୁ ନମସ୍କାର ଜଣାଇ ଚାଲିଯାଇଥିଲେ । ତେବେ ଏକା ସମୟରେ ସାଂସଦ ଓ ମୁଖ୍ୟମନ୍ତ୍ରୀ ଗୋଟିଏ କାର୍ଯ୍ୟକ୍ରମରେ ପହଞ୍ଚିଥିବାରୁ ସ୍ଥାନୀୟ ଅଞ୍ଚଳରେ ଏହା ଚର୍ଚ୍ଚାର ବିଷୟ ହୋଇଥିଲା ।
Also Read
ସେଠାରେ ଉପସ୍ଥିତ ସାଧାରଣ ଜନତାଙ୍କଠାରୁ ଆରମ୍ଭ କରି ନେତା ମନ୍ତ୍ରୀ ଓ ସାମ୍ବାଦିକମାନେ ଚାତକ ଭଳି ଚାହିଁ ରହିଥିଲେ । କ’ଣ ଘଟୁଛି ? କିଏ କାହାକୁ କ’ଣ କହୁଛି ? ସେଥିପ୍ରତି ସମସ୍ତଙ୍କ ନଜର ରହିଥିଲା । ହେଲେ ସେଭଳି କିଛି ଘଟିନଥିଲା ।
#ପୁଣି_ସାମ୍ନାସାମ୍ନି_ନବୀନ_ଅପରାଜିତା
— ଓଟିଭି (@otvkhabar) May 26, 2022
ଭୁବନେଶ୍ୱର ତିରୁପତି ଭେଙ୍କେଟେଶ୍ୱର ମନ୍ଦିର ଉଦ୍ଘାଟନ ଉତ୍ସବରେ ସାମ୍ନାସାମ୍ନି ହେଲେ ନବୀନ - ଅପରାଜିତା । ତେବେ କେହି କାହାକୁ କିଛି ନକହି ପରସ୍ପରକୁ ନମସ୍କାର ଜଣାଇ ଚାଲିଯାଇଥିଲେ ।#Odisha #Politics #AparajitaSarangi pic.twitter.com/4lw4e4EhwQ
ଜୟଦେବ ବିହାରସ୍ଥିତ ଏହି ମନ୍ଦିରର ଉଦ୍ଘାଟନୀ ଉତ୍ସବ ସପ୍ତାହେ ଧରି ଚାଲିଥିଲା । ଆଜି ଉଦଯାପନୀ ଦିବସ ଉଦଯାପନୀ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇଥିଲେ । ଏହାସହ ଆନ୍ଧ୍ରପ୍ରଦେଶ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ, ତିରୁମାଲା-ତିରୁପତି ଦେବସ୍ଥାନମ ପରିଚାଳନା ଟ୍ରଷ୍ଟର ଅଧ୍ୟକ୍ଷ କେ. ସୁବ୍ବାରାଓ ରେଡ୍ଡି ପ୍ରମୁଖ ଯୋଗ ଦେଇଥିଲେ । ଓଡ଼ିଶାରେ ମହାପ୍ରଭୁ ତିରୁପତିଙ୍କ ମନ୍ଦିର ପ୍ରତିଷ୍ଠା ହେବା ଆନନ୍ଦର କଥା ବୋଲି ଆନ୍ଧ୍ର ରାଜ୍ୟପାଳ କହିଛନ୍ତି । ଯିଏ ତିରୁପତି ଯାଇ ପାରିବନି ଅନ୍ତତଃ ଏଠାରେ ମହାପ୍ରଭୁଙ୍କ ଦର୍ଶନ କରିପାରିବେ ବୋଲି କୁହାଯାଇଛି ।
ତେବେ ଏହାପୂର୍ବରୁ ମଧ୍ୟ ସାଂସଦ ଅପରାଜିତା ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସଂସଦ ଭବନରେ ଅଚାନକ ଭେଟ ହୋଇଥିଲେ । ସେଠାରେ ମଧ୍ୟ ସାଂସଦ ଅପରାଜିତା ମୁଖ୍ୟମନ୍ତ୍ରୀଙ୍କୁ ସମ୍ମାନ ଜଣାଇ ନମସ୍କାର କରିଥିଲେ ।
