ନିଆରା ନାଉରିର କାହାଣୀ ! ନଈରେ ବୁଡ଼ିଲା ଡଙ୍ଗା, ଅନ୍ୟଙ୍କୁ ବଞ୍ଚାଇଲେ ନିଜେ ଜୀବନ ହାରିଲେ

ହଁ, ସତରେ.. ସେ ଦିନ ସତେ ଯେମିତି ନଈ ମଝିରେ ଯମ ଜଗିଥିଲା । ନାଉରିଆ ତ ଠାକୁରଙ୍କୁ ଡାକି ନା ବୋହି ନେଉଥିଲା । ଆଉ ଯାତ୍ରୀ ବି ଖୁସିରେ ନିଜ ନିଜ ଗନ୍ତବ୍ୟ ସ୍ଥଳକୁ ଯିବାକୁ ଡଙ୍ଗାରେ ବସିଥିଲେ । ହେଲେ କାତ ମାରି କେତେବାଟ ନାଆ ଯାଇଛି କି ନାହିଁ ସବୁ କିଛି ଓଲଟ ପାଲଟ ହୋଇଗଲା । କ୍ଷଣିକରେ ସମସ୍ତେ ବୁଡ଼ିଗଲେ ନଈରେ, ଯିଏ ଯେମିତି ପାରିଲା କୂଳରେ ଲାଗିଲା ଆଉ ବାକି ନଈ ଗର୍ଭରେ ନେଇଗଲେ ସଲୀଲ ସମାଧି । ନାଉରିଆଙ୍କ ଜୀବନ ବି ଗଲା ।

ହେଲେ ଆମ କାହାଣୀର ନାୟକ ସେ ନାଉରିଆ ସୁଦର୍ଶନ । କାହିଁକିନା ମୂଲ୍ୟବାନ ତିନି ତିନିଟି ଜୀବନ ବଞ୍ଚାଇ ଆଉ ଜଣଙ୍କୁ ବଞ୍ଚାଇବାକୁ ଯାଉଥିବା ନାଉରିଆ ସୁଦର୍ଶନ ସ୍ୱାଇଁ ସେଦିନ ନିଜେ ମରଣମୁହଁକୁ ଚାଲିଯାଇଥିଲେ । ଆଉ ଏବେ ମରି ମରି ବଞ୍ଚୁଛନ୍ତି ଆଳି ବ୍ଲକ ଏକମାଣିଆର ସୁଦର୍ଶନ ସ୍ୱାଇଁଙ୍କ ବିଧବା ପତ୍ନୀ ଓ ପୁଅ ।

ସୁଦର୍ଶନ ସ୍ୱାଇଁ ଦୀର୍ଘ ୨୦ ବର୍ଷ ହେବ ବ୍ରାହ୍ମଣୀ ନଦୀରେ ଘାଟ ପକାଇ ପରିବାର ପାଳୁଥିଲେ । କି ଖରା, କି ବର୍ଷା -ବାତ୍ୟା ହେଉ ବା ବନ୍ୟା ସବୁବେଳେ ସମସ୍ତଙ୍କୁ ସହଯୋଗ କରିଆସୁଥିଲେ । ଗଲା ମାସ ୨୭ ତାରିଖରେ କିନ୍ତୁ ସବୁ କିଛି ବଦଳି ଯାଇଥିଲା । କେନ୍ଦ୍ରାପଡ଼ା ଏକମାଣିଆରୁ ରାଜନଗର କେରେଡ଼ାଗଡ଼କୁ ଡଙ୍ଗାରେ ଫେରୁଥିବାବେଳେ ବ୍ରାହ୍ମଣନଦୀରେ ଓଲଟି ପଡ଼ିଥିଲା ଡଙ୍ଗା । ଡଙ୍ଗାରେ ଥିଲେ ପ୍ରାୟ ୨୮ ଜଣ ଯାତ୍ରୀ । ୪ଟି ବାଇକ ସହ ସାଇକେଲ ବି ଲଦା ହୋଇଥିଲା । ହେଲେ ଭାରସାମ୍ୟ ହରାଇ ମଝି ନଈରେ ଡଙ୍ଗାଟି ବୁଡ଼ିଯିବାରୁ ସମସ୍ତେ ଖସିପଡ଼ିଥିଲେ ନଦୀ ଭିତରକୁ ।

ଏକମାଣିଆ-କେରେଡ଼ାଗଡ଼ ଭିତରେ ଏଭଳି ବିପଦଜ୍ଜନକ ନୌଯାତ୍ରା କିମ୍ବା ଅଘଟଣ ନୂଆ ନୁହେଁ । ଫେବ୍ରୁୟାରୀ ୮ରେ ୨୦ ଯାତ୍ରୀଙ୍କୁ ନେଇଯାଉଥିବା ଡଙ୍ଗାଟି ବୁଡ଼ିଯାଇଥିଲା । ଅବଶ୍ୟ କାହାର କୌଣସି କ୍ଷତି ଘଟିନଥିଲା । ବ୍ରାହ୍ମଣୀ ଓ ଖରସ୍ରୋତା ଘେରରେ ରହିଥିବା ଏକମାଣିଆ ସହ କେରେଡ଼ାଗଡ଼ ମଧ୍ୟରେ ଯାତାୟାତ ପାଇଁ ୨୦୧୬ ନଭେମ୍ବର ୮ରେ ଏକ ସେତୁ ନିର୍ମାଣ ପାଇଁ ମୁଖ୍ୟମନ୍ତ୍ରୀ ଭିତ୍ତିପ୍ରସ୍ତର ସ୍ଥାପନ କରିଥିଲେ। ଇତିମଧ୍ୟରେ ୬ ବର୍ଷ ପୁରିଯାଇଥିଲେ ବି ବାଲି ମୁଠାଏ ପଡ଼ିନି ।