LIVE TV
ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ସାମ୍ବାଦିକ ସମ୍ମିଳନୀରେ ’ଚାକିରି ଛାଡ଼ି ରାଜନୀତି ମୈଦାନକୁ ଆସ ଆହ୍ୱାନ’ର ଜବାବ ରଖିଲା ବିଜେଡି । ସାଂସଦ ଅପରାଜିତା ଷଡଙ୍ଗୀଙ୍କୁ ଟାର୍ଗେଟ୍ କରି ବିଜେଡି ମୁଖପାତ୍ର ତଥା ଭୁବନେଶ୍ୱର ସଂସଦୀୟ କ୍ଷେତ୍ରର ପର୍ଯ୍ୟବେକ୍ଷକ ଶ୍ରୀମୟୀ ମିଶ୍ର ବର୍ଷିଛନ୍ତି । ସେ କହିଛନ୍ତି, ମୋତେ ଭୁବନେଶ୍ୱର ପର୍ଯ୍ୟବେକ୍ଷକ ଦାୟିତ୍ୱ ମିଳିଥିବାରୁ ମାଡାମ ଅପରାଜିତା ବିଚଳିତ ହୋଇପଡ଼ିଛନ୍ତି । ସେ ଚାକିରି ଛାଡ଼ି ରାଜନୀତିକୁ ଆସିଥିଲେ ବି ତାଙ୍କର ବ୍ୟୁରୋକ୍ରାଟିକ୍ ସ୍ୱଭାବ ଯାଇନାହିଁ ବୋଲି ରୋକ୍ଠୋକ୍ କହିଛନ୍ତି ଶ୍ରୀମୟୀ ।
ଏହା ବ୍ୟତୀତ ଶ୍ରୀମୟୀ ମିଶ୍ର ସାମ୍ବାଦିକ ସମ୍ମିଳନୀରେ ମାଡାମ ଅପରାଜିତା ରାଜନୀତିକୁ ସେବା ମନୋଭାବ ନେଇ ଆସି ନାହାନ୍ତି ବୋଲି କହିବା ସହ ମିଡିଆର ଆଟେନସନ ନେବା ପାଇଁ ଚେଷ୍ଟା କରୁଛନ୍ତି ବୋଲି କହିଛନ୍ତି । ଖାଲି ସେତିକି ନୁହେଁ, ରାଜ୍ୟରେ ଜଣେ ସଚିବଙ୍କ ଭୂମିକାକୁ ନେଇ ଅପରାଜିତା ଦେଇଥିବା ବିସ୍ଫୋରକ ବୟାନର ସିଧା ପ୍ରତିକ୍ରିୟା ରଖିନଥିଲେ ମଧ୍ୟ ସେ 5T ପ୍ରସଙ୍ଗକୁ ନେଇ ଅପରାଜିତାଙ୍କୁ ପ୍ରଶ୍ନ କରିଛନ୍ତି । ଶ୍ରୀମୟୀ କହିଛନ୍ତି କି, ମନ୍ଦିର ଓ ସ୍କୁଲର 5T ରୂପାନ୍ତରୀକରଣରେ ଅସୁବିଧା କେଉଁଠି ? ମାଡାମ ଗଣଶିକ୍ଷା ସଚିବ ଥିବାବେଳେ ତାଙ୍କର ଏହି IAS ବୁଦ୍ଧି କେଉଁଠି ଥିଲା ବୋଲି କହିଛନ୍ତି ଶ୍ରୀମୟୀ ।
Also Read
ହେଲେ ଏତେ ସବୁ ପ୍ରଶ୍ନ ଭିତରେ ମାତ୍ର ସାଂସଦ ଅପରାଜିତା ଉଠାଇଥିବା ପ୍ରଶ୍ନର ସିଧା ଉତ୍ତର ରଖିନାହାନ୍ତି । ପ୍ରେସମିଟରେ ସାଂସଦ ଅପରାଜିତା ଖୋଲା ଚାଲେଞ୍ଜ କରିବା କଥାରେ କୌଣସି ଉତ୍ତର ରଖିଥିବା ଦେଖିବାକୁ ମିଳିନାହିଁ । ସାଂସଦଙ୍କ କହିବା ଅନୁସାରେ ସଚିବଙ୍କ ଯଦି ରାଜନୀତି କରିବାକୁ ଏତେ ଇଚ୍ଛା ଚାକିରି ଛାଡ଼ି ରାଜନୀତିକୁ ଆସନ୍ତୁ । ସରକାରୀ ଚାକିରି କରିବ, ସରକାରଙ୍କଠାରୁ ଦରମା ନେଇ ରାଜନୀତି କରିବ’ ବୋଲି କହିଥିଲେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ଯେଉଁ ପ୍ରଶ୍ନର ଉତ୍ତର ବିଜେଡି ପକ୍ଷରୁ ରଖାଯାନାହିଁ ।
ସେପଟେ ବିଜେଡି ଓ ବିଜେପିର ସାମ୍ବାଦିକ ସମ୍ମିଳନୀ ପରେ ପ୍ରତିକ୍ରିୟା ରଖିଛନ୍ତି ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା । ସେ କହିଛନ୍ତି ରାଷ୍ଟ୍ର ବା ରାଜ୍ୟର ପରିଚାଳନା ପାଇଁ କିଛି ବିଧିବିଧାନ ରହିଛି । ତାକୁ ଉଲ୍ଲଂଘନ କରି କିଛି କରାଯାଇପାରିବନାହିଁ । ଜନପ୍ରତିନିଧିମାନେ ହେଉଛନ୍ତି ଜନସାଧାରଣଙ୍କ ସ୍ୱର । ନିଷ୍ପତ୍ତି ସେମାନେ ନେବା ଉଚିତ୍, ହେଲେ ଏଠାରେ ଏକ୍ସିକ୍ୟୁଟିଭ୍ମାନେ ନିଷ୍ପତ୍ତି ନେଉଛନ୍ତି । ଯାହାକି ବିଧିବିଧାନର ଏକ ଘୋର ଉଲ୍ଲଂଘନ । ଏହା ଏ ଦେଶର ସମ୍ବିଧାନର ଅପମାନ । ତେଣୁ ବିଧିବିଧାନର ଲକ୍ଷ୍ମଣରେଖା ଭିତରେ ମୁଖ୍ୟମନ୍ତ୍ରୀ କାର୍ଯ୍ୟ କରନ୍ତୁ । ଲୋକପ୍ରିୟତା ଏବଂ ଭୋଟର ଅହଂକାରରେ ବିଧିବିଧାନର ନିୟମକୁ ଉଲ୍ଲଂଘନ କରିବାର ଅପଚେଷ୍ଟା କରନ୍ତୁନାହିଁ ବୋଲି ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା କହିଛନ୍ତି ।
ଖାଲି ସେତିକି ନୁହେଁ ସାଂସଦ ଅପରାଜିତା ଷଡ଼ଙ୍ଗୀ ଓଡ଼ିଶାର ଶାସନ ବ୍ୟବସ୍ଥାକୁ ନେଇ ମଧ୍ୟ ପ୍ରଶ୍ନ କରିଥିଲେ । ସେ କହିଥିଲେ ଓଡ଼ିଶାରେ ଶାସନ ବ୍ୟବସ୍ଥା ହାଇଜାକ୍ ହୋଇଛି । ଜଣେ ସଚିବସ୍ତରୀୟ ଅଧିକାରୀ ଶାସନ ବ୍ୟବସ୍ଥାକୁ ହାଇଜାକ୍ କରିଛନ୍ତି ବୋଲି ସେ କହିଛନ୍ତି । ତାହା ସହ ଲୋକ ଯାହାକୁ ଆସ୍ଥା କରିଥିଲେ, ସେ ଲୋକ ପ୍ରତିନିଧି ଦିଶୁନାହାନ୍ତି ବୋଲି କହିଥିଲେ ଅପରାଜିତା । ସେ ଅହୁରି କହିଛନ୍ତି କି, ଓଡ଼ିଶାରେ ବିଚିତ୍ର ଶାସନ ବ୍ୟବସ୍ଥା ଚାଲିଛି । ଅନ୍ୟ ରାଜ୍ୟରେ ବି ଏ କଥା ହେଲେଣି । ବାହାର ରାଜ୍ୟର ଲୋକମାନେ ଆମ ଉପରେ ଏବଂ ଲୋକଙ୍କ ଉପରେ ହସୁଛନ୍ତି । ସବୁଠାରୁ ବଡ଼ କଥା ହେଉଛି, ଉକ୍ତ ଅଧିକାରୀଙ୍କ ଗସ୍ତ ପୂର୍ବରୁ ୨ରୁ ୩ ମନ୍ତ୍ରୀ ଘଟଣାସ୍ଥଳକୁ ଯାଇ ସମସ୍ତ ବ୍ୟବସ୍ଥା କରୁଛନ୍ତି ।
ମିଟିଂ ବେଳକୁ କେବଳ ସେହି ଅଧିକାରୀ ରହିବେ, ଆଉ କେହି ଦିଶୁନାହାନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସେ ବୁଲୁଥିବା କହୁଛନ୍ତି । ସତରେ କ’ଣ ମୁଖ୍ୟମନ୍ତ୍ରୀ ଏଭଳି ନିର୍ଦ୍ଦେଶ ଦେଇଛନ୍ତି ? ଏହା ସ୍ପଷ୍ଟ କରାଯାଉ ବୋଲି ଅପରାଜିତା ତାଙ୍କ ପ୍ରେସମିଟରେ ପ୍ରଶ୍ନ କରିଥିବା ଦେଖିବାକୁ ମିଳିଥିଲା । ଯାହାକୁ ନେଇ ବିଜେଡି ପକ୍ଷରୁ ଶ୍ରୀମୟୀ ମିଶ୍ର ପ୍ରେସମିଟ୍ କରିଥିଲେ ।
- Reported by:
- NIRANJAN REDDY
