ପୁରୀରେ ହାଇ ରେଟ୍ ହୋଟେଲ ରୁମ୍, ୪୫ ହଜାର ଛୁଇଁଲାଣି ପ୍ୟାକେଜ୍...!

ପୁରୀରେ ହାଇ ରେଟ୍ ହୋଟେଲ ଭଡ଼ା । ଦର ଶୁଣି ଛାନିଆ ଭକ୍ତ ଓ ପର୍ଯ୍ୟଟକ । ପାଖେଇ ଆସୁଛି ଘୋଷଯାତ୍ରା, ଏଇ ରବିବାର ସ୍ନାନ ପୂର୍ଣ୍ଣମୀ । ଯାହାର ସୁଯୋଗ ନେଇ ଜଗନ୍ନାଥ ପ୍ରେମୀ ଓ ପର୍ଯ୍ୟଟକଙ୍କୁ ଯେମିତି ଶୋଷଣ କରିବାକୁ ଚାତକ ପରି ଚାହିଁଛନ୍ତି ପୁରୀର ବିଭିନ୍ନ ଘରୋଇ ହୋଟେଲ ଓ ଲଜିଂ ମାଲିକ । ଯେହେତୁ ଭକ୍ତଟିଏ ବଡ଼ଦାଣ୍ଡରେ ରହି ଠାକୁରଙ୍କ ସ୍ନାନ, ପହଣ୍ଡି, ହାତୀବେଶ ଭଳି ନୀତିକାନ୍ତିର ପ୍ରତ୍ୟକ୍ଷ ଦର୍ଶନ ପାଇଁ ଇଚ୍ଛା ରଖିଥାଏ, ସେଇ ସୁଯୋଗରେ ରଥ ଓ ବାହୁଡ଼ା ପ୍ୟାକେଜ୍ ନାଁରେ ଚଢ଼ା ଦର କଷିବା ଆରମ୍ଭ କରିଛନ୍ତି ହୋଟେଲିୟର ।

ଏମିତିକି ୩ଦିନ-ତିନି ରାତି ହୋଟେଲରେ ରହଣୀ ପାଇଁ ପ୍ୟାକେଜ୍ ୩୦ରୁ ୪୫ ହଜାର ପର୍ଯ୍ୟନ୍ତ ବି ଛୁଇଁଲାଣି । ଆଉ ଏ ରେଟ୍ ଶୁଣି ବୁକିଂ ପାଇଁ ଆସୁଥିବା ଭକ୍ତଙ୍କ ମୁଣ୍ଡକାନ ଝାଇଁ ମାରି ଯାଉଛି । ଏମିତିକି ଗତବର୍ଷ ତୁଳନାରେ ଏଥର ହୋଟେଲ୍ ରୁମ୍ ଦର ଆହୁରି ୩୦ରୁ ୪୦ ପ୍ରତିଶତ ବଢ଼ିଥିବା କହିଲେଣି ।

ସେପଟେ ହୋଟେଲିୟରଙ୍କ ଏଭଳି ଆକସ୍ମିକ ପ୍ୟାକେଜ୍ ରେଟ୍ ବୃଦ୍ଧି ଉପରେ ପ୍ରଶାସନ ରୋକ୍ ଲଗାଇବାକୁ ଭକ୍ତ ଦାବି କରୁଥିବାବେଳେ, କିଛି ହୋଟେଲିୟର ବି ଏହାକୁ ନାପସନ୍ଦ କରିଛନ୍ତି । ଏଠି ପ୍ରଶ୍ନ - ରଥଯାତ୍ରା ଆଗରୁ ହଠାତ୍ କାହିଁକି ଆକାଶଛୁଆଁ ପୁରୀରେ ହୋଟେଲ୍ ରୁମ୍ ଦର ? ସାଧାରଣ ଦିନ ମାନଙ୍କ ଅପେକ୍ଷା କାହିଁକି ୩ଗୁଣା ଲାଭରେ ଦର କଷୁଛନ୍ତି ହୋଟେଲିୟର ? ଅନଲାଇନ୍ ବନ୍ଦ ରଖି କାହିଁକି ଅଫଲାଇନ୍ ରୁମ୍ ବୁକିଂ କୁ ଦେଉଛନ୍ତି ? ଟୁର୍ ଅପରେଟରଙ୍କ ମତରେ ଯେହେତୁ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଯୋଗୁଁ ମନ୍ଦିର ଚାରିକଡ଼େ ଥିବା ଅନେକ ଲଜିଂ ଓ ଧର୍ମଶାଳା ଭାଙ୍ଗି ଗଲା, ତାର ଭରପୂର ଫାଇଦା ଉଠାଇବା ଲକ୍ଷ୍ୟରେ ଅଛନ୍ତି ବଡ଼ଦାଣ୍ଡରେ ଥିବା ଅନ୍ୟ ହୋଟେଲ ଓ ଲଜିଂ ମାଲିକ ।

ତଥ୍ୟ ଅନୁସାରେ ଯେଉଁ ନନ୍ ଏସି ରୁମ୍ ବର୍ଷ ତମାମ ଦିନ ପିଛା ଦେଢ଼ରୁ ୨ ହଜାର ଟଙ୍କା ଭିତରେ ରହୁଥିଲା ତାହା ଏବେ ୧୦ରୁ ୧୨ ହଜାର ପାଖାପାଖି । ସେମିତି ଏସି ରୁମ୍ ଦିନକ ପିଛା ଦର ୧୦ରୁ ୧୫ହଜାର ପର୍ଯ୍ୟନ୍ତ ଚାଲିଯାଉଛି। ସେପଟେ ଯଦିଓ ଶ୍ରୀଜଗନ୍ନାଥ ଟେମ୍ପୁଲ ଅଫିସ୍ ଅଧୀନରେ ଥିବା ରୁମ୍ ଗୁଡ଼ିକର ରେଟ୍ ଭକ୍ତଙ୍କୁ ସାମାନ୍ୟ ସୁହାଇଲା ଭଳି ରହିଛି, ହେଲେ ତାହା ସାଧାରଣ ଲୋକଙ୍କୁ ମିଳେନି ।

ଶ୍ରୀମନ୍ଦିର ପ୍ରଶାସନ ପକ୍ଷରୁ ଆସିଥିବା ରେଟଚାର୍ଟରେ -ଥ୍ରୀ ବେଡେଡ୍ ଭିଆଇପି ସୁଟ୍ ଏସି ରୁମ୍ ବାବାଦକୁ ୩ ଦିନ ପ୍ୟାକେଜ ହିସାବରେ ୧୭ ହଜାର ୩୧୫ଟଙ୍କା ଧାର୍ଯ୍ୟ ହୋଇଥିବାବେଳ ଦିନେ ରହିଲେ ଦେବାକୁ ହେବ ୫୭୭୨ଟଙ୍କା । ତେବେ ରଥଯାତ୍ରା ବେଳେ ଏଥିରୁ ପ୍ରାୟ ଅଧିକାଂଶ ରୁମ୍ ସରକାରୀ ଅଫିସର ଓ ଭିଆଇପିଙ୍କ ପାଇଁ ବୁକିଂ ଥିବା କହିଛନ୍ତି ଶ୍ରୀମନ୍ଦିର ଉନ୍ନୟନ ପ୍ରଶାସକ । ସେପେଟେ ପୁରୀରେ ହୋଟେଲ୍ ଓ ଲଜିଂ ମାଲିକମାନେ ଯେମିତି ମନଇଚ୍ଛା ଦର ନକଷନ୍ତି, ସେଥିପ୍ରତି ପ୍ରଶାସନ ଦୃଷ୍ଟି ଦେବ ବୋଲି କହିଛନ୍ତି ଜିଲ୍ଲା ପର୍ଯ୍ୟଟନ ଅଧିକାରୀ ।

ଏବେ ଅପେକ୍ଷା ଭକ୍ତ ଓ ପର୍ଯ୍ୟଟକଙ୍କୁ ଶୋଷଣ ଲକ୍ଷ୍ୟରେ ଥିବା ପୁରୀ ବଡ଼ଦାଣ୍ଡର ହୋଟେଲ ଓ ଲଜିଂ ମାଲିକଙ୍କ ଉପରେ କି ଆକ୍ସନ ନେଉଛି ଜିଲ୍ଲା ପ୍ରଶାସନ ।