LIVE TV
ଯାଜପୁର ଜିଲ୍ଲାକୁ ରାଜ୍ୟସଭା ସାଂସଦଙ୍କ ପାଣ୍ଠି ବର୍ଷା । ୨୦୧୯ରୁ ୨୪ ଯାଏଁ ୧୧ ରାଜ୍ୟସଭା ସାଂସଦ ଗୋଟିଏ ଜିଲ୍ଲାକୁ ଦେଇଛନ୍ତି ୧୪ କୋଟିରୁ ଅଧିକ ଟଙ୍କା । ବବିଙ୍କ ଦରବାରରେ କିଭଳି ଭେଟି ଦିଆଯାଉଥିଲା ସାଂସଦ ପାଣ୍ଠି, କେମିତି ବିଜେଡି ରାଜ୍ୟସଭା ସାଂସଦ ପାଣ୍ଠିର ଅର୍ଥ ବିନିଯୋଗ କରୁଥିଲା ବିଜେଡି, ସାଂସଦ ପଦ ଓ ଦଳରୁ ଇସ୍ତଫା ଦେବା ପରେ ପ୍ରଥମେ ମମତା ମହାନ୍ତ ଏସବୁର ଗୁମର ଖୋଲିବା ପରେ ସାମ୍ନାକୁ ଆସିଛି ଏଭଳି ତଥ୍ୟ ।
Also Read
ଖୋଲୁଛି ବବି ଓରଫ ପ୍ରଣବ ପ୍ରକାଶ ଦାସଙ୍କ ଯାଜପୁର ବିକାଶର ମଡେଲ୍ । ଖାଲି ମମତା ନୁହଁନ୍ତି ଗତ ୪ ବର୍ଷରେ ୧୧ ସାଂସଦ ଯାଜପୁରକୁ ଦେଇଛନ୍ତି ୧୪ କୋଟି ୮୨ ଲକ୍ଷ ୫୦ ହଜାରରୁ ଅଧିକ ଟଙ୍କା । ଯାହାର ତଥ୍ୟ ଲାଗିଛି ଓଟିଭି ହାତରେ । ମୌଳିକ ସମସ୍ୟାରେ ଜର୍ଜରିତ ରାଜ୍ୟର ଉପାନ୍ତ ଓ ଅଣବିକଶିତ ଅଞ୍ଚଳକୁ ଗୌଣ କରି କାହା ସ୍ବାର୍ଥ ବା ଚାପରେ, ସାଂସଦ ମାନେ କେବଳ ବବିଙ୍କ ଜିଲ୍ଲା ଯାଜପୁରକୁ ଅଜାଡି ଦେଇଥିଲେ ସିଂହଭାଗ ତାକୁ ନେଇ ଏବେ ଆରମ୍ଭ ହୋଇଛି ଚର୍ଚ୍ଚା ।
ଦରଦ ନା ଚାପ ? ଶ୍ରଦ୍ଧା ନା ବାଧ୍ୟବାଧକତା ? କ’ଣ ଥିଲା ଯାଜପୁରୁ ସାଂସଦ ପାଣ୍ଠି ବର୍ଷାର କାରଣ ? ପୂର୍ବରୁ ଏଇ ସାଂସଦ ପାଣ୍ଠି ହିଁ ମମତା-ବବି କଳିର ମଂଜି ବୋଲି ନିଜେ ମମତା ସ୍ପଷ୍ଟ କରି ସାରିଥିଲା ବେଳେ ବାକି ସାଂସଦ ମାନଙ୍କ ଉପରେ ବି କ’ଣ ଚାପ କାମ କରିଥିଲା ତାକୁ ନେଇ ବି ପ୍ରଶ୍ନ ଉଠିଛି। ତେବେ ଏନେଇ ବବି ଦାସଙ୍କ ପ୍ରତିକ୍ରିୟା ମିଳିପାରିନି ।
ଏବେ ନଜର ପକାନ୍ତୁ କେଉଁ ସାଂସଦ ଦେଇଛନ୍ତି କେତେ ଟଙ୍କା। ସରକାରୀ ତଥ୍ୟ ଅନୁସାରେ ୨୦୧୯-୨୦ ଆର୍ଥିକ ବର୍ଷରେ ରାଜ୍ୟସଭା ସାଂସଦ ଏନ୍ ଭାସ୍କର ରାଓ ଯାଜପୁର ବ୍ଲକକୁ ଦେଇଛନ୍ତି ୨୫ ଲକ୍ଷ ଟଙ୍କା । ସେହିପରି ବିଞ୍ଝାରପୁର ବ୍ଲକକୁ ୮ ଲକ୍ଷ ଟଙ୍କା ଦେଇଛନ୍ତି । ୨୦୧୯-୨୦ ଏବଂ ୨୦୨୩-୨୪ ଆର୍ଥିକ ବର୍ଷରେ ଅମର ପଟ୍ଟନାୟକ ଦେଇଛନ୍ତି ୪୫ ଲକ୍ଷ ଟଙ୍କା । ଡକ୍ଟର ସସ୍ମିତ ପାତ୍ର ତାଙ୍କ ସାଂସଦ ପାଣ୍ଠିରୁ ୫ କୋଟି ଟଙ୍କା ଯାଜପୁର ବ୍ଲକ୍କୁ ଏବଂ ଦଶରଥପୁର ବ୍ଲକକୁ ୨ ଲକ୍ଷ ୫୦ ହଜାର ଟଙ୍କା ଦେଇଛନ୍ତି ।
ସେହିପରି ମୟୂରଭଞ୍ଜର ରାଜ୍ୟସଭା ସାଂସଦ ମମତା ମହାନ୍ତ ଯାଜପୁର ବ୍ଲକ୍କୁ ୧ କୋଟି ଦେଇଛନ୍ତି । ସାଂସଦ ନରେନ୍ଦ୍ର ସ୍ବାଇଁ ଦଶରଥପୁର ବ୍ଲକକୁ ୮ ଲକ୍ଷ, ବିଂଝାରପୁର ବ୍ଲକ୍କୁ ୨୦ ଲକ୍ଷ ଦେଇଥିବା ବେଳେ, ୨୦୨୧-୨୨ ଆର୍ଥିକ ବର୍ଷରେ ସାଂସଦ ସୁଜିତ କୁମାର ଯାଜପୁର ବ୍ଲକ୍କୁ ୨୫ ଲକ୍ଷ, କୋରେଇ ବ୍ଲକକୁ ୬ ଲକ୍ଷ ଅନୁଦାନ ଦେଇଛନ୍ତି ।
ପଶ୍ଚିମ ଓଡ଼ିଶାର ବରିଷ୍ଠ ବିଜେଡି ନେତା ତଥା ପୂର୍ବତନ ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ମଧ୍ୟ ଏଥିରୁ ବାଦ୍ ପଡ଼ିନାହାନ୍ତି । ସେ ଯାଜପୁର ବ୍ଲକକୁ ୫୦ ଲକ୍ଷ ଦେଇଛନ୍ତି। ସାଂସଦ ମୁନା ଖାଁ ଯାଜପୁରର ବିଭିନ୍ନ ପ୍ରକଳ୍ପ ପାଇଁ ୩୦ ଲକ୍ଷ, ବଡଚଣା ପାଇଁ ୫ ଲକ୍ଷ, କୋରେଇ ପାଇଁ ୪ ଲକ୍ଷର ଅନୁଦାନ ଦେଇଛନ୍ତି ।
ପୂର୍ବତନ ସାଂସଦ ତଥା ବର୍ତ୍ତମାନର କଟକ ମେୟର ସୁବାସ ସିଂହ ସାଂସଦ ପାଣ୍ଠିରୁ ୩୫ ଲକ୍ଷ ଦେଇଥିଲେ । ସେଥିରୁ ସେ ଯାଜପୁର ବ୍ଲକ୍ ପାଇଁ ୩୦ ଲକ୍ଷ ଓ ବଡ଼ଚଣା ବ୍ଲକ୍ ପାଇଁ ୫ ଲକ୍ଷ ଦେଇଛନ୍ତି । ସାଂସଦ ସୁଲତା ଦେଓ ମୋଟ ୩ କୋଟି ୮୪ ଲକ୍ଷ ଟଙ୍କା ଅନୁଦାନ ଦେଇଛନ୍ତି। ସେଥିରୁ ସେ ରସୁଲପୁର ବ୍ଲକ୍ ପାଇଁ ୨୦ ଲକ୍ଷ ଟଙ୍କା ଅନୁଦାନ ଦେଇଥିବା ବେଳେ ଯାଜପୁର ବ୍ଲକ୍କୁ ୩ କୋଟି ୫୯ ଲକ୍ଷ ଦେଇଛନ୍ତି । ସେହିପରି ୨୦୨୩-୨୪ ଆର୍ଥିକ ବର୍ଷରେ ବରୀ ବ୍ଲକ ପାଇଂ ୧୫ ଲକ୍ଷ, ଯାଜପୁର ପାଇଁ ୧ କୋଟି ୮୦ ଲକ୍ଷ ଓ ରସୁଲପୁର ପାଇଁ ୧୫ ଲକ୍ଷର ଅନୁଦାନ ଦେଇଛନ୍ତି ।
ସାଂସଦ ମାନସ ମଙ୍ଗରାଜ ମଧ୍ୟ ଯାଜପୁର ବ୍ଲକ୍କୁ ୩୦ ଲକ୍ଷର ଅନୁଦାନ ଦେଇଛନ୍ତି । ଅବଶ୍ୟ ସାଂସଦ ସୁଲତା ଦେଓ ଯାଜପୁର ଜିଲ୍ଲାର ହୋଇଥିବାରୁ ସେ ତାଙ୍କ ସାଂସଦ ପାଣ୍ଠି ଅର୍ଥ ଯାଜପୁରକୁ ଦେବା କଥା ବୁଝାପଡୁଛି, ହେଲେ ବାକି ମାନଙ୍କ କ୍ଷେତ୍ରରେ କ’ଣ ବୋଲି ପ୍ରଶ୍ନ ଉଠୁଛି।
