କଂଗ୍ରେସରେ ଯୋଗଦେଲେ ପ୍ୟାରୀଙ୍କ ଝିଅ

କଂଗ୍ରେସରେ ଯୋଗଦେଲେ ପୂର୍ବତନ ସାଂସଦ ପ୍ୟାରୀ ମୋହନ ମହାପାତ୍ରଙ୍କ ଝିଅ ସିକ୍ତା ପତି । ବିଧିବଦ୍ଧ ଭାବେ ସିକ୍ତା କଂଗ୍ରେସ ରେ ସାମିଲ ହୋଇଛନ୍ତି । ଦଳରେ ଯୋଗଦେବା ପରେ ସିକ୍ତା ତାଙ୍କର ପ୍ରତିକ୍ରିୟା ରଖିଛନ୍ତି ।

ସେ, କହିଛନ୍ତି ମୋତେ ଗୋଟିଏ ଜାତୀୟ ଦଳରେ ଅଂଶ ହେବାପାଇଁ ସୁଯୋଗ ମିଳିଛି ।  ରାହୁଲ ଗାନ୍ଧୀ ଙ୍କ  ଭାରତ ଯୋଡୋ ଯାତ୍ରା ରେ ଅନୁପ୍ରାଣିତ ହୋଇ ମୁଁ କଂଗ୍ରେସରେ ଯୋଗଦେଇଛି । ଆମେ ସମସ୍ତଙ୍କୁ ନେଇକି ଆଗକୁ ବଢ଼ିବୁ ବୋଲି କହିଛନ୍ତି ସିକ୍ତା।

ସେ ତାଙ୍କ ପ୍ରତିକ୍ରିୟାରେ ଆହୁରି କହିଛନ୍ତି ଯେ, ଆଗକୁ ଦଳ ଯାହା ଦାୟିତ୍ୱ ଦେବ ତାକୁ ମୁଁ ତୁଲାଇବାକୁ ଚେଷ୍ଟା କରିବି । କଂଗ୍ରେସ ଭବନରେ ଆୟୋଜିତ ଏକ ମିଶ୍ରଣ ପର୍ବରେ ବିଧିବଦ୍ଧ ଭାବେ କଂଗ୍ରେସରେ ଯୋଗଦେଇଥିଲେ ସିକ୍ତା ।

ସିକ୍ତା କଂଗ୍ରେସରେ ଯୋଗଦେବା ସମୟରେ ରାଜ୍ୟ ପ୍ରଭାରୀ ଚେଲ୍ଲା କୁମାର, ପିସିସି ସଭାପତି ଶରତ ପଟ୍ଟନାୟକ, ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକଙ୍କ ସମେତ ବହୁ କଂଗ୍ରେସ କର୍ମୀ ଉପସ୍ଥିତ ଥିଲେ ।