LIVE TV
ଧର୍ମମାସରେ ଧର୍ମ ସ୍ଥାନରେ ରହି ହବିଷ କରି ଧର୍ମ ଅର୍ଜନ କରିବାକୁ ଚାହୁଁଥିବା ଯେଉଁ ହବିଷ୍ୟାଳିମାନେ କାଲି ରାତିରେ ହବିଷ୍ୟାଳି ଶିବିର ବାହାରେ ଥିଲେ, ଆଜି ପଞ୍ଜିକରଣ କାଗଜ ଦେଖାଇବା ପରେ ସେମାନଙ୍କୁ ବିଭିନ୍ନ ଶିବିରକୁ ଛଡ଼ା ଯାଇଛି । କାହିଁକି ନା କାଲିଠୁ ବିଭିନ୍ନ ତୀର୍ଥ ପୁଷ୍କରିଣୀରେ ସ୍ନାନ କରି ସଂକଳ୍ପ କରିବେ। ଶ୍ରୀମନ୍ଦିର ଯାଇ ଶ୍ରୀଜଗନ୍ନାଥଙ୍କୁ ଦର୍ଶନ କରିବେ । ଖୁସିରେ ରାଇ ଦାମୋଦରଙ୍କୁ ପୂଜା କରିବା ସହ ଏମିତି ରାଇ ଦାମୋଦର ଗୀତ ବୋଲିବେ ।
Also Read
ହେଲେ ଶ୍ରୀକ୍ଷେତ୍ରରେ ହବିଷ କରିବା ପାଇଁ ରାଜ୍ୟର କୋଣ ଅନୁକୋଣରୁ ଆସିଥିବା ଅନେକ ହବିଷ୍ୟାଳିଙ୍କ ପାଖରେ ଏଯାଏଁ ଏଭାଗ୍ୟ ଜୁଟିନି । କାରଣ ସରକାରଙ୍କ ହବିଷ୍ୟାଳି ଯୋଜନାରେ ଏଥର ଅନଲାଇନରେ ପଞ୍ଜିକରଣ କରିଥିବା 3024 ଜଣଙ୍କୁ ପୁରୀର ଥିବା 5ଟି ଶିବିରରେ ରହଣି ବ୍ୟବସ୍ଥା କରାଯାଇଛି । ହେଲେ ବିଭିନ୍ନ କାରଣରୁ ପଞ୍ଜିକରଣ କରି ପାରି ନଥିବା, ଏବଂ ଗତଥର ଭଳି ଏଥର ବି ଅଫଲାଇନରେ ପଞ୍ଜିକରଣ ହେଇଯିବ ଭାବି ପୁରୀ ପହଞ୍ଚିଥିବା ବହୁ ହବିଷ୍ୟାଳି,ସ୍ଥାନ ନଥିବାରୁ ନିରାଶ ହୋଇଛନ୍ତି ।
କାଲିଠୁ ମା ମାନେ ହବିଷ କରିବାକୁ ଥିବାରୁ ଆଜିଠୁ ସେମାନଙ୍କୁ ଶିବରରେ ରହିବାକୁ ଦିଆ ତ ଗଲାଣି । ହେଲେ ହବିଷ୍ୟାଳି କେନ୍ଦ୍ର ବୃନ୍ଦାବତୀ ନିବାସରେ ଅପରିଚ୍ଛନ୍ନ ପରିବେଶକୁ ଦେଖିଲେ ଲାଗୁଛି, ସରକାର ଯେମିତି ଏହାକୁ ଗୁରୁତ୍ୱ ଦେଉନାହାନ୍ତି । ଯେଉଁଠି ହବିଷ୍ୟାଳିଙ୍କ ବେଡ୍ ପଡ଼ିଛି ସେଇ ରୁମ୍ ଚଟାଣର ସ୍ଥିତି ଦୟନୀୟ ।
ଖାଲି ସେତିକି ନୁହେଁ, ହବିଷ୍ୟାଳି ଶିବିର ବାରଣ୍ଡାରେ ମଦ ବୋତଲ ବି ଗଡୁଥିବା ଦେଖିବାକୁ ମିଳିଛି । ଯାହାକୁ ନେଇ ଚିନ୍ତା ପ୍ରକଟ କରିଛନ୍ତି ହବିଷ୍ୟାଳିଙ୍କ ସଂପର୍କୀୟ । ତେବେ ଅତିରିକ୍ତ ଜିଲ୍ଲାପାଳ କହିଛନ୍ତି ସବୁ ହବିଷ୍ୟାଳି ଶିବିରକୁ ପରିଷ୍କାର ପରିଚ୍ଛନ୍ନ ପାଇଁ ଉଦ୍ୟମ ଚାଲିଛି ।
ଅନ୍ୟପଟେ ହଜାର ହଜାର ହବିଷ୍ୟାଳିଙ୍କ ସୁରକ୍ଷିତ ରହଣି ପାଇଁ ସମସ୍ତ ବ୍ୟବସ୍ଥା କରାଯାଉଥିବା ନେଇ ପ୍ରଶାସନ କହୁଥିବା ବେଳେ ଆଗୁଆ କାହିଁକି ଶିବିରର ପରିଚ୍ଛନ୍ନତା ପ୍ରତି ଧ୍ୟାନ ଦିଆଗଲାନି ତାକୁ ନେଇ ପ୍ରଶ୍ନ ଉଠିଛି । ସେପଟେ ଅନଲାଇନରେ ପଞ୍ଜିକରଣ କରିପାରିନଥିବା ହବିଷ୍ୟାଳୀଙ୍କୁ ପଞ୍ଜୀକୃତ କରାଯାଇ ସେମାନଙ୍କ ରହଣିର ବ୍ୟବସ୍ଥା କରାଯାଉଛି କି ଫେରାଇ ଦିଆଯାଉଛି ତା ଉପରେ ବି ନଜର ରହିଛି।
- Reported by:
- MADHUSUDAN MISHRA
