‘ନୂଆବର୍ଷ ପରଦିନ ମୋ ହୋର୍ଡିଂ ହଟେଇଦେଲେ, ଅନ୍ୟମାନଙ୍କର କାହିଁକି ଅଛି ?’

ଭୁବନେଶ୍ୱରରୁ ହଟୁ ହୋର୍ଡିଂ । ସହର ସାରା ଲାଗିଥିବା ସବୁ ହୋର୍ଡିଂ ଉଠାଇବାକୁ ଦାବି କରିଛନ୍ତି ବିଜେପି ସାଂସଦ ଅପରାଜିତା ଷଡ଼ଙ୍ଗୀ । ପ୍ରେସମିଟ୍ କରି ଅପରାଜିତା ଅଭିଯୋଗ କରିଛନ୍ତି, ନୂଆବର୍ଷ ଶୁଭେଚ୍ଛା ପାଇଁ ମନଇଚ୍ଛା ଚାରିଆଡ଼େ ହୋର୍ଡିଂ ଲଗାଯାଇଛି । ଏହା ସହରର ସୌନ୍ଦର୍ଯ୍ୟ ନଷ୍ଟ କରୁଛି, ସହର ଖରାପ ଦିଶୁଛି । ବିଏମସି କମିଶନର ସିପିଙ୍କ ସହାୟତାରେ ୨ ଦିନ ମଧ୍ୟରେ ହୋର୍ଡିଂ ହଟାନ୍ତୁ ବୋଲି ଦାବି କରିଛନ୍ତି ।

ଏନେଇ ବିଏମ୍‌ସି କମିଶନର ଓ ପୋଲିସ କମିଶନରଙ୍କୁ ଅପରାଜିତା ଚିଠି ଲେଖିଛନ୍ତି । ସହରରେ କେବଳ ଶାସକ ଦଳର ହୋଡିଂ ଲାଗିଥିବା ଅଭିଯୋଗ ଆଣି ଅପରାଜିତା ଚିଠି ଲେଖିଛନ୍ତି । ନୂଆବର୍ଷ ପରଦିନ ମୋର ସମସ୍ତ ହୋର୍ଡିଂ ବିଏମ୍‌ସି ଏନଫୋର୍ସମେଣ୍ଟ ସ୍କ୍ୱାର୍ଡ ହଟାଇଥିବାବେଳେ କାହିଁକି ଏପରି ପାତର ଅନ୍ତର ବୋଲି ପ୍ରଶ୍ନ କରିଛନ୍ତି ଅପରାଜିତା ।

ପୂର୍ବରୁ ଭୁବନେଶ୍ୱରରେ ହୋର୍ଡିଂ ଲାଗିବାକୁ ନେଇ ବିଏମ୍‌ସି ପକ୍ଷରୁ କିଛି ନିୟମ କରାଯାଇଥିଲା । ସହରର ସୌନ୍ଦର୍ଯ୍ୟ ଯେପରି ନଷ୍ଟ ନ ହେବ ସେ ଉଦ୍ଦେଶ୍ୟରେ ନିୟମ ଆଣିଥିଲା ବିଏମସି । ହେଲେ ଏହି ନିୟମର ଖୋଲାଖୋଲି ଉଲଘଂନ ହେଉଛି, ଆଉ ସବୁ ଦେଖି ଚୁପ୍ ବସିଛି ବିଏମସି ପ୍ରଶାସନ ।

ଡମଣାରୁ ଜୟଦେବ ବିହାର ରାସ୍ତା ହେଉ ଅବା ହେଉ ଜୟଦେବ ବିହାରରୁ ୧୨୦ ବାଟାଲିୟନ୍ । ଯେଉଁଠି ଦେଖିବ ବଡ଼ ବଡ଼ ହୋଡିଂ । ଖାଲି ରାସ୍ତା କଡ଼ରେ ନୁହେଁ ବରଂ ସହରର ପ୍ରତି ଗଳିକନ୍ଦିରେ ଛାଇ ଯାଇଛି ବିଭିନ୍ନ ରାଜନୈତିକ ଦଳର ନେତାଙ୍କ ଶୁଭେଚ୍ଛା ବାର୍ତ୍ତା ଥିବା ହୋର୍ଡିଂ । ବିଏମସିର ନୋ ହୋର୍ଡିଂ ଜୋନ୍ ନିୟମର ଖୋଲାଖୋଲି ଉଲଘଂନ ହେଉଥିଲେ ବି ହାତ ଉପରେ ହାତ ଦେଇ ବସିଛି ବିଏମସି । କଂଗ୍ରେସ ଓ ବିଜେପି ଏହାକୁ ପୂର୍ବରୁ ଦାଦାଗିରି ବୋଲି କହିଥିବା ବେଳେ ପୁଣି ଆଜି ପ୍ରେସ୍‌ମିଟ୍‌ କରି ଶାସକ ଦଳ ଉପରେ ବର୍ଷିଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ।