LIVE TV
ଚିର ନିଦ୍ରାରେ ଶୋଇଥିବା ସାଥୀକୁ ଶେଷ ଦର୍ଶନ କରୁଥିଲେ । ଲୋତକ ଭରା ନୟନରେ ଗଭୀର ଶ୍ରଦ୍ଧାଞ୍ଜଳି ବି ଦେଉଥିଲେ । ଓଲିଉଡ୍ ଅଭିନେତା ପିଣ୍ଟୁ ନନ୍ଦଙ୍କ ପାର୍ଥୀବ ଶରୀର ଆଜି ତାଙ୍କ ଭୁବନେଶ୍ୱର ପଟିଆ ବାସଭବନରରୁ ପୁରୀ ସ୍ୱର୍ଗଦ୍ୱାର ଅଭିମୁଖେ ବାହାରିବା ବେଳକୁ ସେଠି ଥିଲା ଲୋକରଣ୍ୟ ପରିବେଶ ।ଓଲିଉଡର ବହୁ କଳାକାର, ପ୍ରଶଂସକ ଓ ବନ୍ଧୁ ପରିଜନ ସମସ୍ତଙ୍କ ଆଖି ଲୁହରେ ଭିଜୁଥିଲା, ଅବେଳରେ ପିଣ୍ଟୁଙ୍କ ଅବର୍ତ୍ତମାନ ବିଶ୍ୱାସ ଲାଗୁନଥିଲା ।
ପୁରୀ ସ୍ୱର୍ଗଦ୍ୱାରରେ ବି ପିଣ୍ଟୁଙ୍କୁ ଅନ୍ତିମ ବିଦାୟ ଦେବାକୁ ବିଭିନ୍ନ କଳାକାର ସଂଘ, ସାଂସ୍କୃତିକ ଅନୁଷ୍ଠାନ ଓ ସିନେ ପ୍ରେମୀ ପହଞ୍ଚିଥିଲେ । ପିଣ୍ଟୁଙ୍କ ବଡ଼ ପୁଅ ସାଇ ନନ୍ଦ ମୁଖାଗ୍ନି ଦେବା ପରେ ପଞ୍ଚଭୂତରେ ବିଲୀନ ହୋଇ ଯାଇଥିଲେ ଆଲବମ୍ରୁ ଚଳଚିତ୍ର ଜଗତ ଯାଏଁ ନିଖୁଣ ଅଭିନୟର ଅଭୂଲା ଛାପ ଛାଡ଼ି ଯାଇଥିବା ପିଣ୍ଟୁ ନନ୍ଦ ।
Also Read
ତେବେ ଚିକିତ୍ସାଧୀନ ଅବସ୍ଥାରେ ଅଭିନେତା ପିଣ୍ଟୁ ନନ୍ଦ ଆଖି ବୁଜିବା ଘଟଣାକୁ ନେଇ ସିଧାସଳଖ ମୁଖ୍ୟମନ୍ତ୍ରୀ, 5T ବ୍ୟବସ୍ଥା ଓ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି ପିଣ୍ଟୁଙ୍କ ବଡ଼ ଭାଇ ଅଭିରାମ । କହିଛନ୍ତି ରାଜ୍ୟର ଜଣେ କଳାକାରକୁ ବଞ୍ଚାଇ ପାରିନଥିବା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇ ଦିଅନ୍ତୁ । ତାସହ ଅଭିଯୋଗ କରିଛନ୍ତି ଯେ, ଏବେ ଯେଉଁ ରାଜ୍ୟ ସରକାର ଶୋକ ପ୍ରକାଶ କରୁଛନ୍ତି, ମାସେ ଧରି ପିଣ୍ଟୁଙ୍କ ଚିକିତ୍ସା ଚାଲିଥିବାବେଳେ କିନ୍ତୁ କିଛି କଲେନି । ହକି ପାଇଁ ବାହାରୁ କଳାକାର ଆଣି ପାଣି ଭଳି ଟଙ୍କା ଖର୍ଚ୍ଚ କରୁଛନ୍ତି ହେଲେ ରାଜ୍ୟର ଜଣେ କଳାକାରକୁ ବଞ୍ଚାଇ ପାରୁ ନାହାନ୍ତି । 5T ନାଁରେ କେବଳ ଡିଣ୍ଡିମ ପିଟା ଚାଲିଛି । ଓଲିଉର ଅନେକ ବରିଷ୍ଠ କଳାକାର ବି ପିଣ୍ଟୁଙ୍କ ଭାଇଙ୍କୁ ସମର୍ଥନ କରି ସରକାରଙ୍କ ଉପରେ ଖୁବ୍ ବର୍ଷିଛନ୍ତି ।
ସେପଟେ ରାଜ୍ୟ ସଂସ୍କୃତି ମନ୍ତ୍ରୀ ଆଜି ଏହି ଘଟଣାରେ ଦୁଃଖ ପ୍ରକାଶ କରିବା ସହ ପିଣ୍ଟୁଙ୍କ ଭଳି ଜଣେ କଳାକାରଙ୍କ ମୃତ୍ୟୁ ଓଡ଼ିଶା ପାଇଁ ଅପୂରଣୀୟ କ୍ଷତି ବୋଲି କହିଛନ୍ତି । ତେବେ ଭବିଷ୍ୟତରେ ଏଭଳି ଘଟଣାରେ ସରକାରଙ୍କ ପକ୍ଷରୁ କଣ ବ୍ୟବସ୍ଥା ହୋଇପାରିବ ତାହା ବିଚାର କରାଯିବ ବୋଲି କହିଛନ୍ତି ।
ଲିଭର ସିରୋସିସରେ ଆକ୍ରାନ୍ତ ପିଣ୍ଟୁ ନନ୍ଦ ଯକୃତ ପ୍ରତିରୋପଣ ପାଇଁ ଗତ ୭ ତାରିଖରେ ଦିଲ୍ଲୀ ଇନ୍ଷ୍ଟିଚ୍ୟୁଟ୍ ଅଫ୍ ଲିଭର ଆଣ୍ଡ ବିଲିଆରି ସାଇନସେସ୍-ILBSରେ ଭର୍ତ୍ତି ହୋଇଥିଲେ । ତେବେ ଦିଲ୍ଲୀରେ ପରିବାରରୁ କୌଣସି ଡୋନରଙ୍କ ବ୍ଲଡ୍ ଗ୍ରୁପ୍ ମ୍ୟାଚ୍ ନକରିବାରୁ ଏବଂ ଅନ୍ୟ ଡୋନରଙ୍କଠାରୁ ଯକୃତ ପ୍ରତିରୋପଣର ନିୟମ ନଥିବାରୁ ହାଇଦ୍ରାବାଦକୁ ନିଆଯାଇଥିଲା । ସେଠାରେ ପିଣ୍ଟୁଙ୍କ ଲିଭର ଟ୍ରାନ୍ସପ୍ଲାଣ୍ଟ ଓ ଚିକିତ୍ସା ବାବଦକୁ ଦରକାର ପଡୁଥିଲା ୩୫ ଲକ୍ଷ ଟଙ୍କା। କିନ୍ତୁ ୧୭ ଦିନର ଅପେକ୍ଷା ପରେ ଏବଂ ସହାୟତା ପାଇଁ ନିବେଦନ ସତ୍ତ୍ବେ କେହି ଡୋନର୍ ନମିଳିବାରୁ ବୁଧବାର ରାତି ୧୧ଟା ୨୫ ମିନିଟରେ ଆଖି ବୁଜିଦେଲେ ପିଣ୍ଟୁ।
