ବାପା ମାଆ ନାହାନ୍ତି, ନହଲେ ପୁଅ ପାଇଁ ସେମାନଙ୍କ ଛାତି ଆଜି ଗର୍ବରେ ଫାଟି ପଡ଼ୁ ଥାନ୍ତା...

ଦୀପକ ସାହୁ । ଯାହାଙ୍କ ପାଇଁ ଆଜି ନାରା ପଡ଼ୁଛି, ଯାହାଙ୍କୁ ଲୋକେ କାନ୍ଧରେ ବସାଇ ବୁଲାଉଛନ୍ତି । ଯାହାଙ୍କ ପାଇଁ ପୁରା ଗାଁ ଆଜି ଗର୍ବରେ ଫାଟି ପଡ଼ୁଛି । ସେ ହେଉଛନ୍ତି ଦୀପକ ସାହୁ । ନରସିଂହପୁର ବ୍ଲକ ଅନ୍ତର୍ଗତ ସରଧାପୁର ପଞ୍ଚାୟତ ଜଗନ୍ନାଥ ପ୍ରସାଦ ଗାଁର ଏକ ଗରିବ ପରିବାରର, ଜାତୀୟ ପ୍ରତିଭା ହେଉଛନ୍ତି ଦୀପକ । ସେ ସେହି ନରସିଂହପୁର ମହାବିଦ୍ୟାଳୟର ଛାତ୍ର । ବାପା ମାଆ ନାହାନ୍ତି । ଜେଜେ ବାପା-ମାଆ ହିଁ ସବୁ କିଛି ।

ଏହି ଦୀପକ ଏବେ ଓଡ଼ିଶା ସିନିୟର ଖୋ ଖୋ ଦଳରେ ସ୍ଥାନ ପାଇ ନିଜ ଗାଁ ପାଇଁ ଗୌରବ ଆଣିଛନ୍ତି । ଗୋଆରେ ଅନୁଷ୍ଠିତ ୩୭ତମ ନ୍ୟାସନାଲ ଗେମ୍‌ ଖୋ’ ଖୋ’ରେ ଓଡ଼ିଶା ରନର୍ସ ଅପ ପାଇଛି । ଆଉ ଏହି ଟିମ୍‌ରେ ସାମିଲ ଥିଲେ ଦୀପକ । ତାଙ୍କୁ ଜାତୀୟ ସ୍ତରରେ ରୌପ୍ୟ ପଦକରେ ସମ୍ମାନିତ କରାଯାଇଛି । କେବଳ ଏହି ଗୋଟିଏ ଉପଲବ୍ଧି ନୁହେଁ, ପୂର୍ବରୁ ମଧ୍ୟ ସେ ଅନେକ ଜାତୀୟ ସ୍ତରର କ୍ରୀଡ଼ା ପ୍ରତିଯୋଗୀତାରେ ସାମିଲ ହୋଇ ପୁରସ୍କାର ପାଇଛନ୍ତି । ତାଙ୍କର ଏହି ସବୁ ଉପଲବ୍ଧି ପାଇଁ ପୁରା ଗାଁ ଆଜି ତାଙ୍କୁ କାନ୍ଧରେ ବସାଇ ବୁଲାଉଛନ୍ତି ।

ଦୀପକ ୧୪ ବର୍ଷରୁ କମ ଓଡ଼ିଶା ଖୋ ଖୋ ଦଳରେ ମଧ୍ୟ ସାମିଲ ଥିଲେ । ୧୭ ବର୍ଷରୁ କମ ଜୁନିଅର ଦଳରେ ବି ସେ ନିଜର ପ୍ରତିଭା ଦେଖାଇଛନ୍ତି । ଏହି ଟିମ୍‌ରେ ସାମିଲ ହୋଇ ସେ ବାହାର ରାଜ୍ୟକୁ ଯାଇ ଓଡ଼ିଶା ପାଇଁ ପ୍ରତିନିଧିତ୍ୱ କରିଛନ୍ତି ।

ଦୀପକ ନିଜର ଏତେ ସବୁ ସଫଳତା ପାଇଁ କ୍ରୀଡ଼ା ଶିକ୍ଷକଙ୍କଠାରୁ ଆରମ୍ଭ କରି, ସେ ଅଭ୍ୟାସ କରୁଥିବା ପଡ଼ିଆରେ ଯେଉଁ ସବୁ ସହଯୋଗୀମାନେ ଥିଲେ ତାଙ୍କୁ ମଧ୍ୟ ଶ୍ରେୟ ଦେଇଛନ୍ତି ।

ତେବେ ସ୍ଥାନୀୟ ଜନପ୍ରତିନିଧି ତଥା ସରପଞ୍ଚଙ୍କ କହିବା କଥା ଦୀପକଙ୍କୁ ଯଦି ସରକାରୀ ସ୍ତରରେ ଆଉ କିଛି ପ୍ରତ୍ସାହନ ମିଳିପାରନ୍ତା ତେବେ ସେ ଆହୁରି ଆଗକୁ ବଢ଼ିପାରନ୍ତେ ।