LIVE TV
ପୌର ନିର୍ବାଚନ ପ୍ରଚାରରେ କମ୍ପୁଛି ମୈଦାନ । ଏଥର ସିଧାସଳଖ ଅଧ୍ୟକ୍ଷ ନିର୍ବାଚନ ହେଉଥିବାରୁ ଅନେକ ଆଶାୟୀ, ସ୍ୱାଧୀନ ପ୍ରାର୍ଥୀ ଭାବେ ଚେୟାରମ୍ୟାନ ହେବାପାଇଁ ମନ ବଳାଇଛନ୍ତି । ସେମାନଙ୍କର ଆଶା ଓ ଭରସା ରହିଛି ଯେ ଲୋକେ ନିଶ୍ଚିତ ଭାବରେ ତାଙ୍କୁ ଭୋଟ ଦେଇ ଜିତାଇବେ । ବିଭିନ୍ନ ରାଜନୈତିକ ଦଳ ସମେତ ଅନ୍ୟ ପ୍ରାର୍ଥୀମାନେ ପୋଷ୍ଟର ବ୍ୟାନର ଓ ମାଇକ୍ ଲଗାଇ ଭୋଟରଙ୍କ ଧ୍ୟାନ ଆକର୍ଷଣ କରିବା ସହିତ କର୍ମୀ ଓ ସମର୍ଥକଙ୍କ ସହ ବିଭିନ୍ନ ସାହି ବସ୍ତିରେ ବୁଲି ପ୍ରଚାର କରୁଥିବା ଦେଖିବାକୁ ମିଳୁଛି ।
ତେବେ ଚଳିତ ନିର୍ବାଚନରେ ଏମିତିବି କିଛି ପ୍ରାର୍ଥୀ ଅଛନ୍ତି, ଯେଉଁମାନଙ୍କ ପାଖରେ ନା ଅଛନ୍ତି କର୍ମୀ ନା ସମର୍ଥକ । ପୋଷ୍ଟର ବ୍ୟାନର ଖଣ୍ଡେ କରିବାକୁ ପାଖରେ ଅର୍ଥ ବି ନାହିଁ । ତଥାପି ଜିତାପଟ କରିବାର ରହିଛି ଏମାନଙ୍କର ପ୍ରବଳ ଇଛା ଓ ଆତ୍ମ ବିଶ୍ୱାସ । ନିଜପାଇଁ ନିଜେ ସାଜିଛନ୍ତି ଷ୍ଟାର ପ୍ରଚାରକ । ଏକୁଟିଆ ଘରକୁ ଘର ଯାଇ ଚଳାଇଛନ୍ତି ପ୍ରଚାର । ଦେଖନ୍ତୁ ଏହି ରିପୋର୍ଟ ।
Also Read
ଇଏ ହେଉଛନ୍ତି ବଡ଼ବିଲ ପୌରାଧ୍ୟକ୍ଷ ପ୍ରାର୍ଥୀ ବ୍ରହ୍ମାନନ୍ଦ ପାଢ଼ୀ । ପାଗଳା ନନା ଭାବେ ବଡ଼ବିଲରେ ବେଶ୍ ପରିଚିତ ସେ । ପେଷାରେ ସେ ହେଉଛନ୍ତି ଜଣେ ପୂଜକ । ବଡ଼ବିଲ ଚେୟାରମ୍ୟାନ ହେବାକୁ ତାଙ୍କର ପ୍ରବଳ ଇଛା । ସେ କହଛନ୍ତି କି ମାନବ ସେବାହିଁ ମାଧବ ସେବା । ଚେୟାରମ୍ୟାନ ହେଲେ ସେ ବଡ଼ବିଲର ସର୍ବାଙ୍ଗୀନ ବିକାଶ କରିବେ ବୋଲି ଏକୁଟିଆ ଘରକୁ ଘର ଯାଇ ଲୋକଙ୍କୁ କହି ଭୋଟ ଭିକ୍ଷା କରୁଛନ୍ତି ।
ସେ କହୁଛନ୍ତି କି ଅର୍ଥ କିମ୍ବା ସାମର୍ଥ୍ୟ ତାଙ୍କପାଖରେ ନାହିଁ । ତେଣୁ ସକାଳ ହେଲେ ନିଜ ସ୍କୁଟି ସହ କେଇଖଣ୍ଡ ପୁଶିଂ କାର୍ଡ ଧରି ପାଗଳା ନନା ଏକୁଟିଆହିଁ ବାହାରି ପଡନ୍ତି ପ୍ରଚାର ମୈଦାନକୁ । ଯଥା ସମ୍ଭବ ଭୋଟରଙ୍କୁ ବୁଝାଇ ନିଜ ସପକ୍ଷରେ ଭୋଟ ଦେବାକୁ ନିବେଦନ କରିଥାଆନ୍ତି । ଲୋକେ ତାଙ୍କୁ ସମର୍ଥନ କରୁଛନ୍ତି ଓ ସେ ନିଶ୍ଚିତ ଭାବେ ନିର୍ବାଚନରେ ବିଜୟଲାଭ କରିବେ ବୋଲି ଆଶା ବାନ୍ଧିଛନ୍ତି ।
ଆଉ ଇଏ ହେଉଛନ୍ତି ଯୋଡ଼ା ପୌରପାଳିକାର ପୂର୍ବତନ ଭାଇସ୍ ଚେୟାରମ୍ୟାନ ସୁରେନ୍ଦ୍ରନାଥ ଜେନା । ଏବେ ସେ ଯୋଡ଼ା ପୌରାଧ୍ୟକ୍ଷ ପଦବୀ ପାଇଁ ନିର୍ବାଚନୀ ରଣାଙ୍ଗନରେ ନିଜର ଭାଗ୍ୟ ପରୀକ୍ଷା କରୁଛନ୍ତି । ସେ ମଧ୍ୟ ଏକାଏକା ଭିନିଜର ସ୍କୁଟି ଧରି ଯୋଡ଼ା ପୌରାଞ୍ଚଳର ସମସ୍ତ ୧୪ଟି ୱାର୍ଡ ବୁଲି ନିଜ ସପକ୍ଷରେ ଭୋଟ ମାଗୁଛନ୍ତି । ଲୋକବଳ କି ଅର୍ଥବଳ ତାଙ୍କ ପାଖରେ ନଥିଲେବି ଯୋଡ଼ାର ସର୍ବାଙ୍ଗୀନ ଉନ୍ନତି ପାଇଁ ସେ ତତ୍ପରତା ପ୍ରକାଶ କରି ଜିତିବାକୁ ଉଦ୍ୟମ ଚଳାଇଛନ୍ତି । ଡୋର ଟୁ ଡୋର ବୁଲି ଭୋଟରଙ୍କୁ ଭେଟି ଯୋଡ଼ାର ସ୍ୱାଭିମାନ ରକ୍ଷା କରିବାକୁ ନିବେଦନ କରୁଛନ୍ତି ସୁରେନ୍ଦ୍ର । ତାଙ୍କର ବିଶ୍ୱାସ ଯୋଡ଼ାବାସୀ ନିଶ୍ଚିତ ଭାବେ ତାଙ୍କୁ ବିଜୟୀ କରିବେ ।
ଦିନ କେଇଟା ପରେ ନିର୍ବାଚନ । ୨୬ରେ ଭୋଟ ଗଣତି ଓ ଫଳାଫଳ । ତେବେ ଲୋକଙ୍କ କିଏ ଆସ୍ଥା ଭାଜନ ହୋଇପାରୁଛି ଓ କିଏ ବିଜୟ ତିଳକ ପିନ୍ଧୁଛି ତାକୁହିଁ ଅପେକ୍ଷା ।
