ଏକଜିଟ୍ ପୋଲରେ କଂଗ୍ରେସ-ବିଜେପି କଡ଼ା ଟକ୍କର, ୩ରେ ବାହାରିବ ସେମିଫାଇନାଲ ରେଜଲ୍ଟ

ରବିବାର ଆସିବ ୫ ରାଜ୍ୟର ବିଧାନସଭା ନିର୍ବାଚନ ରେଜଲ୍ଟ । ତେବେ ତା ପୂର୍ବରୁ ଉତ୍କଣ୍ଠା ବଢାଇ ଦେଇଛି ଏକ୍‌ଜିଟ ପୋଲ ଆକଳନ। ବୁଥ୍ ବାହୁଡା ମତ କେତେ ସତ ହେବ ତାକୁ ନେଇ ଚାଲିଛି ତର୍କବିତର୍କ । ଏଣେ ଓଡ଼ିଶା ରାଜନୀତିରେ ୫ ରାଜ୍ୟ ଫଳାଫଳର କଣ ପ୍ରଭାବ ରହିବ ତାକୁ ନେଇ ବି ଆରମ୍ଭ ହୋଇଛି ଚର୍ଚ୍ଚା । ୫ ରାଜ୍ୟର ବିଧାନସଭା ରେଜଲ୍ଟ ୨୪ ସାଧାରଣ ନିର୍ବାଚନକୁ ପ୍ରଭାବିତ କରିବ ବୋଲି କହିଛି ବିଜେଡି। ତେବେ ଓଡ଼ିଶାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତି ଜନସମର୍ଥନ ରହିଛି ଓ ୨୪ରେ ଦଳ ପୁଣି ସରକାର ଗଢିବ ବୋଲି ଦୃଢୋକ୍ତି କରିଛି ।

ଅନ୍ୟପକ୍ଷରେ ବିଜେପି କହିଛି ଆମେ ସର୍ବାଧିକ ରାଜ୍ୟରେ ସରକାର ଗଢିବୁ ଯାହା କି ୨୪ ନିର୍ବାଚନର ଫଳାଫଳର ସୂଚକ ହେବ । ସେହିଭଳି ସମସ୍ତ ୫ ରାଜ୍ୟରେ ସରକାର ଗଢିବା ନେଇ ଦୃଢ଼ ଆତ୍ମବିଶ୍ୱାସ ରଖିଛି କଂଗ୍ରେସ ।

ଏକଜିଟ ପୋଲି ଆକଳନ ଅନୁସାରେ ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼, ୩ ହିନ୍ଦୀ ଭାଷୀ ରାଜ୍ୟରେ ବିଜେପି ଓ କଂଗ୍ରେସ ମଧ୍ୟରେ ହେବ କଡା ଟକ୍କର। ସେହିପରି ତେଲେଙ୍ଗାନାରେ କଂଗ୍ରେସ ବିଆରଏସଠାରୁ କ୍ଷମତା ଛଡାଇ ନେଇପାରେ ବୋଲି ପୂର୍ବାନୁମାନ କରାଯାଇଛି । ଅନ୍ୟପକ୍ଷରେ ଅସ୍ପଷ୍ଟ ରହିଛି ମିଜୋରାମର ଚିତ୍ର ।

ବିଧାନସଭା ନିର୍ବାଚନ ଆଞ୍ଚଳିକ ପ୍ରସଙ୍ଗ ଓ ଲୋକସଭା ନିର୍ବାଚନ ଜାତୀୟ ପ୍ରସଙ୍ଗ ଦ୍ୱାରା ପ୍ରଭାବିତ ହୁଏ ବୋଲି କୁହାଯାଏ । ତେବେ ଅନେକ ସମୟରେ ଆଞ୍ଚଳିକ ନିର୍ବାଚନ ରେଜଲ୍ଟ ସାଧାରଣ ନିର୍ବାଚନର ଫଳାଫଳ କଣ ହେବ ତାର ନମୁନା ପ୍ରସ୍ତୁତ କରେ ବୋଲି ଯୁକ୍ତି ବି ହୁଏ । ତେଣୁ ଏ ନିର୍ବାଚନ ରେଜଲ୍ଟ ୨୪ ନିର୍ବାଚନକୁ ପ୍ରଭାବିତ କରିବ ନା ନାହିଁ ତାହା ସମୟ କହିବ।