ପଦ୍ମକେଶରୀପୁରରେ କେବେ ଫେରିବ ଶାନ୍ତି ? ମୁଖ୍ୟମନ୍ତ୍ରୀଙ୍କୁ ଅପରାଜିତାଙ୍କ ଚିଠି

ଭୁବନେଶ୍ୱର ପଦ୍ମକେଶରୀପୁରରେ କେବେ ଫେରିବ ଶାନ୍ତି ? କେବେ ସ୍ୱାଭାବିକ ହେବ ଜୀବନ ଯାତ୍ରା ? ହିଂସା ଏବଂ ୧୫୦ରୁ ଅଧିକ ପୁରୁଷ ଓ ମହିଳାଙ୍କ ଗିରଫଦାରୀ ପରଠୁ ଭୟରେ ଥରୁଛନ୍ତି ଗାଁରେ ଥିବା ପିଲାଠୁ ମହିଳା । ଆଜିକୁ ୩ ମାସ ହୋଇଗଲା, ପୋଲିସ ଦେଖିଲେ ସମସ୍ତଙ୍କ ଛାତିରେ ଛନକା ପଶୁଛି । ଏଭଳି ସ୍ଥିତିକୁ ନେଇ ଉଦବେଗ ପ୍ରକାଶ କରିବା ସହ ଗାଁରେ ଶାନ୍ତି ଫେରାଇ ଆଣିବାକୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ । ଆଉ ଅପରାଜିତାଙ୍କ ଏହି ଚିଠି ପରେ ଗାଁରେ ପୋଲିସ ପହଞ୍ଚି ନିର୍ଭୟ ରହିବାକୁ ପ୍ରତିଶ୍ରୁତି ଦେଇଛି ।

ଭୁବନେଶ୍ୱର ଉପକଣ୍ଠ ପଦ୍ମକେଶରୀପୁରରେ ସଂଘଟିତ ଗୋଷ୍ଠୀ ସଂଘର୍ଷର ରୂପ ଯିଏ ଦେଖିଛି, ସିଏ ଆଜି ବି ଥରୁଛି । ଗିରଫଦାରୀ ପରଠୁ ଏକପ୍ରକାର ଜନଶୂନ୍ୟ ହୋଇଯାଇଥିବା ଗାଁରେ ପୋଲିସର ପାଦ ପଡ଼ିଲେ ଛାତି ଥରୁଛି... କାଳେ ପୁଣି ପୋଲିସ ଉଠାଇ ନେଇ ଜେଲରେ ପୂରାଇଦେବ, ସେହି ଭୟ ଘାରୁଛି ଗାଁରେ ଥିବା ବୟସ୍କା ମହିଳା, ବୃଦ୍ଧ, ବୃଦ୍ଧା ଓ ଛୋଟ ପିଲାଙ୍କୁ । କାରଣ ଆଜିକୁ ୩ ମାସ ହେଲା ଗୋଷ୍ଠୀ ସଂଘର୍ଷ ପରଠୁ ନା ଶାନ୍ତି ଫେରିଛି ଗାଁରେ, ନା ସ୍ୱାଭାବିକ ହୋଇଛି ଜନଜୀବନ ।

Also Read

ଗଣପତି ପ୍ରାଣ ପ୍ରତିଷ୍ଠା ଉତ୍ସବରେ ଅଘଟଣ, ଗ୍ୟାସ୍ ବେଲୁନ୍ ଫାଟି ୨୫ରୁ ଅଧିକ ଛାତ୍ରଛାତ୍ରୀ ଆହତ

Read More

ପ୍ରଚାର କରୁଥିବାବେଳେ ଅଚେତ୍ ହୋଇଗଲେ KCRଙ୍କ ଝିଅ

Read More

ଏମିତି ବି ଆସେ ମୃତ୍ୟୁ, ପୁତୁରାର ଶବ ସତ୍କାରକୁ ଯାଇ ବଡ଼ବାପାଙ୍କ ମୃତ୍ୟୁ

Read More

ହିଂସାକାଣ୍ଡରେ ସଂପୃକ୍ତ ପୁରୁଷ ଏବଂ ମହିଳାଙ୍କୁ ବାନ୍ଧି ପୋଲିସ ଜେଲ୍ ପଠାଇବା ପରେ ମୂରବୀ ଶୂନ୍ୟ ପରିବାରରେ ଖେଳିଯାଇଛି କୋକୁଆଭୟ । ଏ ଚିତ୍ର ଆଜିର । ଗାଁରେ ପୋଲିସ ପହଞ୍ଚି ସମସ୍ତଙ୍କୁ ଆଶ୍ୱାସନା ଦେଉଛି ସତ, କିନ୍ତୁ ସହଜରେ କେହି ବିଶ୍ୱାସକୁ ନେଉନାହାନ୍ତି । କହୁଛନ୍ତି, ତୁରନ୍ତ ସମସ୍ୟାର ସମାଧାନ ହେଉ, ନଚେତ ଜୀବନକୁ ଧରି ଆମେ ବରଂ ଆଉ କୁ୍ଆଡ଼େ ପଳାଇବୁ ।

ଗୋଷ୍ଠୀ ସଂଘର୍ଷକୁ ବିତିଯାଇଛି ପ୍ରାୟ ୩ ମାସ । ମାମଲାରେ ୧୫୦ରୁ ଅଧିକଙ୍କୁ ଗିରଫ କରି ଜେଲ୍ ପଠାଇଛି ପୋଲିସ । ଅଥଚ ଶାନ୍ତି ଫେରାଇବାକୁ ନା କୌଣସି ଶାନ୍ତିକମିଟି ତିଆରି କରିଛନ୍ତି ରାଜ୍ୟ ସରକାର ନା କୋର୍ଟରେ କୌଣସି ଚାର୍ଜସିଟ ଦାଖଲ କରିଛି ପୋଲିସ । ଯାହାକୁ ନେଇ ପ୍ରଶ୍ନ ଉଠାଇଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ସୋସିଆଲ୍ ମିଡ଼ିଆରେ ଏଭଳି ଘଟଣାକୁ ଦୁର୍ଭାଗ୍ୟଜନକ ବୋଲି କହିବା ସହ ଅବିଳମ୍ବେ ଗାଁରେ ଶାନ୍ତି ଫେରାଇ ଆଣିବାକୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି । ଗତକାଲି ଅପରାଜିତା ଏହି ଚିଠି ଲେଖିଥିବାବେଳେ ଆଜି ଗାଁରେ ପହଞ୍ଚିଛି ପୋଲିସ ଫୋର୍ସ । ଗାଁରେ ଶାନ୍ତି ବଜାୟ ସହ କୌଣସି ଭୟ ନକରିବାକୁ ମାଇକ୍ ଜରିଆରେ ଏଭଳି ଭାବେ ପ୍ରଚାର କରିଛି ପୋଲିସ ।

ପଞ୍ଚାୟତ ନିର୍ବାଚନରୁ ହିଁ ପଦ୍ମକେଶରୀପୁର ଗାଁରେ ଉପୁଜିଥିଲା ବିବାଦ । କିଏ କାହାକୁ ଦେବ ଭୋଟ୍, ସେନେଇ ଦେଖାଦେଇଥିବା ଗଣ୍ଡଗୋଳ କ୍ରମେ ଗୋଷ୍ଠୀ ସଂଘର୍ଷର ରୂପ ନେଇଥିଲା । ଗତ ସେପଟେମ୍ବରରେ ଉତ୍ତେଜନା ତୀବ୍ର ହେବାରୁ ୧୪୪ ଧାରା ଜାରି କରିଥିଲା ପୋଲିସ । ଅକଟୋବରରେ ପୁଣି ଗଣ୍ଡଗୋଳ ହୋଇଥିଲା । ସେଥିରେ ୧୦ରୁ ଅଧିକ ବ୍ୟକ୍ତି ଆହତ ହୋଇଥିବା ବେଳେ ୨୦ରୁ ଅଧିକ ଲୋକଙ୍କୁ ଗିରଫ କରି ଜେଲ୍ ପଠାଇଥିଲା ପୁଲିସ । ଆଶା କରାଯାଉଛି, ଖୁବଶୀଘ୍ର ସମସ୍ତଙ୍କୁ ଜାମିନ ମିଳିପାରେ ।