Tara Prasad Bahinipati: ‘ବିଜେଡିରେ ବିରାଟ ଫାଙ୍କ, ବିଜୁ ଆଉ ପାଣ୍ଡିଆନ ଲୋକ ଭାଗଭାଗ’: ତାରା ବାହିନୀପତି

ବିଜେଡିକୁ ନେଇ ବିସ୍ଫୋରକ ବୟାନ ଦେଲେ କଂଗ୍ରେସ ବିଧାୟକ ତାରା ବାହିନୀପତି । କହିଲେ, ବିଜେଡିରେ ଏବେ ବିରାଟ ଫାଙ୍କ । ବିଜୁ ଆଉ ପାଣ୍ଡିଆନ ଲୋକ ଭିତରେ ଭାଗଭାଗ । ବିଜେଡି ଏବେ ଡ୍ରାମା କରୁଛି । ବିଜେଡି ସବୁବେଳେ ବିଜେପି ସାଙ୍ଗରେ ରହିଛି । ଆଜି ନୁହେଁ ୨୦୦୦ ମସିହାରୁ ବିଜେପି ସାଙ୍ଗରେ ବିଜେଡି ରହିଛି । ରାଜ୍ୟରେ ସରକାର ବିଜେଡିର ନାହିଁ କିନ୍ତୁ ସଂସଦରେ ସମର୍ଥନ ଦେଉଛନ୍ତି । ବିଲ୍‌କୁ ବିରୋଧ ପାଇଁ ଘୋଷଣା କରିଥିଲେ କିନ୍ତୁ ରାତାରାତି ବଦଳି ଗଲେ । ବିଜେଡି ଭୟରେ ଏ ସବୁ ଖେଳ ଖେଳୁଛି । ବିଜେଡିର ହଜାର ହଜାର କୋଟି ଟଙ୍କାର ମାଇନ୍ସ ସ୍କାମ୍‌ ରହିଛି । ନବୀନ ବାବୁଙ୍କ ବିଜେପି ପ୍ରତି ପ୍ରେମ ନୁହେଁ ଭୟ । ପାଣ୍ଡିଆନ୍‌ ଘର ଭିତରେ ରହି ଗୋଟି ଚାଳନା କରୁଛନ୍ତି ବୋଲି କହିଛନ୍ତି କଂଗ୍ରେସ ବିଧାୟକ ତାରା ବାହିନୀପତି ।

#ବିଜୁ_ଆଉ_ପାଣ୍ଡିଆନ_ଲୋକ_ଭାଗଭାଗ
ବିଜେଡିରେ ବିବାଦ ନେଇ କଂଗ୍ରେସ ବିଧାୟକ ତାରାପ୍ରସାଦ ବାହିନୀପତିଙ୍କ ପ୍ରତିକ୍ରିୟା। ବିଜେଡିରେ ବିରାଟ ଫାଙ୍କ, ବିଜୁ ଆଉ ପାଣ୍ଡିଆନ ଲୋକ ଭାଗଭାଗ #TaraPrasadBahinipati#BJDConflict#OdishaTV#OTVpic.twitter.com/dXpbvPwUcH

— ଓଟିଭି (@otvkhabar) April 5, 2025

ସେପଟେ ୱକ୍‌ଫ ବିଲ୍ ସପକ୍ଷରେ ବିଜେଡି ସାଂସଦ ସସ୍ମିତ ପାତ୍ର ଭୋଟ୍ ଦେବାକୁ ନେଇ ଦଳ ଭିତରେ ବଢୁଛି ଅସନ୍ତୋଷ । ପ୍ରଫୁଲ୍ଲ ସାମଲ କାର୍ଯ୍ୟାନୁଷ୍ଠାନ ଦାବି କରି ନବୀନଙ୍କୁ ଚିଠି ଲେଖିଥିବା ବେଳେ ଆଜି ପୁଣି ଥରେ ସସ୍ମିତଙ୍କୁ ଟାର୍ଗେଟ କରିଛନ୍ତି ବରିଷ୍ଠ ବିଧାୟକ ବଦ୍ରି ପାତ୍ର । ସେ କହିଛନ୍ତି, ସସ୍ମିତ ଏତେ ବଡ଼ ସାହସ କଲେ କେମିତି । ଦଳ ସମଦୂରତା ନୀତି ରଖି ଚାଲୁଥିଲା । କିନ୍ତୁ ଏହି ନିଷ୍ପତ୍ତି ଅନୁରୂପ ହେଲାନି । କିଏ ଗୋଟେ ଖେଳ କଲା । କେଉଁଠି ଖେଳ ହୋଇଛି ତାହା ଜାଣିବା ଆବଶ୍ୟକ । ଦଳ ସଭିପତି ନବୀନ ବାବୁ ନିର୍ଦ୍ଦେଶ ଦେଇଥିଲେ, କିନ୍ତୁ ଶେଷ ମୁହୂର୍ତ୍ତରେ ନିଷ୍ପତ୍ତି ପରିବର୍ତ୍ତନ ହେଲା କେମିତି ? ଦଳ ଏବେ ଧର୍ମ ସଙ୍କଟରେ ବୋଲି ବଦ୍ରି ପାତ୍ର କହିଛନ୍ତି ।

ସେହିପରି ସେ ଆହୁରି କହିଛନ୍ତି, ସସ୍ମିତଙ୍କ କ୍ଷମତା ନାହିଁ ଦଳୀୟ ନିଷ୍ପତ୍ତି ପରିବର୍ତ୍ତନ କରିପାରିବେ । ଦଳର ମର୍ଯ୍ୟାଦା ଉପରେ ଏହା ଆଞ୍ଚ ଆଣିଛି । ଏ ବାବଦରେ ନବୀନ ବାବୁ ଜାଣିବା ପରେ ସତ୍ୟାସତ୍ୟ ସଂଗ୍ରହ କରୁଛନ୍ତି । ତଦନ୍ତ ହେଲେ ଜଣାପଡ଼ିବ। କାହାର ନିର୍ଦ୍ଦେଶରେ ଏଭଳି ହେଲା ବୋଲି କହିଛନ୍ତି ବରିଷ୍ଠ ବିଜେଡି ବିଧାୟକ ବଦ୍ରି ନାରାୟଣ ପାତ୍ର କହିଛନ୍ତି । ତେବେ ବଦ୍ରି ପାତ୍ରଙ୍କ ଏହି ମନ୍ତବ୍ୟ ଉପରେ ବିଜେଡି କିମ୍ବା ସସ୍ମିତ ପାତ୍ରଙ୍କ ପ୍ରତିକ୍ରିୟା ମିଳିପାରିନି ।

ଅଧିକ ପଢ଼ନ୍ତୁ: କାଠଗଡ଼ାରେ ସସ୍ମିତ; ନବୀନଙ୍କୁ ଚିଠି ଲେଖିଲେ ପ୍ରତାପ, କହିଲେ....