LIVE TV
ମୟୂରଭଞ୍ଜ ଓ ଗଞ୍ଜାମରେ ଚରମ ବିପର୍ଯ୍ୟୟ ଓ ପରେ ପରେ ମମତା ଝଟକାରେ ଅସ୍ତବ୍ୟସ୍ତ ବିଜେଡି ସୁପ୍ରିମୋ । ଫୋକସରେ ୨୪ ନିର୍ବାଚନରେ ଦଳର ଦୁର୍ବଳ ପ୍ରଦର୍ଶନ ଥିବା ଜିଲ୍ଲା । ଗତକାଲି ନବୀନ ନିବାସରେ ଦୁଇ ଜିଲ୍ଲାର ପରାଜିତ ପ୍ରାର୍ଥୀ ଓ ବରିଷ୍ଠ ନେତାଙ୍କ ବୈଠକ ଡାକି ଏକଜୁଟ୍ ହୋଇ ରହିବାକୁ ଗୁରୁମୁନ୍ତ୍ର ଦେଇଛନ୍ତି ନବୀନ । କାରଣ ଲୋକସଭାରେ ଖାତା ଖୋଲିବାକୁ ଅସମର୍ଥ ଦଳ ପାଇଁ ଚିନ୍ତା ବଢ଼ାଇଲାଣି ରାଜ୍ୟସଭା ଘଳିଆ । ତେଣୁ ମମତା ମହାନ୍ତଙ୍କ ଦଳକୁ ବାଏ ବାଏ ପରେ ବିଧାନସବା ଆସନରେ ବିଜୟ ଶୂନ୍ୟ ମୟୂରଭଞ୍ଜ ଜିଲ୍ଲାରେ ଘରସଜାଡ଼ା କାମ ଆରମ୍ଭ କରିଛି ଦଳ ।
Also Read
ସେହିପରି ଗଞ୍ଜାମରେ କେବଳ ନବୀନଙ୍କ ନିର୍ବାଚନ ମଣ୍ଡଳୀ ହିଞ୍ଜିଳିକୁ ଛାଡି ଅନ୍ୟ ସବୁଠି ଦଳ ମାଟି କାମୁଡିଛି । ଯେଉଁଥିପାଇଁ ଦଳର ବରିଷ୍ଠ ନେତାଙ୍କଠାରୁ ଆରମ୍ଭ କରି କର୍ମକର୍ତ୍ତା ଯାଏଁ ସମସ୍ତେ ଯେମିତି ଦଳୀୟ ପରିଚାଳନାକୁ ନେଇ ଖପ୍ପା । ସେଇଥିପାଇଁ ଥିଲା ଗତକାଲିର ଏ ଆଲୋଚନା । ହେଲେ ମୟୂରଭଞ୍ଜ ନେତାଙ୍କ ବୈଠକରେ ସୁଦାମ ମାରାଣ୍ଡି କି ତାଙ୍କ ପତ୍ନୀ ତଥା ବାଙ୍ଗିରୀପୋଷିରୁ ବିଧାୟିକା ଭାବେ ଲଢିଥିବା ରଞ୍ଜିତା ମାରାଣ୍ଡି ଅନୁପସ୍ଥିତ ରହିବା ରାଜନୀତି ମହଲରେ ଚର୍ଚ୍ଚାକୁ ବଢାଇଛି ।
ମମତାଙ୍କ କ୍ଷେତ୍ରରେ ବଡ଼ ଡିଲ୍ ବା କାରବାର ହୋଇଥିବା ନେଇ ବିଜେଡି ଅଭିଯୋଗ ଆଣିଥିବାବେଳେ ଦଳ କିନ୍ତୁ ସଂଗଠିତ ହେବ ବୋଲି କହିଛନ୍ତି ମୟୂରଭଞ୍ଜର ଟାଣୁଆ ନେତା ରାଜକିଶୋର ଦାସ । ଅପରପକ୍ଷେ ବିଜେପି ଆସ୍କା ବିଧାୟକ ସରୋଜ ପାଢୀଙ୍କ କାଉଣ୍ଟର ହେଲା ବିଜେଡିରେ ନେତା ଏବେ ଅଣନିଶ୍ବାସୀ, ଯେଉଁଥିପାଇଁ ସେମାନେ ବିଜେପିକୁ ଆସୁଛନ୍ତି। ଡିଲ୍ ଅଭିଯୋଗ କେବଳ ବିଜେଡିର ବୃଥା ବୟାନବାଜି।
କେବଳ ମୟୂରଭଞ୍ଜ କି ଗଞ୍ଜାମ ନୁହେଁ । ୨୪ ପରୀକ୍ଷାରେ ଅବିଭକ୍ତ କୋରାପୁଟ ଜିଲ୍ଲାର ୧୪ ବିଧାନସଭା ଆସନରୁ କେବଳ ଡାବୁଗାଁରେ ବିଜେଡିର ମନୋହର ରନ୍ଧାରୀ ପାସ୍ କରିଥିବାବେଳେ ଅନ୍ୟସବୁ ଦଳୀୟ ପ୍ରାର୍ଥୀ ଫେଲ୍ ମାରିଥିଲେ। ତା ପରଠୁ ଦଳ ଭିତରେ ଏବେ ଗୋଷ୍ଠୀ କନ୍ଦଳ ତୀବ୍ର । ସତ୍ତାରୁ ଯିବାପରେ ନେତୃତ୍ବ ଉପରୁ ବି ଭିତିରିଆ ଭାବେ ଆସ୍ଥା ହରାଇଲେଣି ନେତା । ଏଭଳି ସ୍ଥିତିରେ ଦଳକୁ ସଜାଡି ପୁଣି ସଂଗଠିତ କରିବା ଦଳ ପାଇଁ ବଡ ଚାଲେଞ୍ଜ ବୋଲି ମତ ରଖିଛନ୍ତି ରାଜନୈତିକ ସମୀକ୍ଷକ ।
ଜନାଦେଶ ମାଡ଼ରେ ବିଜେଡିର କେବଳ ଅଣ୍ଟା ଭାଙ୍ଗିନି ନେତାଙ୍କ ମନୋବଳ ବି ଭାଙ୍ଗି ଚାଲିଛି । ଯେଉଁଥିପାଇଁ ଦଳର ନେତା ଏବେ ଅନ୍ୟ ଦଳ ସମ୍ପର୍କରେ ଅଛନ୍ତି । ତେଣୁ ବିଜେଡି କେମିତି ଟ୍ରାକକୁ ଫେରୁଛି ତା ଉପରେ ନଜର ।
- Reported by:
- ASHOK BRAHMA , JAGDISH DAS
