ଶ୍ରୀମନ୍ଦିରରେ ଶ୍ରୀଜିଉଙ୍କ ଶ୍ରୀଅଙ୍ଗକୁ ବିପଦ ମୂଷା-ଅସରପା

ଶ୍ରୀଜିଉଙ୍କ ଉପରେ ଡେଉଁଛନ୍ତି ବଡ଼ ବଡ଼ ମୂଷା। ଶ୍ରୀଅଙ୍ଗ ସାରା ବୁଲୁଛନ୍ତି ମାଳ ମାଳ ଅସରପା। ଶ୍ରୀମନ୍ଦିର ଗର୍ଭଗୃହରେ ବିରାଜିତ ଚତୁର୍ଦ୍ଧାମୂର୍ତ୍ତିଙ୍କ ପାଇଁ ଏମାନେ ସାଜିଛନ୍ତି ଘୋର ବିପଦ । ପରିସ୍ଥିତି ଏପରି ହେଲାଣି, ରତ୍ନବେଦୀ ଉପରକୁ ଚଢ଼ି ଶ୍ରୀଅଙ୍ଗ ସେବା ପାଇଁ ଯିବାକୁ ଡରିଲେଣି ସେବାୟତ। ଖୋଦ୍ ସିଂହାରି ସେବକଙ୍କ କହିବାନୁସାରେ ଠାକୁରଙ୍କ ଉପରେ ଲାଗିଥିବା ଚାନ୍ଦୁଆ ଉପରୁ ହିଁ ମୂଷା ଖପ୍ ଖାପ୍ ହୋଇ ଡେଉଁଛନ୍ତି । ଠାକୁରଙ୍କ ଉପରେ ଝାଡ଼ା, ପରିସ୍ରା ବି କରୁଛନ୍ତି ଅସରପା ।

ସବୁବେଳେ ଶ୍ରୀଅଙ୍ଗରେ ଲାଗି ରହିବା ଫଳରେ ଶ୍ରୀଜିଉମାନଙ୍କ ଶ୍ରୀମୁଖ ଶୀଘ୍ର ମଳିନ ପଡ଼ିଯାଉଛି । ଯାହା ଫଳରେ ମାତ୍ର ୧୫ରୁ ୨୦ ଦିନରେ ଥରେ ଶ୍ରୀମୁଖ ଶୃଙ୍ଗାର ବା ବନକଲାଗି ନୀତି କରିବାକୁ ପଡୁଛି । ମହାପ୍ରଭୁମାନେ ପରିଧାନ କରୁଥିବା ଖଣ୍ଡୁଆ ପାଟ ଓ ଅନ୍ୟ ମୂଲ୍ୟବାନ ବସ୍ତ୍ରକୁ ବି ମୂଷା କାଟି ପକାଉଛନ୍ତି । ପୂର୍ବରୁ ଏଭଳି ସ୍ଥିତି ଖୁବ୍ କ୍ୱଚିତ୍ ଦେଖା ଯାଉଥିଲା, ଏବେ କିନ୍ତୁ ନିୟମିତ ହେଲାଣି । ବାରମ୍ବାର ଶ୍ରୀମନ୍ଦିର ପ୍ରଶାସନକୁ ଏନେଇ ଅବଗତ କରାଯାଉଥିଲେ ବି କେହି ଏଥିପ୍ରତି କର୍ଣ୍ଣପାତ କରୁନାହାନ୍ତି । ଯଦି ଏହାର ଶୀଘ୍ର ପ୍ରତିକାର ନହୁଏ, ତାହାଲେ କେତେବେଳେ ବି ମୂଷା ଶ୍ରୀଜିଉଙ୍କ ଶ୍ରୀଅଙ୍ଗକୁ ବାନ୍ଧି ଧରିଥିବା ପାଟ ଡୋରକୁ ବି କାଟି ଦେଇ ପାରନ୍ତି । ସିଂହାରି ସେବକଙ୍କ ଏ ଅଭିଯୋଗକୁ ବରିଷ୍ଠ ଦଇତାପତି ଓ ସୁଆର ମହାସୁଆର ସେବକମାନେ ବି ସମର୍ଥନ କରିଛନ୍ତି ।

ଶ୍ରୀଅଙ୍ଗ ପ୍ରତି କେତେ ବିପଦ ମୂଷା-ଅସରପା ? ଖୋଦ୍ ସେବକଙ୍କ ମୁହଁରୁ ଏସବୁ ଶୁଣିବା ପରେ ଏବେ ଅଗଣିତ ଜଗନ୍ନାଥ ପ୍ରେମୀ ଓ ଭକ୍ତ ମହଲରେ ବି ଅସନ୍ତୋଷ । ଏଠି ପ୍ରଶ୍ନ ଶ୍ରୀମନ୍ଦିର ଗର୍ଭଗୃହକୁ ମୂଷା ଆସୁଛନ୍ତି କେଉଁଠୁ ? ପ୍ରତିକାର ଦିଗରେ ଶ୍ରୀମନ୍ଦିର ପ୍ରଶାସନ କରୁଛି କଣ ? କିଛି ସେବକଙ୍କ ମତରେ ଗର୍ଭଗୃହରେ ଠାକୁରଙ୍କୁ ଲାଗି ହେଉଥିବା ଖେଚୁଡ଼ି ଭୋଗ ଓ ଅନ୍ୟାନ୍ୟ ଜିନିଷ ଖାଇ ମୂଷା ବଂଶ ବୃଦ୍ଧି କରୁଛନ୍ତି । ଯେହେତୁ ଠାକୁରଙ୍କ ଉପରେ ଲାଗିଥିବା ରତ୍ନ ଚାନ୍ଦୁଆ ବର୍ଷରେ ଥରେ ବଦଳାଯାଏ, ତେଣୁ ତାହା ସେମାନଙ୍କ ରହିବାର ସବୁଠୁ ସୁରକ୍ଷିତ ସ୍ଥାନ ପାଲଟିଛି । ଏଥିସହ ଗର୍ଭଗୃହକୁ ଲାଗି ରହିଥିବା ରତ୍ନଭଣ୍ଡାର ବି ଦୀର୍ଘ ବର୍ଷ ଧରି ପରିତ୍ୟକ୍ତ ଅବସ୍ଥାରେ ଥିବାରୁ ତାହା ବି ମୂଷାଙ୍କ ରହଣୀର ଉତ୍ତମ ସ୍ଥଳି ହୋଇଛି ।

ସେପଟେ ଠାକୁରଙ୍କୁ ଲାଗି ହେବା ପରେ ଫିଙ୍ଗା ଯାଉଥିବା ବାସୀ ଫୁଲ ଓ ମାଳ ଖାଇ ବଂଶ ବିସ୍ତାର କରୁଛନ୍ତି ଅସରପା । ତେଣୁ ଶୀଘ୍ର ଏହାର ଦମନ ଦରକାର । ସେପଟେ ଏନେଇ ପ୍ରତିକ୍ରିୟା ରଖି ଶ୍ରୀମନ୍ଦିର ନୀତି ପ୍ରଶାସକ କହିଛନ୍ତି-ଗର୍ଭଗୃହରେ ମୂଷା ଓ ଅସରପାଙ୍କ ଉପସ୍ଥିତି ନୂଆ ନୁହେଁ । ଯେହେତୁ ମୂଷାଙ୍କୁ ମାରିବା ନିୟମ ନାହିଁ, କେବଳ ଯନ୍ତା ବସାଇ ଧରାଯାଉଛି । ଅସରପା ନିପାତ ପାଇଁ ଶ୍ରୀଜିଉମାନଙ୍କ ଶରୀରରେ ଚୂଆ, ଚନ୍ଦନ ଓ କର୍ପୁର ଲେପନ ନିୟମିତ କରାଯାଉଛି । ତେବେ ମୂଷା ଓ ଅସରପାଙ୍କ ଦ୍ୱାରା ଶ୍ରୀଅଙ୍ଗକୁ ବିପଦ ଥିବା କଥାକୁ କିନ୍ତୁ ସଫା ସଫା ଏଡ଼ାଇ ଯାଇଛନ୍ତି ନୀତି ପ୍ରଶାସକ ।