LIVE TV
ଭୁବନେଶ୍ୱର ମୁନିସିପାଲିଟି କର୍ପୋରେସନ୍ (ବିଏମ୍ସି) କାର୍ଯ୍ୟାଳୟର ଅତିରିକ୍ତ କମିଶନର ରତ୍ନାକର ସାହୁଙ୍କ ଉପରେ ଆକ୍ରମଣ ଏବଂ ଏଥିରେ ବରିଷ୍ଠ ରାଜନେତା ଜଗନ୍ନାଥ ପ୍ରଧାନଙ୍କ ସମ୍ପୃକ୍ତି ଅଭିଯୋଗ ନେଇ ରାଜ୍ୟ ରାଜନୀତି ଏବେ ଉଠୁଛି ପଡୁଛି । ବିରୋଧୀ ବିଜୁ ଜନତା ଦଳ ଏହାକୁ ଏକ ବଡ଼ ରାଜନୈତିକ ଅସ୍ତ୍ର କରି ମୋହନ ମାଝୀ ସରକାରକୁ ଘେରିବା ପାଇଁ ଚେଷ୍ଟା କରିଥିଲା ଏବଂ ଏହି ଚାପ ଯୋଗୁଁ ଜଗନ୍ନାଥ ଗୁରୁବାର ଦିନ ସଂଧ୍ୟାରେ ଆତ୍ମସମର୍ପଣ କରିବା ପରେ ଗିରଫ ହୋଇଛନ୍ତି ।
ଜଗନ୍ନାଥ ପ୍ରଧାନ ଏବେ ଝାରପଡ଼ା ଜେଲ୍ରେ । ଏହା ସହିତ ଓଡ଼ିଶା ପ୍ରଶାସନିକ ସେବା ବା ଓଏଏସ୍ ଅଧିକାରୀ ସଂଘ ଯେଉଁ ‘କଲମ ଛାଡ଼’ ଆନ୍ଦୋଳନ ଡାକରା ଦେଇଥିଲା, ତାହା ପ୍ରତ୍ୟାହୃତ ହୋଇଛି ।
Also Read
ରତ୍ନାକର ସାହୁ ଜଣେ ବରିଷ୍ଠ ଓଏଏସ୍ ଅଧିକାରୀ । ଏଣୁ ତାଙ୍କ ଉପରେ ହୋଇଥିବା ମରଣାନ୍ତକ ଆକ୍ରମଣ ନେଇ ଓଏଏସ ସଂଘ କ୍ଷୁବ୍ଧ ହେବା ସ୍ୱାଭାବିକ । ଏହି ଦୃଷ୍ଟିରୁ ସଂଘ ‘କଲମ ଛାଡ଼’ ଆନ୍ଦୋଳନ ଡାକରା ଦେଇ ପ୍ରଶାସନିକ ବ୍ୟବସ୍ଥାକୁ ଏକ ପ୍ରକାର ଅଚଳ କରିଦେଇଥିଲା । ସଚିବାଳୟ ଠାରୁ ଆରମ୍ଭ କରି ବ୍ଲକ୍ ସ୍ତର ପର୍ଯ୍ୟନ୍ତ ସରକାରୀ କାର୍ଯ୍ୟ ଏକ ପ୍ରକାର ଠପ୍ ହୋଇଯାଇଥିଲା ।
ରତ୍ନାକର ସାହୁଙ୍କ ଉପରେ ଯେଉଁଭଳି ଅମାନବୀୟ ତଥା ବର୍ବରୋଚିତ ଭାବରେ ଆକ୍ରମଣ କରାଗଲା, ତାହାକୁ କେହି ସଭ୍ୟ ମଣିଷ କେବେ ପସନ୍ଦ କରିବ ନାହିଁ । ଏହା ଅତ୍ୟନ୍ତ ଘୃଣ୍ୟ କାର୍ଯ୍ୟ । ଏଥିରେ ସମ୍ପୃକ୍ତ ପାଞ୍ଚଜଣ ଅଭିଯୁକ୍ତଙ୍କୁ ପ୍ରଥମେ ଗିରଫ କରାଯାଇଥିଲା । ଯେହେତୁ ଅଭିଯୁକ୍ତମାନେ ଆକ୍ରମଣ ସମୟରେ ଜଗନ୍ନାଥ ପ୍ରଧାନଙ୍କ ନାମ ଉଚ୍ଚାରଣ କରିଥିଲେ, ସେଥିପାଇଁ ଓଏଏସ୍ ସଂଘ ତାଙ୍କର ଗିରଫଦାରୀ ପାଇଁ ଅଡ଼ିବସିଥିଲା । ଅନ୍ୟପକ୍ଷରେ ରାଜସ୍ୱ ମନ୍ତ୍ରୀ ସୁରେଶ କୁମାର ପୂଜାରୀ କହିଥିଲେ ଯେ, ପାଞ୍ଚଜଣଙ୍କୁ ଏହି ଘଟଣାରେ ଗିରଫ କରାଯାଇଛି । ଆକ୍ରମଣ ପଛରେ ଯଦି ଆଉ କୌଣସି ବ୍ୟକ୍ତିଙ୍କ ସମ୍ପୃକ୍ତି ଥିବାର ତଦନ୍ତ ବେଳେ ଜଣାପଡ଼ିବ, ତେବେ ସରକାର ଏ ନେଇ କଠୋର କାର୍ଯ୍ୟାନୁଷ୍ଠାନ ନେବାରେ ପଶ୍ଚାତ୍ପଦ ହେବେ ନାହିଁ । ଶେଷରେ ତାହାହିଁ ହୋଇଛି ।
ଗଣତନ୍ତ୍ରରେ ଆଇନର ଶାସନ ଚାଲେ । ଆଇନ୍କୁ ହାତ ନେବା ଅପରାଧ । ଏକ ଅପରାଧରେ ସମ୍ପୃକ୍ତ ଅଭିଯୁକ୍ତଙ୍କୁ ପୋଲିସ୍ ସେତିକିବେଳେ ଗିରଫ କରିଥାଏ, ଯେତେବେଳେ ତାଙ୍କ ବିରୋଧରେ ‘ପ୍ରାଇମା ଫାସାଇ ଏଭିଡେନ୍ସ’ ବା ‘ପ୍ରାଥମିକ ପ୍ରମାଣ’ ମିଳିଥାଏ । ଏଠି ଜଗନ୍ନାଥଙ୍କ ବିରୋଧରେ ଏ ପର୍ଯ୍ୟନ୍ତ ପୋଲିସ୍ ପ୍ରାଥମିକ ପ୍ରମାଣ ପାଇଛି କି ନାହିଁ, ତାହା ସର୍ବସାଧାରଣଙ୍କୁ ଜଣାନଥିଲା । ଭୁବନେଶ୍ୱର ଡେପୁଟି କମିଶନର ଅଫ ପୋଲିସ୍ ବା ଡିସିପି ଜଗମୋହନ ମୀନାଙ୍କ କହିବା କଥା ଯେ, ପୋଲିସ୍ ଜଗନ୍ନାଥଙ୍କ ବିରୋଧରେ ଆପାତତଃ ପ୍ରମାଣ ପାଇବା ପରେ ଓ ସାକ୍ଷୀମାନଙ୍କ ବୟାନ ଅଧାରରେ ତାଙ୍କୁ ଗିରଫ କରିଛି । ପ୍ରଥମେ ପୋଲିସ୍ ପାଖରେ ଯଦି ଏମିତି କିଛି ଠୋସ୍ ପ୍ରମାଣ ଥାଆନ୍ତା, ତେବେ ଏ ନେଇ ପ୍ରଥମରୁ କାର୍ଯ୍ୟାନୁଷ୍ଠାନ ଗ୍ରହଣ କରିପାରିଥାନ୍ତେ । ସେହିପରି ଦଳ ଦେଖୁଥିଲା ଯେ, ବିରୋଧୀମାନଙ୍କ ଚାପ କେତେଦୂର ପ୍ରଭାବଶାଳୀ ଅଛି ଏବଂ ଏ ନେଇ ଜନସାଧାରଣଙ୍କ ଭାବାବେଗ କଣ ରହିଛି । ପ୍ରମାଣ ଥାଇ ଯଦି ଦଳ ଜଣେ ନେତାଙ୍କୁ ଘଣ୍ଟ ଘୋଡାଇବ, ତେବେ ଏହା ଯେ କୌଣସି ଦଳକୁ ବେଶ୍ ରାଜନୈତିକ କ୍ଷତି ପହଞ୍ଚାଇବ । ବୋଧହୁଏ ଏହାକୁ ଆଧାର କରି ଭାରତୀୟ ଜନତା ପାର୍ଟି ଏବଂ ମୋହନ ସରକାର ଜଗନ୍ନାଥଙ୍କ ଆତ୍ମସମର୍ପଣ ଭଳି ଏକ ସମ୍ମାନଜନକ ରାସ୍ତା ବାହାର କରି ଦଳ ଓ ସରକାରଙ୍କର ଭାବମୂର୍ତ୍ତି ରକ୍ଷା କରିବା ପାଇଁ ସମର୍ଥ ହେଲେ । ବିରୋଧୀ ଦଳ ସରକାରକୁ ଘେରିବା ପାଇଁ କରିଥିବା ଯୋଜନା ଫସର ଫାଟିଛି ।
ଅତୀତର ଇତିହାସକୁ ଯଦି ଦେଖିବା, ତେବେ ଗୋଟିଏ ଚିତ୍ର ସାମ୍ନାକୁ ଆସିବ ଯେତେବେଳେ କୌଣସି ସରକାର ଅଭିଯୁକ୍ତ ଓ ଅପରାଧୀମାନଙ୍କୁ ପୃଷ୍ଠପୋଷକତା ଯୋଗାଇଦେଇଛନ୍ତି, ସେମାନଙ୍କୁ ଜନତା ନିର୍ବାଚନରେ ଶାସ୍ତି ଦେଇଛନ୍ତି । ସଂଖ୍ୟାଲଘୁଙ୍କ ଉପରେ ଆକ୍ରମଣ ଓ ଅଞ୍ଜନା ମିଶ୍ରଙ୍କ ଉପରେ ପାଶବିକ ଅତ୍ୟାଚାର ଇତ୍ୟାଦି ଘଟଣା ପରେ ଜାନକୀ ବଲ୍ଲଭ ପଟ୍ଟନାୟକ ସରକାରଙ୍କ ପତନ ଘଟିଥିଲା । ସେହିପରି ଅନେକଗୁଡ଼ିଏ ନାରୀ ନିର୍ଯ୍ୟାତନା ଘଟଣାରେ ବିଜୁ ଜନତା ଦଳ ନେତାମାନଙ୍କର ସମ୍ପୃକ୍ତି ଯୋଗୁ ଉକ୍ତ ଦଳ ୨୪ ବର୍ଷ ପରେ କ୍ଷମତାରୁ ବିଦା ହେଲା । ଯଦି ଏବେକାର ଘଟଣାରେ ଭାରତୀୟ ଜନତା ପାର୍ଟି ଜଗନ୍ନାଥ ପ୍ରଧାନଙ୍କୁ ପୃଷ୍ଠପୋଷକତା ଯୋଗାଇ ଦେଉଛି, ତେବେ ଆଗାମୀ ଦିନରେ ଏହା ଦଳ ବିରୋଧରେ ଏକ ନକାରାତ୍ମକ ଧାରଣା ସୃଷ୍ଟି କରିବ ।
ବର୍ତ୍ତମାନ ଜଗନ୍ନାଥ ପ୍ରଧାନଙ୍କ ଗିରଫ ପରେ ବିରୋଧୀମାନଙ୍କ ହାତରୁ ଆକ୍ରମଣର ଅସ୍ତ୍ର ଏକ ପ୍ରକାର ଖସିଯାଇଛି । ବିଜେପି ବର୍ତ୍ତମାନ ଆଇନର ଶାସନରେ ବିଶ୍ୱାସ କରେ ବୋଲି ଡିଣ୍ଡିମ ପିଟିବ । ନବୀନ ପଟ୍ଟନାୟକଙ୍କ ସରକାର ସମୟରେ ଯେଉଁଭଳି କିଛି ବିଜେଡ଼ି ନେତାଙ୍କୁ ଗିରଫ କରି ନବୀନ ତାଙ୍କର ଭାବମୂର୍ତ୍ତି ତିଆରି କରିଥିଲେ, ଜଗନ୍ନାଥଙ୍କ ଗିରଫ ପରେ ବର୍ତ୍ତମାନ ସେହିଭଳି ରାଜନୈତିକ ଲାଭ ବିଜେପି ଓ ମୋହନ ମାଝୀ ସରକାର ସାଉଁଟିବେ ।
ଏବେ ଓଏଏସ୍ ସଂଘର ଦାବି ସମ୍ପର୍କରେ ଆଲୋଚନା କରିବା । ଅତୀତରେ ଏହି ସଂଘ ଅନେକ ସଦସ୍ୟଙ୍କ ଉପରେ ହୋଇଥିବା ଆକ୍ରମଣରେ ଏଭଳି କେବେ ରାଜ୍ୟବ୍ୟାପୀ ଆନ୍ଦୋଳନ କରିନଥିଲା । ଏବେ ଯେଉଁଭଳି ଭାବେ ଏହି ଅଧିକାରୀମାନେ ଆନ୍ଦୋଳନ କଲେ, ଏହାକୁ ନେଇ ଭିନ୍ନ ଭିନ୍ନ ଚର୍ଚ୍ଚା ଲାଗି ରହିଛି । ଗ୍ରାମାଞ୍ଚଳ ଓ ଅନ୍ୟାନ୍ୟ ଛୋଟ ସହରରୁ ଯାହା ଖବର ଆସୁଛି ଯେ ବ୍ଲକ୍, ତହସିଲ୍ କାର୍ଯ୍ୟାଳୟ, ବିଜ୍ଞାପିତ ଅଞ୍ଚଳ ପରିଷଦ ଓ ପୌର ପରିଷଦଗୁଡିକରେ ସାଧାରଣ ପ୍ରଶାସନିକ ସେବା ଗୁରୁବାର ଦିନ ସଂଧ୍ୟା ପର୍ଯ୍ୟନ୍ତ ଏକ ପ୍ରକାର ଅଚଳ ହୋଇପଡିଥିଲା । ଦୂରଦୂରାନ୍ତରୁ ଲୋକମାନେ ଆସି ସାଧାରଣ ସେବା ନପାଇ ଫେରିଯାଉଥିବା ଚିତ୍ର ସାଧାରଣ ଜନତାର ମନକୁ ବେଶ୍ ଆନ୍ଦୋଳିତ କରୁଥିଲା । ଆନ୍ଦୋଳନକୁ ଦୀର୍ଘ କରି ଓଏଏସ ସଂଘ ସମଗ୍ର ରାଜ୍ୟ ପ୍ରଶାସନକୁ ବନ୍ଧକ କରିବା ଅପପ୍ରୟାସ କରିଥିଲା ବୋଲି ଆଲୋଚନା ହେଉଛି ।
ସତ ସବୁବେଳେ ସାମ୍ନାକୁ ଆସେ । ଓଏଏସ୍ ସଂଘ ଆନ୍ଦୋଳନ ପଛରେ ରାଜନୈତିକ ପୃଷ୍ଠପୋଷକତା ରହିଥିଲା କି ନାହିଁ ତାହା ଖୁବ୍ ଶୀଘ୍ର ସ୍ପଷ୍ଟ ହୋଇଯିବ ।
ଅଧିକ ପଢ଼ନ୍ତୁ: ବିଜେପିର ବଡ଼ ଘୋଷଣା, କାଲି ହେବନି ରାଜ୍ୟ ସଭାପତି ନିର୍ବାଚନ
